Génesis 44

Acau coha Josene jaa coata coreti caje nenaa

1Nitohaneein, rai nejeraauru aina jiniiquiin lenonihane baiha jetaote:

“Caa cachaauru rai, amanaa nainecuruhane jeeoneein acaauru costaro nemoaau tirico que. Chaaen nii le cacha cachaauru rai costaro cuhane nii tirico coretecuruhane jaa coriqui teeu. 2Chaaen jataain acaauru ocoala costaro cuhane nii acau cohanune jaa coata coreti caje nenaa aina jiniiquiin nii tirico coretihane jaa coriqui teeu raicha”, naa rai Josene jaun jetaote, nii rai aitoha Josene rijijieein jetao acaauru rai costaro nemoae tirico que nii loreri beraicha.

3Nitohaneein acaauru rai tirico terateein jetaote, janohetiin jaiti ena mituhajiha enotone jana jetao, amuuruha nii rai nejeraauru, acaauru rai cabario rijijieein nenaa asno amaaine coina letoanajae Jose. 4Nitohaneein letoanajaane jaun, inae jelai caje amuhin, nii nese caje jaiti coriae cuurenihane jana jetaote, rai loreri beraicha rai jetao:

“Chajaain taa cachaauru sacuhin, erunajaaine jaaun acaauru rai: ‘Chanuna jataain baaso ichaquiche, caohachaain inara raacaanu natiin, chaelai coujueluhinaain acau cohin naaonjoaan 5canu fatoroon Josene jaa coata caje nenaa basijiauhinta’, naaun acaauru raicha”, naain jetao nii rai loreri beraicha letoae Jose.

6Nii jaun cuhin erunajaain, nii rai aitiin letoaa Josene rijitojoeein acaauru rai aitoha nii loreri beraichane jaun jetaote:

7“Chatohanihacaanu naate, niritocojoaain canacaanu rai ereei. Inasiina chariji bana nitohanai ichacaanune coaalanaala, nitohanai icharihacaanu. 8Canaan caje coaauneein canacaanu rai costaro cuhane canacaanuhacha erui coriqui cainaa uhacaanu natiin, inasiina, ii fatoroon loreri caje nii coata coreti oro naaonjoai basijiauhacaanune coaalanaala niritiin erereei canacaanu rai. 9Coaraain ohine chunucoha caa ii cachanichaanune nii acau cohane jaa coata coreti caje nenaa siricha. Chaennechu nii choae tacaain, nii coreniha satiin ii cachaneein nerichaanuhincha”, naauruhane jaun jetaote:

10“Nii aitocoichene rijijieeinne chujian ichareeunnicha. Nete laen, nii acau conajaaoncane jaa siricha jelai canu cachaneein nereeincha. Jana inara, coatiha cha ujuaihoneein neriheeicheeinta”, naa acaauru rai nii loreri beraichane jaun jetaote, 11nii rijieeoritiin atane choae rai costalo fauhacoaaure jetao, joracaain coaraa nii loreri beraichane coina. 12Nitohaneein jetaote, nii acaauru ajicha costalo que nunuheteein, jataain acaauru ocoala costalo que satono teein coaraa nii loreri beraichane jana jetaote, nii acaauru macosi Bejamiin costalo cuhane nii acau conajaaocane jaa eruhane jaun jetao, 13jataain nererojoecaauruhane coujunacane que jetao rai cajione romaromaaure. Nii baiha jetaote, nii cabario rijijieein acaauru rai nenaa asno ichoae acaauru rai costalo tihacoaain jetao, nacoaauneein jelaiha nejenohin nii neseu cuure. 14-15Nitohaneein jetaote, rai nenajaun acaauru cohaca Josene jana cuhin, inae rene turuuruhane jana:

“Taana enaacha cha coitucunaa inaera cacha nichaaunne coitucuhichenete, catohaneein caque asiin canu basijiauhiche”, naa acaauru rai Josene jana jetaote, atane que nauri turuanacanejeein nacatiha nenoracaaure, que suujua acatecuruhane coaaratiha Jodaa aina rai nejeraauru.

