Génesis 46

Egiptoo cuha Jacobone

1Nitohaneein jetaote, satiin niicha siriichuri rucuhele aina jiniiquiin bero cuhane cue Jacobo. Nitohaneein cuujueein jetaote, inae Bereseba turuhin rai inaca Isaca Coaunera Cana Coaunera rai, lenonecuru sohin mocoe jetao nii Isaraelineein Cana Coauneraacha curuaatei Jacobo. 2Nii cojoanotiin cuhane rai ecocohin jetaote: “Jacobo”, naain rai curuaa que bajaa Cana Coaunerane jana jetaote:

“Cauna neeunra”, naain tonoraa Jacobone jana jetao:

3“Jiaonriha nii chaque tonajeein casiin cuhi Egiptoo nera. Ucuaene coroatajajelanaala nefaauruha ii nefoerateeurune coina ichaa cureeunnicha. Canune ii inaca aina curuaecaain inara Coaunera neeunra. 4Ii ainane Egiptoo nereeunnicha. Nena laen canu, inae ecu tihane bana jelai caje ii nefoerateeuru rocoreeunnicha. Chaentechu, inae ohine bana ii calaohi Jose rohan netiin oriquiincha”, nae jetao rai Cana Coaunera.

5Niritoha rai Cana Coaunerane baiha jetaote, nii cuhane amanajaauruhane coina, rene Faraaoncha letoai cabario que tararaeraain nenaa carreta cuhane jetao nii acaauru inaca, acaauru bereecuru, acaauru comasaihuru, naaonjoaihunri fauhin jitariin amanajaaunre jetao nii Bereseba jelai caje nii Isaraele calaohichuru. 6Nitohaneein jetaote, jitariin nii Canaan netiin niicha sirii, itolere rucuheleeuru, bacaauru, carenerocuru, naaonjoaihunri amaain Egiptoo cuha Jacobone jana jetao, 7satiin aina cuurelu rai calaohichuru, rai cacunucuru, rai nichoalacuru quicha cojoaajihuru, ene cojoaajihuru, naaonjoaihunri.

8Caaurute, lauri lauri nebateein Jacobohacha siriichuri rai calaohichuru caje nefoeratenacaauru Egiptoo cunacaauru Isaraelitaauru curuaacurune.

Jataain Jacobo calaohichuru ajichaneeinte nenaane Robeen. 9Jana nii Robeen calaohichurute Hanoc, Falu, Hezron, Carmi, naaonjoaihunrine.

10Jana Simeeon calaohichurute Jemoeri, Jamiin, Ohad, Jaquiin, Sohar, Saoro, naaonjoaihunrine. Nii Saorote Cananeeocuru bene aina Simeeoncha siriine.

11Jana Lebi calaohichurute Gereso, Coati, Merari, naaonjoaihunrine.

12Jana Jodaa calaohichurute, Er, Onasi, Sela, Fares, Zara, naaonjoaihunrine. (Ere aina Onasite, jaiti Canaan netiin osichurelu.) Hezron, Hamul, naaojoaihurite Fares calaohichurune.

13Jana Isacar calaohichurute, Tola, Foha, Job, Simroon, naanjoaihunrine.

14Jana Saboloon calaohichurute, Serede, Eloon, Jahleel, naaonjoaihunrine.

15Acaauru jetaote, rai cacunu Dina sirihane choae tacaain Padan-araum netiin, Jacobo aina Learaacha siriinelu. Satiin acaauruacha foeratenojoihurite, quichaauru aina curuaecaain enecuru janijiin, nichata choonca nichatajaaurelu.

16Jana Gada calaohichurute, Zifihon, Haqui, Ezboon, Soni, Eri, Arodi, Areli, naaonjaoihunrine. 17Jana Asere calaohichurute, Imna, Isoha, Isohi, Beriha, naaonjoaihunrine. Jana acaauru baite, Seraneein curuajae. Nii Beriha calaohichurute, Heber, Malquiel, naaonjoaihunrine. 18Acaauru jetaote, Silfa aina Jacobohacha siriichurinelu. Nii Silfa jetaote, rai coseenraneein nihane jana rai cacunu Leara belaihalu Labanne jaa ne. Caje nefoeratenaaneein nenacaauru cachaauru jetaote, itolereneein lechoonca saotaneein neeurelu.

