Génesis 35

Beteliu ichaoha cuha Jacobone coina letoaa Cana Coaunerane

1Nitohaneein jetaote, jaiti jelai caje amuenihane jana jetao: “Nii Lai caje amuhin, Betelihu ichaonihu. Chaaen ecu, inana Esao caje sorohine bana canu inara Coauneraneein ichei ecoona nichaaunne rai lenonecuru sohin mocohinejaanu ajerichuru caje leinjiin rori jaaura”, nae jetao Jacobo rai Cana Coaunera. 2Niritoha rai Cana Coaunerane jaun jetaote, satiin rai calaohichuru, rai naraaichuru, rai comasaihuru, naaonjoaihunri rai jetao:

“Jitariin nii ecaantooru inara chosichuruniha nenacaauru rocohin jaohin, nacaaonjoaain, inara cajione coreeuche. 3Chajaauchete ena Beteliu cunichaache. Ecune nii nerojoecaain naaonjoaanune nihanatiin canu coroatajaneein, cuhanune jaaunru canu amu que canu coroatajaneraneein nenaa Cana Coaunera rai ajerichuru caje rori jareeunni”, nae jetao acaauru rai Jacobo.

4Nii jaun jetaote, jitariin acaauruacha sirii nii ichanohichuru chosichuru rocohin jetao, nuricho que niicha siriichuri sarisichocurune maajeein teeure Jacobo rai. Nii jaun jetaote, leinjiin nese Siqueen rohan nenaa enuha encina asae teein jetao, nii chosichuru conaute Jacobo.

5Nitohaneein inae nii neeuruhane jaa batane caje mituuruhane jana jetaote, jataain satiin acaauru coasichuruha nii acaauru rohan nenacaauru cachaaurune coina jetao, acaauru coroatajaniha Cana Coaunerane jaun, coasinaaca chatohaneein Jacobo calaohichuru teeurene, nii Amoro cachaauru.

6Nitohaneein cuhin jetaote, satiin cachaauru aina jiniiquiin cunacaauru aina jetao, nii jauriaalu Luzneein acaauruacha curuaatei Canaan batane nenaa Beteli neseu jetao turue Jacobo. 7Ecu turuhin jetaote, Cana Coaunera rai lenonecuru sohin mocohane jaanu que ajerichuru caje leinjiin rori jaain, jelai curuaate, E Beteli neein; rai nejera coasiha sorohalune bana, ecu rai ecooca Cana Coaunerane jaun. 8Chaaen jetaote, ecu oha leinjiin ene Rebeca beraichaneein nenaa Deborane jana jetao, Beteli rohan nenaa enuha encina asae teein jetao conautecure. Nii jaun jetaote, “Inaderanaanaja benuha encina”, naain jetao jelai curuaate Jacobo.

9Nitohaneein inae Padam-aram caje cauha cuha Jacobone jana jetaote, nacoaauneein rai ecocohin jetao Jacobo cojiotaain:

10“Ii curuaate Jacobone. Nete, inae curuajaeneriquiin Jacoboneein. Ena caje coauneeinte, Isaraele nereein ii curuaara”, nae jetao rai Cana Coaunera.

Niritiin rai ecocohin curuaa coreein jetaote:

11“Canune, Itolere Curuaanaaneein nenaa Inara Coaunera neeunra.

Arajiin bereequiin nefaain nefoerateeura.

Ii cajete, arajiin nefaain, satiin chauratane lomoritiin arajiin niha cuurureein cachaaurura.

Ii nefoerateeuru cajetechu niha cuurureein curuaanaacuru reeychurura.

12Abaraaun, Isaca, naaonjoaain rai quiicha teeilu atanena ichei tereeunnicha.

Ichei tihanune baihane, ii nefoerateeuru rai tiha cureeunnicha”, nae jetao rai Cana Coaunera.