Nitohaneein jetaote nii Jose rai:

16“Coatiha tonaain ii tonoracaanune jaa coitucuhaacaanu. Charijieeinchatejian nii ujuaihoneein nenihacaanune jaa coitucuhi. Nete Cana Coaunera jerihane canacaanu osa coreniha catohaneein canacaanu cairichacaihara. Nocoa inae nii acau conajaaoquine jaa siricha aina jiniiquiin ii cachaneein nihacaanune coina cau nihacaanura”, naa Jodaane jana jetaote:

17“Aihei bajiaa. Acaihaniji nii acau cohanune jaa sirichate, canu cachaneein nereeincha. Inarate nainequiche chaque tonajelanaala inara inaca loreri asae cauha cuhichenera. Coatiha nerihaain inara rerohecaera”, nae jetao acaauru rai Jose.

Bejamiin coreniha iriha Jodaane

18Niritoha acaauru rai Josene jaun jetaote, rohan nichuutaain jetao:

“Aonaaune ichei asinojoineein caa que aitera curuaanaa. Jiaonriha atiin caniha obaaequinera. Iite jerichanejeein aiha Faraaonne rijijieein nenaa neeicha. Nena atiin ichei aitoreeunnicha. 19Iite canacaanu caje, niha canacaanu inacane bajaain, niha canacaanu nejerane maajeein bajaailu. Nii jaunna: 20‘Niha canacaanu inaca jataain biinaanetiincha. Chaentechu ne, jataain binaaniha canacaanu inacane jana nejanoanaa canacaanu ocoalara. Nete laen ainaacha nihane jereein ne canacaanu inaca, inae ohalu rai najichane jaun, leinjiin acaacha ita neba que nebateein niicha siriineein nihane jaun’, naain bihacaanulu ii rai. 21Nii janate, aitohilu jataain coitucunaa jereeine jaun, uhacaanune coina. 22Nii janane: ‘Coatiha nii canacaanu inaca ratiriin chunijiun cunaa nainihei nii canacaanu ocoala, coinaderanaa caaun oha canacaanu inacane coataara’, naain bihacaanulu. 23Nii janate: ‘Jiaonriha nii inara ocoala colane canu rene turuhichene. Colane nacoaauneein canu rene turuhichene, coatiha inara rai cha terihaaunnita’, naailu canacaanu rai.

24Niritohi canacaanu raine jaunna, nii aitohine rijitojoeein turuhin bihacaanulu canacaanu inaca rai. Nete nii baiha nacoaauneein: 25‘Chajaain nacoaauneein cana rai tirico coretenihuchera’, naain canacaanu letoaane janane: 26‘Coatiha nii canacaanu aina uheniha nii canacaanu ocoalane, nii curuaanaa coaraa cunaa nainihahacaanu’, naacaanu raine janate: 27‘Inarate, raotojoeein coitucuhiche, canu comasai Raqueri aina coroatajaain calaohichaaunlune. 28Nii jana leinjiinte inae nitajelu. Nii jaun enanetojoeein coatiha nii coaarihaaun. Jerihane necha aansai taebinaete ateinaain itajecaihalu. 29Aihana jaun, ena cacaje caa leinjiin caniha nenaa canu calaohi amaaichene jana, chatohaneein nihanena, canu inara inaca nichaaunne inaderanaa caaun ohanunete, inara nii ujuaihoneein neriquicheeincha’, naelu canacaanu rai, canacaanu inaca.

30Aihana jaun nii canacaanu ocoala colane cauha cunaa nainihacaanu, ainaacha ita rohan neein ichaonaa jeriha nii canacaanu inacane jaun. Nitohanihane jaun, colane cauha cuhacaanune coaraanete, 31coinaderanaa caaun oreein nii canacaanu inaca. Aihana jaun, nitohaneein coinaderanaa caaun oha nii canacaanu inaca biinaane, canacaanu nii ujuaihoneein nerichaanuhincha. 32Chaennechu canu inaca rai aitoonlu, caohachaain caa canaanai beraain uhanune coina. Niritiinne rai: ‘Jelaiha ichei caa canaanai cainaenihanunena, chabana satonoelanaala nii ujuaihoneein nereeunnicha’, naaunlu canacaanu inaca raicha.

33Nii jaunne ichei aitoon, caa canaanai coreeraniha ii cachaneein nihanune coinara. Atiin jianeeute, caa canacaanu nejeraauru aina jiniiquiin cauha cuhinera. 34Inasiine jelaiha canu inaca rene cauha cureeun, canu aina uriha caa canaanaine coaalanaalata. Coatiha coinaderanaa caaun chatohaneein necairichaa canu inacane coaana jerichaaunne coaalanaalata”, nae jetao Jose rai Jodaa.

Currently Selected:

Génesis 44: URA

Highlight

Compare

Copy