Génesis 41

Faraaon sini anuu biha Josene

1Inae coroata jaanacaain caresero caje mituha nii Faraaon rai conacai terane baiha catiaain jetaote, sinicoe Faraaon. Nitohaneein sinihocane jana jetaote, sinihu leinjiin nucuhe Nilo auhaniha chujuhecohane jana jetao, 2nii nucuhe caje mituhin jetao jiarana nujua asae nenaa omane quihure jetao caainsineein coerenetonanaain caohatonanai bacaauru. 3Nii jana jetaote, nii coerenetonanaain caohatonanai bacaauru rohaan jetao, nii nucuhe caje mituhin jetao nucuhe auhaniha neeure jetao caainsineein jarejeerihanaain jataain baasoneenanai bacaauru. 4Nii caainsineein jarejeerihanaain baasoneenanaain mitunacaauru bacaauru jetaote, nii caainsineein coerenetonanaain caohatonanaain ichoaichaniha mitunacaauru bacaauru quihure.

Niritiin sinihocane caje nocohane baiha 5nacoaauneein sinihane jana jetaote, nacoaauneein sinihu le nujuajeeincha caje jetao caainsi tijirineein omarohin jetao caohatonanaain inacae tabaanai ucujeein tirico. 6Nii caohatiin inaana rohan, caainsi tijirineein inaana tirico jetaote ohacoae, ateinaa enoto mitu nichajai caje unaa cujuanane jaun. 7Nii caainsi tijirineein onacaauru jetaote, nii caainsi tijirineein tabaanai ucujueein caohatonanaain nenacaauru quihure, Faraaon sinihu.

Niritoha sinine caje nocohin jetaote, sinihu aitohane que jetao nainae Faraaon. 8Nii cojoanoo janone jetaote, jataain nii sini que coaaucane jaun jetao, satiin Egipto caje uuruha cha coujoeluhinaain cha coitucuurerane coina cotiharatenajae nii Faraaon, rai nii sini anuu beeuruhane coina. Nii jana, inae turuuruhane jana acaauru rai nii sini biha Faraaonne jana jetaote, nii sini anuu coitucuhin: “Naaonjoaain coinate niritiin sinihoquicha”, naain jetao coitucusichurene nii chunicohacuru.

9Nitohaneein coitucusichurenihane que nainaain jetaote, Faraaon rene turuhin jetao:

“Enaacha nechu baaso ichacaaunlune coacuhin que nainaaunra. 10Ii canacaanu Faraaonneeine taolu faan icharaauru curuaanaa aina caa ii letononeein neinichaaunne que nejerateein coaridiaauru curuaanaa cafitaan rai caresero cuhane nii coroatajainichaanune enoaerateeine banane, 11nii caresero cuhane neein sinihocaanulura. Nii faan icharaauru curuaanaate jelai teein sinique. Nii janana canuhetonai jelai teein sinicoonra. Nii jelai teein sinihocaanune jaate, rai nanuu siricha.

12Nii janate ecu canacaanu aina ne leinjiin enamanaa coaridiaauru curuaanaa cafitaan cachaneein nenaa ebereeo. Nii jaunne rai nii canacaanu sini bihacaanu, canacaanu rai, ‘Naaonjoaain coinate aitera’, naain canacaanu rai nanuu bihane coina. 13Nii janane nii canacaanu rai aitiin bihane rijijieein, caa nacoaauneein jerichanejeein camijianeeo que ena neeun. Nii jana nii canu leeochate, rai aitohalune rijijieein nuluno ruluhin ateinanohineein nelura”, nae jetao Faraaon rai nii conacai chaluurera curuaanaa.

14Niritoha raine jaun jetaote, nii Jose cotiharatiha Faraaonne jaun, nii rijieeoritiin caresero caje Jose mitaa cuuruhane jaun jetao, couturiji joaerateein jetao cajione coreein Faraaon coaraa cue jetao Jose.

15Inae nitohaneein cuhin rene turuhane jana jetaote:

“Sinihocaaunne jaunne, nii neniha carai, ‘Naaonjoaain ajinihate aitera’, naain carai nanuu beranune jaunne ii cotiharateeun, ii jete sininaa anuu bera aonaaine, rai nanuu coitucuhi, naauruha ii quene coitucuhanune jaunra”, naa rai Faraaonne jaun jetaote:

16“Coatiha canuhachaniji nihane cha coitucunaa nainerihaaun. Nete Cana Coaunera, ii canu curuaanaaneeine caohachanu que cana que coitucuheratenaa nainera”, naa rai Josene jaun jetaote:

17“Saan aihachuhisi. Casenete leinjiin nucuhe Nilo auhaniha chujuhecohanune jana, 18nii nucuhe caje mituhin jiarana nujuan asae nenaa omane quihure caainsineein coerenetonanaain caohatonanaain bacaauru. 19Nii janate nii coerenetonanai rohan, jataain baasoneenanaain mituure jarejeerihanaain caainsineein bacaauru. Coatiha chariji bana satiin caa Egipto sacuritaain, nitohaneein jataain baasoneenanai bacaauru coarahaaun niqui. 20Nii jataain jarejeerihanaain baasoneenanai bacaaurute, nii caainsineein coerenetonanai bacaauru quihure. 21Nete, nitohaneein quinajaauruha natiin jerichanejeein lenonelanaala nenaa rijijieein jataain jarejeerihure.

