Génesis 37

Jose que necoreteeuruha nejeraaurune

1Nitohaneein nii Canaan neein oha rai inacane jana jetaote, jelai caje amuelanaala ecuhacha ichoaelu Jacobo.

2Caate, “Naaonjoaainte neeurelu Jacobo inamaconeein nenacaauru”, naain que erenaa ne.

Jose belaihureniha rai nejeraaurune

Inae lechoonca caainsi jaanacanijihane bana jetaote, nii rai coseenraauru Bilaa, Silfa, naaonjoaihunri aina rai inacaacha siriichuri rai nejeraauru aina jetao, inaca rai carenero beraiha nerejetelu Jose. Nii jetaote, baaso ichacuruha rai nejeraaurune rautaain coaraenihane jaun, rai inaca Isaraele rai berejete Jose.

3Nii jana jetaote, jataain nii nejeraauru belaihane amurijiriin, nii rai calaohi Jose belaain coarae Isaraele, jataain inae biinaaneein niicha sirii rai calaohinihane jaun. Nii jaun jetaote, jataain caohati obiri jaain jetao que obiriteein jetao siri nii rai inaca.

4Nitohaneein nii nejeraauru belaihane amurijiriin jataain acaacha belaiha nii acaauru inacane coaracuruha satiin nii nejeraaurune jaun jetaote, jataain cotaain que necoelai caaun rai erenaa jerecurene nii rai nejeraauru.

5-6Nitohaneein cotaitocuruha nii nejeraaurune jana jetaote, sinihocane jaun acaauru rai bihane coina:

“Aonacuchena, inara rai sinihocaaunne be. 7Casenete ocoana jana satiin tirico taiha nihacache. Nii jana, le bijiin quiicha tai tiricote, raajenihane rauhijiriin chujutoroaain chujuheque. Jana nenainetiin le bijihananaain inaraacha taite, nasaae neloraacoaain, acaauru amurijiriin nelateein nihane coaarateeure que”, naain sinihocane biha Josene jaun jetaote, jataain jelai amuritoheriin cotaain jetao:

8“Aihana jaunna, ii canacaanu curuaanaa reey neein canacaanu amurijiriin nelateein neriquiinte”, naain jetao, jataain jelai amuritoheriin coiinteein cotaihure rai nejeraauru, niritiin acaauru rai sinihocane bihane jaun.

9Nii baiha jetaote, nacoaauneein sinihocane jaun jetao:

“Nacoaauneeinne sinicoon. Casenete, enoto, atene, lechoonca leinjiin arasijie, naaonjoaihunri nelateein nerichaaunine coaarateeure caquera”, naain jetao nejeraauru rai sinihocane be Jose.

10Niritiin sinihocane biha rai inaca, nejeraauru, naaonjoaain rai Josene jaun jetaote:

“Chatoanai ajinihana niritiin sinihoqui. Inasiina choba, inejeraauru, canu, naaonjoainichaanune, canacaanu amurijiriin jataain nelateein neeine coaarateein neei canacaanu quene jana, ii fautaain nerichaanu”, nae jetao rai inaca.

11Nii jaun jetaote, nitohaneein jataain que necoelaihure rai nejeraauru. Ne jetaote rai inaca, nii rai sini que suujuaraaetelu.

Jose que necoreteeuruha rai nejeraaurune

12Nii jana jetaote, nii inaca rai carenerocuru rai omane ariha jetao cuure Siqueeun cuhin, nii Jose nejeraauru. 13Nii jaun jetaote, rai calaohi Jose rai:

“Aonaaun. Siqueeunte carenerocuru beraiha neeure inanaaurura. Chajaain acaauru coaanihura”, naa rai inaca Isaraeline jaun jetaote:

“Ai. Jataainna chujian acaauru coaraa cunaa jereeunra”, naa Josene jaun jetao:

14“Chajaain aihane cunihu. Chajaain cuhin inejeraauru coaanihute, nii baiha carai biha uhicha. Chatohaneeincha neeure carenerocuru ainata”, nae jetao Isaraele.

Nitohaneein jetaote, Hebron batane macararo caje jetao nii Jose letoae rai inaca Isaraele.

Inae Siqueeun batane turuhin 15nitajeein amuhemuheca Josene jana eruhin jetaote:

“Chaa arihana nii amuhemuhequi”, naain caje bajaa leinjiin cachane jaun jetaote:

16“Canu nejeraauru arihane amuhemujueeunra. Taa chunijiun carenero beraiha neeuruhane jaa jelai coitucuhineta”, naain caje bajaa Josene jana jetaote:

17“Eejen. Inae caaelai caje amuuruhani. ‘Dotaun jete cuure’, naauruhane janane acaauru aonajeeun”, nae jetao nii cacha. Nii jaun jetaote, nii nejeraauru ariha cuhane jaun jetao, Dotaun erunajaa cue Jose.