19Rai comasai Raqueri aina Jacobo calaohichurute, Jose, Bejamiin, naaonjoaihunrine. 20Jana rai comasai Asenata aina Jose calaohichurute Manasee, Efaraain, naaonjoaihunrineein Egiptoo nejanoanacaaurunelu. Nii Asenata jetaote, On neseu nenaa saseredote Potifera cacununelu. 21Jana Bejamiin calaohichurute, Bela, Bequeri, Asbeli, Gera, Naaman, Ehin, Rosi, Mupimi, Hupimi, Aredi, naaonjoaihunrine. 22Acaauru jetaote, itolereneein lechoonca jenaain Raqueri aina Jacobohacha foeratenojoineein nenacaaurunelu.

23Jana Husimite, Daan calaohinelu. 24Jana Neftali calaohichurute, Jazeel, Coni, Jezer, Silem, naaonjoaihunrinelu. 25Acaauru jetaote, rai coseenra Bilaa aina Jacobo calaohichurunelu. Nii Bila jetaote, rai coseenraneein nihane jana, rai cacunu Raqueri coseenra nihane coina que belailu Laban. Acaauru foeratenojoihuru jetaote, itolereneein caainsineein neeurelu.

26Satiin nii Egiptoo Jacobo jiniichaain turunacaauru naraaichuru coichana que coichananacaauru cachaauru jetaote, saota choonca saota neeure acaauru calaohichuru, acaauru comasaihuru, naaonjoaihunru janijilanaana. 27Nii Egiptoo neein nejanoanacaauru Jose calaohichuru jetaote, coroatajaelu. Niichuru janijiin jetaote, itolereneein caaunsi chooncaneein nii Egiptoo turuurelu Jacobohacha foerateeuri.

28Nitohaneein cuhin jetaote, inae nichuuntaane jaun, Egiptoo ichoaichaniha rai calaohi Jodaa letoae Jacobo, Jose rai bihane, que tacaain coaraa uha Goseen batane quene coina. Nii jana cuhin, inae Goseen turuuruhane jana jetaote, 29nii cunajaanu cabario que tararaeraain nenaa, rai carreta coaarate rai letono que Jose, cuhane cuhin rai inaca coaraa cuhane coina. Inae nitohaneein cuhin, inae nii inaca aina ita que tacaauruhane jaun jetaote, que nebalurucaain jetao, ecu carajaaojoaain chanae Jose. 30Nitohanihane jana jetaote:

“Inae chuhisi, ijiabereeoneein jaiti oheneeine jana ichoaraanura. Inae laen nainichaaun ohanunera”, nae jetao, nii rai inaca Isaraelineein Cana Coauneraacha curuaatei Jacobo, rai calaohi Jose rai.

31Niritoha raine jana jetaote, satiin rai nejeraauru aina nii inaca foeratenojoineein nenacaauru rai jetao:

“Tane Faraaon coaanite: ‘Canu nejeraauru aina canu inaca araaichuru Canaan ichaonacaaurute, canu aina ichaoha uurera. 32Satiin rai rucuheleeuru, rai bacaauru, carenerocuru, naaojoaihunri uhaainte uurera, acaauru amihaneeon niha nirihuru irilaauruhanene jaunra’, naain rai benite coitucuhinera. 33Chaaen niritiin rai bihanune jana, inara cotijiaain: ‘Chaaquete amihaneeicheta’, naain inara caje bajaa Faraaonne, 34aihuruhalu inara foerateracurune rijijieein carenero irilaaichene que aitocuche raicha. Niritocoiche raine banaachate, caa Goseen batane que neniha Egipto cocoaichane jaau neein ichaohichene coina aitoreein, cocoaeraa Egipto cocoaichacuru rai, carenero irilaeraauru aina ichaooruhane jaunra”, nae jetao nejeraauru aina inaca araaichuru rai Jose, turuuruhane benaa biha Faraaon raine coina.

Currently Selected:

Génesis 46: URA

Highlight

Compare

Copy