Niritiin sinihocaaunne caje nocohin, 22nacoaauneein sinihanune janane, casenihu, le nujuajiincha caje caainsi tijirineein omarohin inaaca caohatonanaain tabaanain ucujueein tiricone jana coaraaun. 23Nii janate, nii tabaanai ucujuei rohan ne caainsi tijirineein, aansijianai ucujueein tirico, enoto mitu nichajai caje unaa cujuana caaun ohacoaain. 24Caa caainsi tijirineein onacaauru tiricote, nii caainsi tijirineein caohatonanaain nenacaauru tirico quihure. Nii jaunne niqui caritiin, cha coujueluhinanaa inaaurera rai beeun. Nete: ‘Naaonjoaain ajinihate, nii niritiin sinihoquicha’, naain nanuu benaa coitucuurene nii chunucohacuru caraicha”, naain Jose rai sini biha Faraaonne jaun jetaote:

25“Nii coroata saain canu curuaanaaneeine sinihoquinete, jeelai anuucha que aitera. Cana Coaunerate letono niicha ichanenu coitucuherate ii quera. 26Nii caohatonanai caainsineei bacate, caainsi jaanacai beraneein aicha. Nii jeelai caainsi jaanacai beraneeintechu ai nii caainsi tijirineein caohatonanai tiricora. Nii jelaaicha quete, niritiin sinihoqui coroata saaincha. 27Jerichanejeeintechu, caainsi jaanaca beraneein ai nii leeochaauru rohan caainsineein, jataain baasoneenanaain jarejeerihanai mitunaa bacaaurura. Jerichanejeein caainsi jaanaca beraneeintechu ai nii enoto mitu nichajai caje unaa cujuana caaun onacaauru tiricocuru. Nitohaneein caainsi jaanacaneein nenerihani chane ajinihate niritiin sinihoquicha. 28Caa ichei aitocoaaunne rijijieeinte, canu curuaanaaneeine rai letono ichei niicha ichanenu coitucuerate Cana Coaunera.

29Satiin caa Egipto sacuritaainte, jataain arajiin niha cureein lenone caainsi jaanacane reentihaaincha. 30Nii baihate, caainsi jaanacaneein jataain nenereein cha. Nii bana, Egiptoo arajiin nihalu quinacaine coaaucururihaain nii chuni, jataain banejelanaala satiin caa atane sacuritaain nenacaauru cachaauru cairichaain airichaainne jaun. 31Nii jataain banejelanaala nihalune saijieein coatiha nerihaain cha, jataain banejelanaala nerichaain mijitenane jaunra. 32Nii coroata saain, canu curuaanaaneeine sinihoquinete jelaaicha que aitera. Inae carajaelanaala icharichaainne coinate, ii que nii coitucuerate Cana Coaunerara.

33Aihane jaun, nitohanerichaainne ajinihate caohachare, ii canu curuaanaaneeine leinjiin cacha jataain nainaain cha coitucunaa inaera ariine, satiin caa atane curuaanaaneein nihane coinara. 34Aihana jaun, nii coaaranu que, ii que jauriineein curuaanaacuru cocoainaaute, satiin caa Egiptoo batane sacuritaain, saoqui turihananaain niicha codoriaauri nesaoqui raain rucuhecuruhine, ena caa arajiin caainsi jaanaca nereentihaain nerichaain quinacaine janara. 35Caa caainsi jaanacanei cuhane caohachaain omarohin niha tiricone jana, jitariin taojiaain caohatiin coloheriteein rucujueein beraaichateeu. Aihate neseeuru naineein teein rucuhecuruhane, que lenoneein ichaonaa nainecurumiin cachaaurura. 36Nitohaneein, satiin atane sacuritaain tirico taojiaain rucuhecuruhanete caohachare, nabana mijitena caaun ooruha cachaauru, nii caainsi jaanacaneein Egiptoo neniha lenone banane coataara”, nae jetao Faraaon rai Jose.

Egipto curuaanaaneein Jose tiha Faraaonne

37Niritiin acaauruacha ichaneni biha Josene jaun jetaote, rai nere tonoraeraauru aina jiniiquiin nii aitoha Josene rautae jetao Faraaon. 38Nitohaneein rautatohane jaun jetaote, rai nere tonoraeraauru rai jetao:

“Coatiha caa baiha, caa leinjiin cacha rijijieein Cana Coaunera Suujue que suujuequi cacha erurihahacacheeinta”, nae jetao acaauru rai Faraaon. 39Niritiin jetaote:

“Coatiha nihei nii chuni ii rijijieein nainaain itolere coitucuerata. Cana Coaunerate satiin ii que caa aitohine jaa coitucueratihane jaun coitucuhicha. 40Aihana jaun, iite satiin cacoijihu quiicha sirii nerora rijijieein neriquiincha. Satiin canu cachaaurute, ii ere tonoraain, letohanajaaine jaa ichaain neeurureein. Canuhachane ii amuritoheriin nereeunni, canuhacha teeuri curuaanaacuru curuaanaa reey neein nihanune jaunra. 41Aonaaun caohachaain. Canune satiin Egipto batane curuaanaaneein neeine coina ii cocoainaaunra”, nae jetao Jose rai Faraaon.