18Nitohaneein inae erunajaain nita uhane coaariin jetaote, acaauru rohan nichuuntaane ajiniha, sohin jaooruhane coina coacuhin jetao:

19“Nota inae uha cana amurijiriin sini anuu caje cha coitucuera. 20Chajaauchete ateinaain leinjiin atane jachu acau raauruhane jaa cuhane nalaacachete, nii baiha, ‘Chunucoha necha aansai taebinaete jerihane sohin quicaihara’, naacache cana inaca raicha. Aihate nii aitoha rai sinine rijijieein nihane coaracaachera”, naauruha ecu ita raine 21aonajihane jaun jetaote, ichoteratihane coina: “Jiaohine. Nainihei sohin jaonaa. 22Jiaonriha chatohaneein teein coichana jaohichenera. Raujiaain taa cacha areroo nenaa atane jachu acau raauruhane jaan cuhane nalaauchera. Jiaonriha nii chatohaneein inara biji que cunaitaaichenera”, nae jetao nii nejeraauru caje ichoteratihane coina Robeen, nechu jataain nii Jose ichoteratihane, jelaiha acaauru inaca rene cauha cuhane coina. 23Ne jetaote, ecu neniha Robeenne tonohanau inae nii nejeraauru rene turuhane jana jetao, caje nii nobiri caohati rocohin jetao, 24nii atane jachu acau colane jacorohin nenaa cuhane nalaaure.

25Nii baiha lenonecuruhane coina nelauriaauruhane jana jetaote, tajiha arajiin camecho ichoae ita caaijie uuruha Galara caje uhin, jujuaain ichanohichuru balsamo aina mirra amaain Egiptoo cuuruha isamaelitacurune jana coaarihure. 26Nitohaneein coaarinajaain jetaote, rai nejeraauru rai:

“Chaaquena cana rai nelatere cana nejera cotaiha sohin ateinaain suujuihacachene. 27Jerihanete caohachae nii sohin joaelanaala Isamaelitaauru rai necoretihacachene. Nii choae tacaain sohin jaonaa nainihaacache, jataain cana nejeraneein nihane jaun”, naa Jodaane jana jetao, acaauru rai nii aitohane rijijieein jerecure rai nejeraauru. 28Nii jana tajiha situha uuruha nii rucuhele que necoretenacaauru Madianitacurune jaun jetaote, nii acau mitunaja atane jachu caje Jose rocohin jetao, Isamaelitacuru rai necoreteeure rai nejeraauru, coroatachooncai jataain coreti moneda coriquineein nenaa coreniha.

Nitohaneein jetaote, Egiptoo Jose amaaurelu.

29Nii jana, jelaiha turuhin nii atane jachu cuhane Jose coaraa cuhane jana, inae ecu eruenihane jaun jetaote, jataain coinaderaane coujunacaneein rai cajione soasoai Robeen. 30Nii baiha jetaote, nii neeuruha nejeraaurune jaun, acaauru rene turuhin jetao:

“Inae ecu nihei cana ocoala. Chana jana laen enene ichareeunta”, nae jetao Robeen. 31Nitohaneein jetaote, cabara narejeen niicha soori coichana que jetao, nii Jose obiri rujuaain jetao, 32nii baiha rai inaca rai letoaaure. “Caa obirine catohaneein eruhacaanu. Ii calaohi cajione nihane coitucuhin coaraau, nechaainti acaniha”, naerateein jetao terateeure.

33Nii jaun jetaote aca nihane coaraain: “Caa chujianra canu calaohi obirinena. Chunucoha necha aansai taebinaete jerihane chatohaneein teein sohin quicaihara”, nae jetao Jacobo. 34Niritiin jetaote, inaderaane coujunacaneein rai cajione soaisoaain jetao, inaderaane jaa cajione que necoreeteein jetao, jataain carajaain rai calaohi coinaderaain chanae Jacobo.

35Nii jana jetaote, rai suujua aninuana jerecure rai calaohichuru aina rai cacunucuru niqui. Ne jetaote, nii suujua aninoaauruhane aohana jerelanaala, jataain nii calaohi coisiin: “Canuhetonai ohanune reentiaain, coatiha canu calaohi baiterihaaunita”, naain jetao inaderae Jacobo.

36Nitohaneein jetaote, Egiptoo Jose amaain, Egipto curuaanaa Reey neein nenaa faraaon beraihurera soondarooru curuaanaa neein nenaa leinjiin cacha Potifar rai jetao, que necoreteeure Madianitacuru.

Currently Selected:

Génesis 37: URA

Highlight

Copy