Génesis 38

Rai nacana Tamara aina ita coritaauruha Jodaane

1Nii bana jetaote, rai nejeraauru caje mituhin jetao, Adolamaun cuhin, leinjiin cacha Hira loreri asae jetao ichaoha cue Jodaa. 2Ecu neein jetaote, leinjiin Cananeeo cocoaicha Soha cacunu aina ita coitucuhin, ita jereein, ita raaure. Nitohaneein ita raauruhane baiha neenejeein jetaote, 3inae ausirineein leinjiin calaojoin jetao Era neein curuateeure. 4Nii baiha nacoaauneein ausirineein calaojoin jetaote, Onasineein curuateeure. 5Nii baiha jetaote, sirichuruhane jana jetao, Quesebiu niha Jodaane jana nejanoaelu nacoaauneein Onasi que jauriineein rai canaanai. Aca jetaote Selaneein curuaateeurelu.

6Inae fojoeein ichauhenaniha nii calaohichuru ajicha Erane jana jetaote, leinjiin ene Tamara que jetao, comasaijiae rai inaca Jodaa. 7Ne jetaote, baaso ichaaechajeein ichaoha nii Erane rautaain coaraeniha Cana Coaunerane jaun ohe. 8Nii jaun jetaote:

“Ta inejera sinijiera autana raain, aina canaanai sirihute nenaa nainemiin inejera onaa nefoerate iniha cuaaincha”, nae jetao nitohaniha acaauru ichaone jaun, rai calaohi Onasi rai Jodaa.

9Ne jetaote, raineein neeureneriha aina bereecohane nii bereecurune coitucuhane jaun jetao, ita que turuuruhane naineein nii ausiriniha nii ninana autanane jerelanaala ai nii Onasi; nabana nii namure foeratenojoineein nenaa rijijieein neeuruha caje nefoeratenacaaurune coataa. 10Nitohaneein coaauca Onasine rautaeniha jataain Cana Coaunerane jaun jetaote, inae nii Onasi netonai ohe.

11Nii jaun jetaote:

“Jauriaa, nirijieein autananeein ii inaca loreri asae neeu, ichauhenaniha canu calaohi Selane reentiaaincha”, nae jetao nii rai nacana Tamara rai Jodaa, nabana nii ooruha nejeraaurune rijijieein, oha nii Selane coataa tenaa jerenihane jaun. Nii jaun jetaote, rai inaca loreri asae cuhin jetao ichaoha cue Tamara.

12Nii baiha neenejeein jetaote, inae ohe nii Jodaa comasai Soha cacunu. Nii oha comasaine jaun, inae coinaderaane jianihane jaun jetaote, nii neeuruha rai carenero ujuhi jaoorerane jaau Timnati neseu cue rai carenerocuru ujuhi joaeratiha Jodaa, rai belaichaneein nenaa Adolama cocoaicha Hira que corihaneraain. 13Nitohaneein, nii Timnati neseu rai carenero ujuhi jaoha cuha nii rai nonone coitucuuriin jetaote, 14nii autananihane cajione que cajionecohane coreein jetao, nii Timnati coero cuhane nenaa Enaain neseu comitaerau, rai nubuha que meri conajaain lauheque nii Tamara, nabana acanihane coitucuha nii chuni cachane coataa, inae ichauhenaniha Selane sainejeein tihane coina rai aitohalu natiin teniha rai nonone jaun.

15Nitohaneein nubuha que nomeri conaacane jana coaraane jaun jetaote, leinjiin ene cojoaeloroherineein coaraane jaun jetao, 16bero uuriniha enohin nedaain jetao coaraa cue, rai nacananihane coitucuelanaala Jodaa. Nitohaneein rene turuhin jetaote:

“Nainichaaunna enene iniha sinihanune”, naane jana jetaote:

“Enjenjen. Chajian caniha siniine coreniha carai teriquiin”, naain bajaa nii enene jaun jetaote:

17“Corenihane ichei canu irihuru caje leinjiin cabara narejeen letohareeunnicha”, naa Jodaane jaun jetaote:

“Saan. Caohachaachujian nitohaneein carai teeine coina, enene caniha siniinera. Nete laen ichei chaelainiji ratirii caraine caohachare, nii chaitoonjoan cabara narejeen letoaaine reentiaain sirichaaunne coinara”, naa nii ene ne jaun jetaote:

18“Saan ai. Chajian jereei, ichei letohanune reentiaain ichei ratirihanune coinata”, naain bajaa Jodaane jana jetaote:

“Nii ena ii biji cuhane iicha sirii baston aina, nii ii are anicho siricha ratirihu caraicha”, nae jatao rai Tamara. Nii jaun jetaote, jitariin nii rai nacana Tamara bajanojoin teein aina siniha Jodaane jaun jetao, inae ausirine. 19Nitohaneein, nii aina siniha Jodaane baiha jetaote, jelaiha cuhin nii rai nubuha rocohin, jeelai nii autananihane cajione que necoreeteein ne nii Tamara.

20Nii jana, jelaiha nii rai rucuhele niicha tei cainaa nii ene cojoaelorohene coina, rai belaicha Adolama cocoaicha aina nii cabara narejeen letoaa Jodaane jana jetaote, inae ecu nii ene eruhene. 21Nitohaneein ecu erueniha jaun jetaote:

“Aanca caa Enaain caje unaa leinjiin ene cojoaeloroheri caa bero cuhane lauheconajaquita”, naain bajaa ecu nenacaauru cachaauru cajene jana jetaote:

“Coatiha nii coaarichaai nii leinjiinniji ene cojoaeloroheri caute”, naain jetao tonoraaure.

22Nii jaun jetaote, jelaiha cauhin:

“Coatiha nii chaitoonjoan ene eruhaaunta. Nii ecu eruenihanune jaun, nii ecu nenacaauru cachaauru caje bajaanune janate: ‘Coatiha, nii leinjiinniji cau nihei ene cojoaeloroherita’, naaure caraicha”, naain jetao Jodaa rai turuhin biha cue nii belaicha.

23Nii jaun jetaote:

“Saan, inae nainejerichaain. Coaraain nii canu rucuhele raaine, nabana cana que nocoatijiaa chunine coataara. Nete laen caohachare, nii cabara narejeen teratihanu ii quene jana, ecu erueneeine coitucuhin nihanera”, nae jetao Jodaa.

24Nii baiha nichata ateein catiaain jetaote:

“Ii acananeein nenaalu Tamarate, leeochaauru quichaauru aina ichaojeracohane jaun, inae ausirinera”, naain beeuruha Jodaa rene turuhinne jaun jetaote:

“Coaraain nainamiin. Chajaain mucuhin uhaain, mocoochete nitajeeinera”, nae jetao nujuae soaisoaain Jodaa.

25Niritohane jaun, mucuha cuuruhane jana jetaote, nii mucuha cunacaauru rai jetao: “Caa rucuhele erorate, canu ausirineteein catohaneein caetelu. Coaracuchenachuhinti, cha rai nerihana jana caa baston aina caa are anicho siricha”, naeratiha rai nono raine jana, 26nii rucuhele coaraain, rainiha nii baston aina are ne coitucuhin jetaote: “Aiha chuhisi. Canu rai chuhisi esinae caa naitoonjoan. Jataain caohacha ichaa acane janane, canu jataain baaso ichaaun, rai, canu calaohi Sela tenihanune jaun”, naain jetao, inae chariji bana coaiteen nii rai nacana aina sinine Jodaa.

27Inae nejanoaa nii canaanaine jaa batene que tihane jana, janoaa rai neba Tamarane jana jetaote fafionene. 28Nitohanihane jaun jetaote, leinjiin inae nejanoarai jetao, rai biji mitae. Nii jaun jetaote: “Caate, caa ichoaichaniha ecoonane”, naain coitucuhane coina jetao, sicho lanajai que, rai biji ichojoae michuera. 29Nii rijieeoritiin jelaiha enoha nii canaanai biji ichoaichaniha ecoonane jana jetaote, nejanoaa uhe leeocha rai nejera. Nii jaun jetaote: “Ichoaichaniha unaa”, naane jaun jetao, Fareseneein curuaate rai michuera. 30Nii baiha nacoaauneein nejanoaa nii sicho lanajain siricha canaanaine jana jetaote, Zaraneein curuaate.

Currently Selected:

Génesis 38: URA

Highlight

Copy