Génesis 43

Egiptoo Bejamiin amaauruha rai nihanacurune

1Nitohaneein nii Canaan batane sacuritaain jataain nauruta naurutaain sacuha mijitenane jaun jetaote, 2nii Egipto caje coreteein nicha amaauri tirico cauteecha que rai calaohichuru aina lenoneein nihane jaun jetao:

“Chajaain nacoaauneein cana rai tirico coretenihuchera”, naa rai calaohichuru rai Jacobone jaun jetaote:

3“Nete: ‘Jiaonriha inara ocoala uhaeneeichene, turuhin cacoharaaichenera’, naelu canacaanu rai nii jelai batane curuaanaaneein nenaa cachara. 4Nii jaunna, nainenihacaanu canacaanu ocoala colane cuhacaanunera. Canacaanu aina letoaine banaachane cana rai tirico coretiha cunaa nainichaanura. 5Jana, canacaanu aina letoanaa jereneeine, coatiha curihaacaanuhinta: ‘Jiaonriha inara ocoala uhaeneeichene turuhin cacoharaaichenera’, naalu nii jelai curuaanaaneein nenaa cacha natiinta”, naa Jodaane jaun jetaote:

6“Chaanate nii cacha rai, niha leinjiin inara ocoalane beein, jataain canu cairichaaicheta”, naa nii Isaraelineein Cana Coauneraacha curuaatei Jacobone jaun jetaote:

7“Inasiicha chujian, jataain cana coitucunaa jereein cana araaichurune maajeein bajaain: ‘Ichaaojoihana jaiti inara inaca. Nihana jana caa baiha leeocha inara ocoala’, naain bajaane jana: ‘Niha chujian canacaanu inaca aina canacaanu ocoalara’, naain tonoracaanune baiha: ‘Cajiha nii inara ocoala uhaauche caraicha’, nerichaain nii cachane coitucuhacaanune coaalanaala, inasiine, ‘naaine tonorarichaanuhincha’, naain coitucurichaanuta”, naaure jetao nii inaca rai.

8Niritiin jetaote: “Chajaaincha caniha nii canaanai letoaaune canu beraain amae, ichaohacachene jereeinera. Aihane chajaain ena amuhacaanura. Nitohanihane coatiha orihaacacheein. Nii ii nihanatiin oriheeinnita. Niheichu canacaanu nihanatiin, canacaanu bereecuru aina orihaacaanuhin mijitena caaun. 9Canu que chatohaneein nihane, nii ruhacarateeura. Jerichanejeein, cau jelaiha ii rene turuaenihanune canu chabana satonoelanaala nii ujuaihoneein nereeunnicha. 10Letoanaa jereneeine jaun cau carajaacaanune colane, inae coroata saain cuhin, turuhin, naaonjoarichaanura”, naa inaca Isaraele rai Jodaane jaun jetaote:

11“Aihachuhisi esinae. Nihei nenacaaen canaacha ichanenu. Chajaain nii cacha belaaichene jaanu que caa cana atane que caohatiin teeurera caje jujui ichanohineein nenaa balsamo, irichaje, mirra sacari caje ichanohichuru meetooncuru, nucuhe que quinacaineein nenacaauru enuha inaa almendrooru, chaaen leeochaauru nucuhe que quinacaineein nenacaauru enuha inaacuru noesichuru, naaonjoaihunri amaain cunichuche.

12Chaaen nii inara rai cainacuruhalune jeeo amurijiriin coroata saain jelai jeeoneein nii coriqui amaain inara raajenihane nii coriqui teeuche. Jerihanete coitucuelanaala teeurucaihalu. 13Nocoa inara ocoala. Chajaain amaain, nacoaauneein nii cacha coaanihuche. 14Itolere ichana naineraneein nenaa Cana Coaunera, cairichaaojoaain inara coaraain inara coroatajanemiin, nabana chatohaneeuruha Simeeon aina Bejamiinne coataara. Nena laen chatohaneeuruhane, leinjiinniji canu calaohichuru colane nereeunnicha”, nae jetao nii acaauru inaca Jacobo.

15Niritiin acaauru letoaa acaauru inacane jaun jetaote, coroata saain jelai jeeoneein nii coriqui amaain jetao, belaihuruhane jaane maajeein amaain, acaauru nejera Bejamiin amaain Egiptoo cuure nii Jacobo calaohichuru.

Inae nitohaneein cuhin Egiptoo Jose rene turuuruhane jana jetaote, 16acaauru aina niha nii rai nocoala Bejamiinne coaraane jaun jetao, rai loreri beraicha rai:

“Canu loreri asae caa cachaauru amaau. Chaaen leinjiin baca sohin caohatiin enoalaaute, enoto chujutaain canu aina lenonecurumiin caa cachaaurura”, naain jetao rai loreri beraicha letoae Jose.

