Génesis 40

Coroatajai cacha sini anuu biha Josene

1Nii baiha jetaote, nii curuaanaacuru curuaanaaneein nenaa reey rai conacai teeurera curuaanaa, chaaen rai faan icharaneein nenacaauru curuaanaa, naaonjoaihunri jetao, jataain nii rai fatoroon, Egipto curuaanaacuru curuaanaaneein nenaa reey Faraaon baijiaaure. 2Nitohaneeuruha, nii coroatajai, conacai chaluurera curuaanaa, chaaen faan icharaauru curuaanaa, naaonjoaihunrine jaun jetaote, acaauru aina obajeein jetao, 3nii caresero asaae beraichaneein nenaa coaridiaauru curuaanaa cafitaan nenajaun jetaote, mucunajaain, letoanajae nii reey Faraaon, nii niha caseteconeein Josene jaa caresero cuhane enoanajaaunruhane coina.

4Nitohaneein caresero cuhane nii amihanenacaauru curuaanacuru teein jetaote, acaauruacha latei ichaa Josene coina jetao, bijiu tenajae nii coaridiaauru curuaanaa cafitaan. Nitohaneein jetaote, carajaaojoaain caresero cuhane neeurelu.

5Nii caresero cuhane neeuruna jaaun netiin jetaote, sinihocure nii conacai chaluurera curuaanaa, aina faan icharaauru curuaanaa, naaonjoaihunri. Nii sinihocuruha le cachaaurune jaa jetaote, jelai teein rai nanuu siri. 6Nitohaneein sinihocuruhane jana janone turuhin acaauru coaraa cuha Josene jana jetaote, najiniha jataain nesooneeonjoaain lauhacure. 7Nii jaun jetaote:

“Chanuna enene jataain inadaraaiche”, naain acaauru caje bajaa Josene jana jetaote:

8“Enene sinihocaanuhine jaunne aihacaanu, neniha chuni canacaanu rai: ‘Naaonjoaain ajinihate aite inara sinicha’, naain canacaanu rai beranune jaun”, naauruhane jaun jetaote:

“Taana Cana Coaunera, cana que niriinanai coitucuheratenaa nainihane coitucuhichene”, naane baiha jetao: “Tonaana inara sini anuute aitocoiche”, naain acaauru caje bajaa Josene jaun jetaote:

9-10“Canu sinihute nichatajai uunequiin chujuheque leinjiin nuna laaojoiri. Nii nuna laaojoirite ujuanihane jaun, nii rai nujuanecuru rai ninaa obaneeinchuru nerotojoacoaain cataacoae. 11Nii jana, canu bijiu niha acau conajaaonca Faraaonne jaa curune jaunne nii oba moloonejeein raain, nii curu cuhane tononohin teeun Faraaon biji cuhane”, naain nii Jose rai, nii sini anuu biha nii conacai chaluurera curuaanaane jaun jetaote:

12“Nii nuna laaojoiri uune nichatajaite, nichata janojoi que aite. 13Caa caje nichata janohin cuhanete, nii caseteconeein neeine jaa lera coaraain, ii mitaa cureein Faraaon, nacoaauneein nii ichei niicha tei amihanenaa ichaain, aichejetohilune rijijieein nii acau conajaaoncane jaa curu teei raine coina. Nitohaneeine ajinihate, niritiin sinihoqui. 14Inae caa ichei aitocoaaunne jaa rijijieein ii mitaa caresero caje Faraaonne, canu coacuhin cairichaaojoaain canu coaraain atiin canu coreniha Faraaon rai ereeute canu mitaaine, caa caseteconeein nihanune caje. 15Ebereeocuru atane caje basijiaunohineein canu uhaauruhalune jaunne, cau caa turuhin neeun. Coatiha chatoanai baaso ichacaaunne coreniha cau caa caresero cuhane nihaaun”, nae jetao nii conacai chaluurera curuaanaa rai Jose, sini anuu biha raine baiha.

16Nitohaneein caresero caje nichotihane ajiniha, niritiin sinihoca nii Faraaon rai conacai chaluurera curuaanaane biha Josene aonaane jaun jetaote, nii faan icharaauru curuaanaa netonoai:

“Canuhetonainachu sinicoon. Casenene canu couturi ichoae nichatajai omari laaohinaa cuhane ita ichoae laurianeneein faan somaneri lauhelauhecaaun. 17Nii canu couturi ichoae nunuheniha nenaa omari laaojoiri cuhanete ne araai lauriin faan, nichona aina ichanohin cachetecuru, naaonjoaihunri Faraaon rainu que. Nii janate, nii canu couturi ichoae, omari laaojoiri cuhane nenaa faan quihure fauhin tajaaecuru”, naain Jose rai sini anuu biha nii faan icharaauru curuaanaane jaun jetaote:

18“Saan. Nii nichatajai omari laaohinaate, nichata janojoin que aite. 19Caa caje nichata janohin cuhanete nii caseteconeein neeine jaa lera coaraain, caje ii mitaain, ii ateinaain, leinjiin nuna que ii tijichaa Faraaonne janate, ijiabereeon quiha cuurureein tajaaecuru. Nitohaneein cheterihanine ajinihate, niritiin sinihoqui”, naain jetao rai sini anuu be Jose.

20Nii acaauru rai aitoha Josene jaa nichata janone cuhane rai nejanoanaja bajaanaa nainaane jaun jetaote, satiin rai cachaauru curuaanaaneein nenacaauru cotiharateein jetao, acaauru aina beseta ichae Faraaon. Nitohaneein inae beseta bitoaa neeuruha nii niicha cotihacurine jana jetaote, coarajeeuruhane coina, nii conacai chaluurera curuaanaa aina nii faan icharaauru curuaanaa uhaerate jetao Faraaon. 21Nitohaneein uhaeratenajaain, jerichanejeein rai namihaneeon que nii rai conacai chaluurera curuaanaa tihane jaun jetaote, nacoaauneein aichejetohalune rijijieein jetao Faraaon rai nii acau cohane jaa curu teraneein jetao ne nii conacai chaluurera curuaanaa. 22Jana, nii faan icharaauru curuaanaa jetaote, nii rai sini anuu biha Josene rijijieein jetao, inori que nuluno ruluhitoroateein jetao, ecuun nuna que tijicharate.

23Ne jetaote, nii rai aitohalu Josene sainejeein jetao, nii chariji bana coacuene nii conacai chaluurera curuaanaa.

Currently Selected:

Génesis 40: URA

Highlight

Copy