Génesis 42

Egiptoo cuuruha Jose nejeraaurune

1Nitohaneein neniha quinacaine jana, Egiptoo niha tiricone coitucuuriin jetaote: “Chana caeneein ichaquiche, itaacha cojoelaain. 2Canu raite: ‘Egiptoo jete ne tirico’, naain beeure. Chajaain ucuae cuhin tirico coretenihuchete, que lenoneein ichaohacachera”, naain jetao calaohichuru letoae Jacobo.

3Nii jaun jetaote, niritiin acaauru letoaa acaauru inacane jaun, Egiptoo tirico coretiha cuure jetao nii lechooncaain nenacaauru Jose nejeraauru. 4Ne jetaote laen cuha nii Jose que jauriineein nenaa rai nocoala Bejamiinne jerene acaauru inaca Jacobo, charijieenniji bero cuhane chatohanihane coataa. 5Nitohaneein jetaote, leeochaauru netonoai nii Egiptoo tirico coretiha cunacaauru jiniichaain cuhin jetao Egiptoo tirico coretiha cuure jetao, nii Isaraele calaohichuru, itolereneein Canaan batane sacuritaain neniha quinacaine jaun.

6Jana Jose jetaote, nii Egipto batane curuaanaaneein jetao nii itolere atane caje turunacaauru cachaauru rai tirico que necoreteraneein ne.

Nitohaneein cuhin jetaote, nii Jose acatiha turuhin, nitohaniha acaauru ichaone jaun jetao, que suujua acatecuruhane coaaratiha atane que nauri turuanacanejeein nenoracaaure nii rai nejeraauru.

7Nii jana jetaote, coaranaacane rijieeoritiin rai nejeraneuruane coitucue jetao Jose. Ne jetaote, acaauru coitucuhi rijitojoeein, nechu jataain acaauru cotaicha rijitojoeein jetao:

“Chaa cajete uhiche inarata. Chate latequicheta”, naain acaauru caje bajaane jaun jetaote:

“Canacaanune Canaan caje uhacaanu, tirico coretichaanune coinara”, naaure jetao rai.

8Nitohaneein raotojoeein nejeraneuruhane coitucuha Jose natiin jetaote, nii coitucuurene rai nejeraauru. 9Nii jaun jetaote, nii acaauru que sinihocalune coacuhin jetao:

“Nohaneeiche bajiaara. Inarate, nechu jataain, ‘Chaelooncha nainere sonaana que enonaata’, naain caa atane coaraain coitucuhichene coina letono neeichera”, naa acaauru rai Josene jaun jetaote:

10“Coatiha esinae rauhijiriin aiheita, curuaanaa. Canacaanune ii cachaneein, ii caje tirico coretiha uhacaanura. 11Satiin canacaanune caohacha cachaneein, ita inaca que inacaain ita nejeraneein nihacaanura. Coatiha nii chatohanei letononeein, cha coaaraneein uhahacaanuta”, naauruhane jaun jetaote:

12“Nohaneeiche canu coritaara. Inarate, ‘Chaelooncha nainere sonaana que enonaata’, naain caa atane coitucuhichene coina letono neeichera”, naain conujuenajaa Josene jana jetaote:

13“Acanihahacaanuta. Esinae rauhijiriin, caa lechoonca coroatajai ita nejeraneein ii cachanichaanu nena ita inaca que inacaain Canaan ichaohacaanura. Jataain canacaanu ocoalaneein nenaate canacaanu inaca aina nedaera. Jana leeocha canacaanu nejerate laen inae canacaanu aina nenera”, naaure jetao nii Joseecha que, acanihane coitucuurenihane jaun.

14Niritocuruha raine jana jetaote, nacoaauneein acaauru rai jetao: “Aihei bajiaata. Caa inara rai aitocoaaunne tocohaneeinte, caa atane coaaraneein caa turuhichera. 15Caa inara rai aitocoaaunne coitucunaa reentiaain, Faraaon coreniha, coatiha caalai caje mituriheeicheein, cau turuha nii inara ocoalane reentiaainta. 16Chajaain inara caje chunucoha letoaauchete cotijiaain raa cuhinera. Jana inarate tonohanau caseteconeein nedariquicheeincha. Aihate esinae rauhijiriin erenaaniha nii aitocoichene jaa coitucuhacachera. Jana esinae erenaa nenihanete, nechu jataain letononeein atane coitucuhichene coina turunaa neriquicheein, Faraaon corenihane caa aitoonra”, nae jetao acaauru rai Jose.

17Niritiin caseteconeein jitariin sirinaacane baiha jetaote, 18nichata janone cuhane jetao:

“Cana Coaunera quene casuujua acateeun canura. Aihana jaun, caa inara rai aitocoaaunne tonoraain, 19esinae rauhijiriin caohacha cacha nequichene, cau caresero cuhane leinjiin inara nejera ratirihuchena inara ichotera. Aihate tirico amaain cauha cuhichene, que lenoneein ichaaoruhine, inara nenajaun nenacaauru, inara araaichuru, naaonjoaihunricha. 20Chaaen carai nii inara ocoala uhaauche, esinae rauhijiriin aitocoichene coitucuhanune coinara. Uhaeneeichenete esinae rauhijiriin oriquicheeincha”, naa acaauru rai Josene jaun jetaote, nii aitoha acaauru raine rijijieein jerecure.

