Génesis 45

Rai nejeraauru que nocoitucueratiha Josene

1Nii niritoha rai Jodaane jaun jetaote, inae cha abaatana nainenihane jaun jetao: “Chajaain satiin caalai caje amuuche”, naain ehequiin, nii rai cachaauru sitae Jose, acaauru notaracaae rai nejeraauru que nocoitucueratihane coataa.

2Nitohaneein nocoitucuerateein jataain tonijiaain chanaa Josene jana aonajeeuruha Egipto cocoaichacurune jaun jetaote, turuhin biha cuure Faraaon rai.

3Nitohaneein chanaain jetaote:

“Canune Joseneeura. Jaitina ichaojiha cana inaca”, naa nejeraauru raine jana jetaote, jataain nesoonetooruhane jaun jetao, nii tonaain tonoraauruhane jaa coitucuurene nii nejeraauru. 4Nii jana jetaote, acaauru rai:

“Chajaauchete atiin carohan nichuuntaera”, naa acaauru rai Josene jaun, rohan nichuuntaauruhane jana jetaote:

“Canu inara nejera Jose nichaaunne quetejia, Egiptoo cocoaichacuru rai necoreteeichelura. 5Nete atiin naineneeiche caque necoreteeichelune coreniha inara raajenihane nererojoecaain obaaequichenera. Cana Coaunerate inara ichoaichaniha cajiha caletoaelu, onaa caje cachaauru ichoteratichaaunne coinara. 6Inae coroata jaanacaain satiin caa atane sacuritaain niha mijitenara. Nii saijieeinte jaiti lanae saoqui jaanacaaincha. Nii temuera temulene nihanatiin coatiha omarorihaainta. 7Nete bainejeri inara ajiniha caletoaelu Cana Coaunera, niicha icharateeineein onaa caje inara ichoteratichaaunne caa cana rai chauratane que nenaa nainiha inara nefoeratene coinara.

8Nitohaneein cajiha caletoaa Cana Coaunerane jaunne, cajiha turuhin neeunlura. Coatiha inara letoanojoineein cajiha uhaaunluta. Acate, Faraaoncha ichanenu beein, rai loreri beraichaneein satiin Egiptoo curuaanaaneein nihanune coina caletoaelura. 9Chajaain erojoeein cauhin, inae cana inaca rene turuhichene: ‘Cana Coaunerate, catohaneein Egiptoo curuaanaaneein nihanune coina caeteein ne. Chajaain caeneenejelanaala turuhin cacoharaa uura. 10Goseen batane quete, satiin ii bereecuru, ii ichoalacuru, satiin ii irihuru, satiin iicha sirichuri, naaonjoaihunru aina jiniiquiin ichaoriquiincha. Nitohaneein canu rohan neeinene, 11cau ichei lenone tereeunni, satiin ii araaichuru, satiin iniha nenacaauru, naaonjoaihunri raine maajeein, nabana inara rai lanaain niha chane coataara. Jaitite saoqui jaanacaain niha cureein mijitenara’, naain beeuche, 12satiin caa canu ocoala Bejamiin aina, caa aitocoaaunne jaa beeuche Ofa rai, esenetaane coinara. 13Chaaen catohaneein itolereneein Egiptoo curuaanaaneein nihanune beein, satiin cau inaraacha coarai beeuche cana inaca raicha. Chajaain erojoeein cuhin nii cana inaca ranichuchera”, naain jetaote, 14nii rai nocoala Bejamiin mucuhin chanaa Josene jaun jetao, ecu jiniiquiin ita mucuhin chanaaure Bejamiin aina. 15Nii baiha jetaote, satiin nii rai nejeraauru mucuhin, acaauru meri lioracaane jaun jetao, ecu jiniiquiin ita mucuhin chanaaure nejeraauru aina Jose. Nitohaneeuruhane baiha jetaote, inae acaauru nejeranihane coitucuhin, coasichuruhane baiha jaacoaain satiin raotojoeein rai ereeure nejeraauru.

16Nii jana nitohaneein Jose rene turuuruha nii rai nejeraaurune beeuruha Faraaon raine jaun jetaote, coitucuhin que jauriichuruneein nenacaauru aina jiniiquiin coroaenajae Faraaon. 17Nitohaneein coroaenajaain jetaote:

“Chajaain taa inejeraauru rai aitoote, nii cabario rijijieein nenaa acaauru rai asno ichoae rai rucuhele teein jelaiha Canaan cauhin, 18naraaichuru aina jiniiquiin carai nii inara inaca uhaurumiincha. Canune caa Egiptoo leeochaauru amurijiriin nenaa atane caohacha teein, itolere lenone caohachaaurune maajeein tereeunnicha. 19Chaaen acaauru rai aitoote, caa Egiptoo caje cabario que tararaeraain nenaa carretacuru amaauruhine, cuhane rai bereecuru, comasaihuru, naaojoaihunri uhaain, inara inacane maajeein uhaauruhane coinara. 20Jiaonriha nii chaque tonajeein uuruha acaauruacha sirii rucuhele quenera. Satiin caa Egiptoo itolere caohachaain nenacaaurute, acaauru raineein nereeincha”, naain beratiha Jose que Faraaonne jaun jetaote, 21nii aitoha Faraaonne rijijieein, jelaiha cauha cuuruha nii Isaraelineein Cana Coauneraacha curuaatei Jacobo calaohichurune coina jetao, acaauru rai cabario que tararaeraain nenaa carretacuru teein, bero cuhane cuujueein acaauru lenonene maajeein teein jetao, 22enachasine cajionene maajeein te necoreteeuruha nejeraaurune jaanu que Jose.

Ne jetaote laen, nii rai nocoala Bejamiin rai nichata fasha monedani plata caje nenaa coriquine maajeein teein jetao, saoqui cajionineein cajione que belai.

23Jana inaca rai jetaote, Egiptoo jataain rucuhele caohachaneein nenaa letoae, lechooncaain cabario rijijieein nenaa asnooru ichoae teein. Jerichanejeein jetaotechu, lechooncaain asnooru ichoae tirico, faan, lenone, naaonjoaihunri letoae, bero cuhane uujueein acaauru inacaacha quiinenu que.

24Nitohaneein itolereeuru teein jetaote:

“Jiaonriha bero cuhane cuujueein ita cotaaichenera”, naain nejeraauru rai nocoiha Josene jana jetaote, inae jelai caje amuure.

25Nitohaneein nii Egiptoo caje amuhin jetaote, nirijieein cuujueein nii niha acaauru inaca Jacobone jaau Canaan turuha cuure. 26Ecu turuhin jetaote, jaiti ichaoha Josene beein jetao, nii aitoroatihane rijitojoeein aca nii Egiptoo curuaanaaneein nihane beeuruha acaauru inaca Jacobo raine jana jetaote, nii aitocuruhane esenetaelanaala nii tonaain acaauru tonoraane jaa coitucuene. 27Ne jetaote, nii acaauru rai aitoha Josene beeuruhane jana, acaauru esenetaenihane baiha, nii niicha letoai carretacuru coaraain, inae esenetaain jataain rachoojoeein jetao: 28“Jataainne rachoojoeeun, jaiti ichaoha canu calaohi Josene coitucuhanune jaun. Nii jaunne osichaaunne ajiniha coaraa cureeunra”, nae jetao nii acaauru inaca Jacobo.

Currently Selected:

Génesis 45: URA

Highlight

Compare

Copy