Génesis 39

Baasoneein Jose tiha Potifara comasaine

1Inae Egiptoo Jose amaauruha nii amaaurera Isamaelitaaurune jana jetaote, nii amaaurera caje jetao corete Faraaon rai soondarooru curuaanaaneein nenaa leinjiin Egipto cocoaicha Potifara. 2Ne jetaote, coroatajaniha Cana Coaunerane aina jetao, raotojoeein nii rai fatoroon Egipto cocoaicha loreri asae nelu jetao nii Jose.

3Nitohaneein, nii Jose coroatajaniha Cana Coaunerane jaun, satiin namihaneeon quene maajeein caohachaain cuhane coaraane jaun jetaote, nii Jose coroatajaniha Cana Coaunerane que nainae nii rai fatoroon. 4Nitohaneein coroatajaniha Cana Coaunerane coaraane jaun jetaote, que jauriineein nii Jose teein jetao, satiin loreri asae nenacaauru, rucuheleeurune maajeein jetao que beraichate nii rai fatoroon, que banijiaain siricha rijijieein beraihane coina.

5Nitohaneein que jauriineein nii Jose teein, satiin loreri asae que banijiaain nenacaaurune maajeein que beraichatiha Potifarane caje coaauneein jetaote, rai loreri asae, rai namihaneeon que, naaonjoaain que Potifara coroatajane Cana Coaunera, caohachaain nihane coina. 6Nitohaneein nii Jose que, rai rucuheleeuru beraichatihane jaun jetaote, nii chaque tonajelanaala neein jetao, cha coacuelanaala jetao raotojoeein lenoneecha que coacue Potifara.

Nitohaneein itolereecha que caohachaain necoharaa Josene jaun jetaote, 7nirijieein carajaaojoaain niha Josene baiha, inae jereein coaraane jaun jetao:

“Jereeute enene ita aina sinihacara”, naa rai nii fatoroon Potifara comasaine jana jetao:

8“Jiaohinechera. Aonaaun, canu bijiute satiin niicha sirii teein ratiriche ii lana canu fatoroonra. Aihana jaun, nihei nii chaque tonajeein nihache jaanuta. 9Nii jaun nihei nii chuni canu rijijieein caa loreri asae neeicheta. Satiin caa, canu fatoroon rucuheleeurute, canu rai rijijieein neeurechera. Nete laen ii, rai comasaineein neeichera. Aihana jaun, nii chatohaneein baaso ichana nainichaaunche raine coaalanaalata. Niheichu Cana Coaunera rai baaso ichana nainihaauncheta”, naain jetao jerene Jose.

10Ne jetaote, cojoanoonetojoeein aina sinihane coina counujueein jetao, rohaancha niha Josene jeriha nii Potifara comasai natiin jetao, nii nere tonoraelanaala, rohan turunaa jerene Jose.

11Nitohaneein jetaote, nii loreri asae enohin, namihaneeon ichaa cuha Josene jana jetao, ecu neeureniha cachaaurune jana 12rai nobiri buuri que mucuhin:

“Enenete laen, canu aina siniriquiincha”, naa rai, nii Potifara comasaine jana jetao, nii baaso ichana jerenihane jaun, nii ene bijiu rai nobiri buuri ratiriin jetao jeluhariin sorohin mituha cue Jose.

13Nii jaun jetaote, nii bijiu nii nobiri buuri ratiriin soroha Josene jaun jetao, 14nii rai loreri asae letononeein nenacaauru cachaauru cotijiaain jetao:

“Chajaauchete caa coaraera. Canu lanate, canarai caa leinjiin ebereeo uhaain cau ratirilura. Acate, ena carene enohin, canu aina sininaa jereein, canu mucuhin niicha ichana jerei ichana jerera. 15Nii jana jataain tonijiaain auhaaocaaunne jaunte, canu jianijiaaintiin jeluhariin sorohane jaun, cau caa nobiri buuri ratiricha”, nae jetao nii Potifara comasai.

16Niritiin jetaote, rai loreri asae turuha uha nii rai fatoroon Potifarane reentihaain jetao, nii Jose cajione rucujue nii ene. 17Nitohaneein jetaote, inae turuha nii rai fatoroon Potifarane jana jetao:

“Caa leinjiin ii cacha, iicha coreteilu ebereeote, canu rene enohin, nii jerenihanune sainejeein canu mucuhin caque niicha jerei ichana jerera. 18Nete jataain tonijiaain auhaaocaaune jaun, canu jianijiaaintiin jeluhariin sorohin cau caa nobiri buuri ratiricha. 19Nitohaneeinte, nii jerenihanune sainejeein canu mucunaa jere nii ii cachara”, naain jetao, lana Potifara rai coulurujue nii comasai.

Niritiin rai biha nii comasaine jaun jetaote, jataain Jose aina obajeein jetao, 20nii Jose mucuhin, nii jelai teein caseteconeein neeuruha reey cachaaurune jaa caresero cuhane jetao terate nii rai fatoroon.

Ne jetaote, caresero cuhane niha Josene sainejeein jetao, 21jataain belaihane coaarateein coroatajane Cana Coaunera, nii caresero beraicha suujua rijijieein nihane 22nii caresero beraichaneein tiha caresero curuaanaane coina. Nitohanihane jaun jetaote, satiin nii caresero cuhane nenacaauru beraichanu que jetao, nii Jose cocoainae nii caresero curuaanaa. Nii jaun jetaote, satiin nii caresero cuhane nenacaauru amihaneeon coaaraneein, berainajaeraneein nihane jaun jetao, 23inae nii Jose bijiu nenacaauru casetecocuru coaana que coacuene nii caresero curuaanaa, jataain Jose coroatajaniha Cana Coaunerane jaun, itolereneein caohachaain niha niicha ichaaine jaun.

Currently Selected:

Génesis 39: URA

Highlight

Copy