17Nii jaun jetaote, nii rai aitiin letoaa Josene rijijieein jetao, acaauru aina jiniiquiin cuhin jetao, Jose loreri asae amanajae nii loreri beraicha. 18Ne jetaote, nii Jose loreri asae amanajaane jaun, jataain nesoonetooruhane jaun jetao:

“Nechu jataain cana cairichaate jerihane, caa loreri asae cana uhaeratecaiha, taolu cana rai niicha cainacuri coriqui coreniha cana mucuhin cana rai cana unaja asnooru aina jiniiquiin, rai cachaneein cana teein cana amiharatihane coinara”, naaure jetao ita rai.

19Niritiin coaaucuruhane jaun jetaote, inae nii loreri catainaauruhane jaun jetao, nii loreri beraicha rohan nichuutaain jetao:

20“Curuaanaa, taolu jauriaanejeein tirico coretiha uhacaanune banate coreteein cauhacaanune jana, 21inae nesurucaanune jaau turuhacaanune jana, nii canacaanu rai costaro ichora batujiin joaracaain coaracaanune jana, le cacha nichaanune jaa costaro cuhane nihacoae nii coretichaanulune jaa coriqui, jerichanejeein nii tihacaanune jeeoneein. Nii jaunne ena cau uhacaanu, jelaiha cainacaanune coina. 22Chaennechu nii choae tacaain coriqui uhacaanu, que tirico coretichaanune coina. Nena nii canacaanu rai costaro cuhane nii coriqui tera coitucuenihacaanu”, naauruha nii acaauru amaera loreri beraicha raine jaun jetaote:

23“Saan, aihanaate. Coa que tonajihache. Inae nii coriqui tirico coretequichelune jaa raanulu. Chaque tonajelanaala raotojoeein neeuche. Inara inaca aina inara Coaunerate, nii costaro cuhane nii coriqui tecaihalu”, naane baiha jetaote, caresero caje acaauru nejera Simeeon uhaeratihane jana jetaote, inae acaauru rene nii Simeoon turuaane jana 24nii Jose loreri asae jitariin enoanajaain jetao tijiaauru culeecuruhane jaanu que esinaaeca te nii loreri beraicha. Nitohaneein jetaote, nii acaauru irihuru cabario rijijieein nenacaauru asnoorune maajeein coroaate.

25Nii jana jetaote, enoto chujutaain turuha cuha Josene cohanacanejeein que belaihuruhane jaanu que nii niicha uhaauri rucujueein jetao cohacure nii rai nejeraauru, acaauru aina enoto chujutaain lenoniha cuhane coitucuuruhane jaun.

26Nitohaneein inae rai loreri asae turuha uha Josene jana jetaote, nacatiha atane que nauri turuanacanejeein nenoracaauruhane baiha jetao, nii belaihuruhane jaanu que niicha uhaauri teeure Jose rai.

27Nitohaneeuruhane jana jetaote, acaauru rai jetao:

“Chatohaneein neeicheta. Chatohaniha jana inara inaca biinaa taolu carai aitocoichelune jaata. Jaitina enanetojoeein ichaaojoiha”, naain acaauru caje bajaa Josene jana jetaote:

28“Eejeen. Jaitite laraajiin raurohin enanetojoeein ichaaojoe nii ii cacha canacaanu inacara”, naauruha, que suujua acatecuruhane coaarateeine jana, 29rohan nenacaauru coaraane jana, ecu niha neba que nebaain inaca que inacaain nenaa rai nocoala Bejamiinne coaraain jetaote:

“Caana taolu carai aitocoichene jaa inara ocoala nihate”, naain jetao: “Raotojoeein neeine coina ichorataanemiin Cana Coaunerara, canaanai”, naa rai nocoala Bejamiin coaraain Josene jana, 30jataain cunaain tacaa rai suujua cuhanena jaun jetaote, soroneein rai nucuha cuhane enohin chanaa cue Jose.

31Nitohaneein inae chanaane jianeein suujua nunaane jaun jetaote, nomeri culejeein mituhin jetao: “Chajaain lenone lauriaauchena lenonichaanu”, naa Josene jaun jetao, 32jelai teein rori ichoae Jose rai lenone lauriaain jetao, nii Jose nejeraauru Jacobo calaohichuru raine maajeein jetao jelai teein nii lenone lauriaaure. Jerichanejeein jetaote, nii Jose aina lenoneein nenacaauru Egiptoo cocoaichacuru coroaateeure jelai teein, cocoaeraa ebereeo cocoaichacuru aina lenonecuruha Egipto cocoaichacurune jaun.

33Nitohaneein jetaote, acaauru ajicha que nunuheteein acaauru lauriaain, que jauhequiin que jaurii lauriaain nirijieein cuaajeein jataain acaauru ocoala lauriaa acaauru satononiha Josene jaun jetao, jataain cojoelatiin, cajanaain ita coaracure, acaauru ajicha que nunuheteein ita que jauriinecuruhane lauriaa Josene jaun.

34Nitohaneein laurianajaain jetaote, nii niicha sirii lenone que rai teratenajaain jetao, jataain leeochaauru rai tihane amuritoheriin jetao Bejamiin rai te Jose. Nitohaneein jetaote, nejeraauru aina jiniiquiin lenoneein acau cohin, rai nejeraauru aina jiniiquiin jataain rachoojoe Jose.

Currently Selected:

Génesis 43: URA

Highlight

Compare

Copy