21Ne jetaote, ecu ita rai nejesinajeein jetao:

“Esinae rauhijiriinte chuhisi, jataain baaso ichacaachelu cana nejera raicha, ‘Cairichaaojoaain cacoaraauchera’, naain inaderaane coaracaachene niha natiin, nii nere tonoraelanaalara. Nii corenihate, caa ena necairichaacachera”, naauruhane jana jetaote:

22“Inara chujiara, ‘Jiaonriha nii chatohaneein nii canaanai teeichenera’, naanune sainejeein quere tonoraelanaala nitohaneein teeicheluna. Nii ateinaaichene corenihate, caa ena necairichaacachera”, nae jetao aonajiha Josene jana acaauru nejera Robeen, 23leeocha cacha que nere amuurateein acaauru rai ereereeca Josene jaun, nii acaauru ere aonaa Josene coitucuurenihane jaun.

24Niritocuruhane aonaane jaun jetaote, acaauru caje amuhin jetao chanaa cue Jose. Nii baiha jetaote, inae nacoaauneein erenaa nainihane jaun jetao, acaauru rene turuhin, jelai Simeeon cotijiaain amaain jetao, coarajeeuruha nii rai nejeraaurune notaracae teein jetao ichoharate. 25Nitohaneein ichoharatihane baiha jetaote, tirico que acaauru rai costaro nemoaerateein jetao, le cacha cachaauru rai jelaiha coriqui cainaauruha nii costaro cuhane teeinne coina aitohane jaun jetao, jitariin nii costaro nemoaain, bero cuhane cuujueein acaauruacha quihurine maajeein jetao teeure.

26Nitohaneein acaauru rai teeuruhane jaun jetaote, acaauru rai cabario rijijieein nenacaauru asnooru ichoae nii rai tirico teein jetao jelai caje amuure.

27Inae sinihuruhane coina nesurucuruhane jaau turuhin rai asno coroatihane coina, costaro ichora batujiin joaraacaain coaraa leinjiinne jana jetaote, nii costaro cuhane jetao ne nii tirico coretihane jaa coriqui. 28Nii jaun jetaote, rai nejeraauru rai:

“Cha catohane. Jelaiha chujiara canu coriqui cainacure. Chajaauchetejian coaraera. Nocoa canu costaro cuhanera”, naa rai nejeraauru raine jaun jetaote, satiin jataain nesoone caaun chatatajaneein jetao:

“Chaque laen nerurujuarichaacheein, catohaneein cana tiha Cana Coaunerane jaunta”, naaure jetao ecu ita rai.

29Nitohaneein cuhin, inae Canaan turuhin jetaote, nii acaauru inaca Jacobo rai jetao jitariin nii namunajau acaauruacha coaracuri beein jetao:

30“Caa lenone coretiha cuhacaanune jaau jelai batane curuaanaate, canacaanu cotaicha rijitiin, ‘Rai natane coaaranu que jene jerihane letononeein aihacaanu’, nae. 31Nii jaunna: ‘Nena chabana nitohaneein letononeein atane coaaraneein amihanihacaanu. Canacaanune caohacha cachaneein 32ita inaca que inacaain ita nejeraneein lechoonca coroatajaacaanu. Leinjiinte, inae canacaanu aina nene. Jataain canacaanu ocoalane, canacaanu inaca aina Canaan nedaera’, naacaanu. Nii jaunte: 33‘Chajaain aihane esinae rauhijiriin cacha caohachaneein inara suujua coaaraneein neinequichene, cau canu aina leinjiin inara nejera ratiriin, inara aina nenacaauru, inara araaichuru, naaonjoaihuri rai tirico amaain caunichuchera. 34Nete laen, carai nii inara ocoala turuaa uhichene caohachaera. Nii banaachane esinae rauhijiriin caohachaain suujua coaraaneein, atane coaaraneein letononeein aiheeinchene coitucuhanune, inara nejera jianereeunnicha. Nenacaaentejia nitohanihane raotojoeein caa atane que amunaa naineriquicheeincha’, nae canacaanu raicha”, naain jetao inaca rai beeure.

35Inae nitohaneein turuuruha rai nenajaune jaun, acaauruacha uhai lenonecuru curu costaro berotecuruhane jana jetaote, le cacha cachauru rai costaro cuhane niha coriquine coaracure nii Jose nejeraauru. Nitohaneein acaauru costarocuru cuhane niha coriquine coaraain jetaote, rai inaca aina jiniiquiin jetao jataain nesoonetoore. 36Nii jaun jetaote:

“Inarate, inae jitariin cacaje cacoerejeeuru rulunaa jeriquichera. Inae Jose netonai caniha niheita, nii Simeeon nihanatiinta. Nii sainejeeinte ena cacaje Bejamiin amanaa jeriquichera. Canune nii coreniha jataain necairichanaa abaantareeunnicha”, nae acaauru inaca Jacobo. Niritoha acaauru rai acaauru inacane jana jetaote:

37“Atiin inae nacoaauneein cuhacaanune bana canu bijiu caa Bejamiin jianeeune amaera Ofa. Jerichanejeein raurohine ii rene turuaa ureeunnicha. Caa ichei aitocoaaunne sainejeein turuaenihanune, taa coroatajai canu calaohichuru sohin jaoora”, naa inaca Jacobo rai Robeenne jana jetaote:

38“Jiaohine. Aihei bajiaata. Coatiha inara aina uha canu calaohine jerihaaun, inae oha rai nejera Josene jaun, leinjiin acaacha caniha nihane jaunta. Chaaen bero cuhane chatohaneein nihane inaderanaa caaun ohanune, inarate nii ujuaihoneein neriquicheeincha”, nae jetao calaohichuru rai Jacobo.

Currently Selected:

Génesis 42: URA

Highlight

Compare

Copy