13Niritiin Isaraelitaauru foerateranu Jacobo aina irihane baiha, jelai caje amuha Cana Coaunerane jana jetaote, 14nii aina iriha Cana Coaunerane jaaun teein jetao, leinjiin ajeri chujuriaain, coroajeein jetao, nichoae erene, bino, naaonjoainuri chorohin jetao, 15jelai curuaate Betelineein Jacobo.

Oha Raquerine

16Nii baiha jetaote, Beteli caje amuhin cuujueeuruhane jana, jaiti icharaain lanaa turuuruha Efaratane jana jetao, inae cunaa Raqueri bereene jaun jetao, jataain caaintaane jaun nejanoasine. 17Nii jataain nejanoaane rai caaintaane jana jetaote: “Jiaonriha chaque tonajeeinera. Inaen nacoaauneein quicha cojoaajineein ichei nejanoaa canaanaicha”, nae jetao rai michuera. 18Nii jana jetaote, inae ohane rainetiin jetao nere satononiji que jetao Benonineein nii calaohi curuaate niqui. Ne jetaote, Bejamiinneein curuaate rai inaca.

19Nitohaneein oha Raquerine jana jetaote, conautecure Efarata coero uuriniha. Nii Efaratate enene Belenneein curuaateeure. 20Ecu jetaote Raqueri rai, natane bana ichoae teein ajerichuru lauriae ecuuneein, Isaraelitaauru foerateraneein nenaa Jacobo. Nii jaun jetaote, enanetojoeein Raqueri atane bana coujunacaneein ne nii ajeri Jacoboacha lauriaichuri.

21Nitohaneein jetaote, jelai caje amuhin, Edarau niha ecuuneein ininaanajane jaa rerohin cuhin jetao, jacari caje nenaa que neloanariteein ecu ne Isaraele.

22Nitohaneein inae ecu turuhin neloanariteein niha Isaraeline jana jetaote, nii inaca comasai rijijieein nenaa, rai coseenra Bilaa aina jetao siniha cue Robeen. Nii coitucuhin jetaote, jataain aina obaje rai inaca Jacobo.

Jacobo calaohichuru curuaacuru

(1Cr 2.1-2)

Lechoonca coroatajaauruhalu jetao nii Isaraelitaauru foerateranu Jacobo calaohichuru.

23Jauriaanejeein Leara aina niicha sirii calaohichuru ajichaneein jetaote nelu Robeen, que jauhequiin nenaa jetao Simeeon, Lebi, Jodaa, Isacar, Saboloon, naaonjoaihunri. 24Jana Raqueri aina niicha sirii calaohichuru jetaote, Jose, Bejamiin, naaonjoaihunrine. 25Jana rai comasai rijijieein Raqueri coseenra niicha sirii Bilaa, aina niicha siriichuri calaohichuru jetaote, Daan, Neftali, naaonjoaihunrine. 26Jana rai comasai rijijieein Leara coseenra niicha sirii Silfa, aina niicha sirii calaohichuru jetaote, Gada, Asere, naaonjoaihunrine. Acaauru jetaote, Isaraelitaauru foerateranu Jacobo calaohichuruneein jetao Padan-aram neeuru jana nejanoanacaaurunelu.

Oha Isacane

27Nii jauriaanejeein turuuru bana Canaan batane nenaa Mamere neseu Arba, Hebronneein acaaauruhacha curuaateeuri, ichaooruhalu rai inaca Abaraaun aina Isacane jaau neein ichaoha nii inaca Isacane jaau jetaote coaraa cue Jacobo.

28Nitohaneein ecu ichaohin jetaote, inae lefasha fosachoonca jaanacaneein ichaohane cuhane ohin jetaote, 29coitucueracuru aina niha cue Isaca, inae binaanihane caaun ohin. Nitohaneein inae oo jana jetaote, atane rucuheca cuure rai calaohichuru, Esao, chaaen nii Isaraelitaauru foerateranu Jacobo, naaonjoaihunri.

Currently Selected:

Génesis 35: URA

Highlight

Copy