42Niritiin jetaote, nii cocoainanacai nihane coujunacane que nii biji que niicha sirii anicho rocohin teein jetao, que jataain cajione caohacha curuharateein leinjiin oro caje ichanohin are curuharate Jose raro que Faraaon. 43Nii baiha jetaote, ichoaichaniha cunajaaocane jaa caaijie cunaa caro cabario que tarararaain cunaa cuhane Jose fauhin jetao: “Situnaanaja ajiincha joreracaauche”, naauruha ichoaichaniha cuhin ehequiin cachaaurune coina jetao letoanajae. Nitohaneein jetaote, satiin Egipto batane sacuritaain nenacaauru curuaanaacuru curuaanaaneein jetao nelu Jose.

44Nii baiha jetaote:

“Canune niqui itolere eroraneein curuaanaacuru curuaanaa Faraaonneeunra. Nete ena caje coaauneein, ii itolere coaaraneein neeine jaun, caa Egipto sacuritaain chuni cacha, ii caje bajaelanaala chatoanai ichana nainenereeincha”, nae jetao nii Jose rai Faraaon.

45Nitohaneein neenejihane baiha jetaote, Oon nese caje nenaa saseredote Potifera cacunu Asenata que comasaijiaain jetao, leinjiin Egiptoo cocoaicha curuaa que Safanata Faneaneein Jose curuaate Faraaon. Nitohaneein jetaote, Egiptoo curuaanaacuru curuaanaaneein jetao nelu Jose.

46Nii Egiptoo curuaanaacuru curuaanaa reey Faraaon rene amaauruhane bana jetaote, nichata choonca jaanacanelu Jose.

Inae nitohaneein curuaanaaneein tiha Faraaonne jaun jetaote, rai necoeein satiin Egipto sacuritaain amuhemujuenaa nunuhete jetao Jose.

47Nii jana jetaote, caainsi jaanacaneein jataain arajiin teelu nii tirico. 48Nitohanihane jana jetaote, caainsi jaanacaneein, nii atane sacuritaain amuhemujueein jetao, nii neseeuru rohan nenacaauru tirico jitariin taojiaain raain jetao, neseeuru naineein rucujueein ratiri jetao Jose. 49Nitohaneein jetaote, cucuana cuhane nenaa carene tabai jeeoneein nii tirico amaane jaun jetao: “Najeeoneeinte, inae nera”, naain jetao nii tirico coitucuene Jose.

50Jaiti nunujueniha mijitena caaun necairichanaa bajaanaane ajiniha jetaote, nii rai comasai Asenata aina coroatajaain calaojoilu jetao Jose. 51Nitohaneein jetaote, inae nejanoaa nii rai calaohi ajichane jana jetao curuaate Manaseeneein: “Cana Coaunerate, canu que necairichanaa aina caraaichuru baiterate”, naane jaun. 52Jana rai nocoala jetaote, curuaate Efaraainneein: “Cana Coaunera jerihane jaunne, caa necairichaanune jauncha atane que netiin canu calaohichuru sirihunra”, naane jaun.

53-54Inae nii aitohalu Josene rijijieein caainsi jaanacaneein jataain arajiin Egiptoo nihane caje saa quinacaine jana jetaote, inae caainsi jaanacaneein neniha cha quinacaine coina nunuhetihane jaun, jataain banejelanaala nelu mijitena satiin chauratane sacuritaain. Acaihaniji Egiptoocha jetaote, nenelu mijitena; ecu rucuhecuruhane jaun, niha quinacai lenonena jaun.

55Nitohaneein inae jataain banejelanaala mijitena que necairichanaa nunuheteeuruha nii Egipto cocoaichacurune jaun jetaote, Faraaon coaraa cuure, caje tirico bajaauruhane coina. Ne jetaote, rene turuuruhane jana: “Jose coaanihuche. Chaaen inara rai tonaane naitoonjoan rijijieein ichacuchera”, naain jetao, satiin Egipto cocoaichacuru letoae Faraaon.

56Inae satiin atane lomoritaain, jataain banejelanaala niha mijitenane jana jetaote, nii tirico fuhin rucuhecane jaa coloherihuru joracaeratihacoae Jose, Egipto cocoaichacuru rai, que necoretihane coina, jataain jelai amuritoheriin nauruta naurutaain mijitenane jaun.

57Nitohanihane jaun jetaote, satiin atane cajeeuru uhacoaain jetao, Egiptoo turuure, Jose caje tirico coretecuruhane coina, nii chunijihun atane que neniha quinacaine jaun.

Currently Selected:

Génesis 41: URA

Highlight

Compare

Copy