Génesis 34
34
Chariji bana que quicha turuaelanaala nenaa Dina mucuhane
1Nitohaneein Canaan neeuruhane jaun jetaote, ecu nenacaauru ranunaauru rene jetao bedaeniha cue Jacobo aina Learaacha sirii acaauru cacunu Dina. 2Nii jana jetaote, coaraain jere nii jelai curuaanaaneein nenaa Ebeo caje nenaa Hamoro calaohi Siqueen. Nitohaneein jetaote, jerenihane jaun coiintihane sainejeein mucuhin jetao, aina sinae. 3Nitohaneein jetaote niqui, jataain nii ene jerihane coaarate, nii ene netonai jerihane coina. 4Nitohaneein jataain jerihane jaun jetaote rai inaca rai:
“Chajaain caa ranuna inaca coaanihute, canu comasaine que carai caa ranuna bajaaine raera”, naain jetao rai inaca Hamoro letoae Siqueen.
5Nii jana jetaote, jataain jerenihane sainejeein rai cacunu Dina mucuhin aina siniha Siqueenne coitucue Jacobo. Ne jetaote, jaiti tonaain erene, nirihuru beraihuruhane caje turuuruha rai calaohichurune reentiaain. 6Nii jana jetaote, jaiti turuureniha calaohichurune tonohanau Jacobo coaraa cue, aina irihane coina nii Siqueen inaca Hamoro.
7Nii jana jetaote, inae irihuru beraihuruhane caje turuhin jetao, nii Jacobo cacunu acaauru bai aina siniha Siqueenne coitucuhin jetao, jataain obaaecure nii Jacobo calaohichuru; jataain banejelanaala Isaraelitaauru rai, rautanacaeniha nitohanai icharane jaun. Chaaen chariji bana, nitohanai que suujua acatena nainecurenihane jaun.
8Nitohaneein obaaecuruhane jana jetaote, coitucuelanaala acaauru rai:
“Aonacuche, jataainte taa inara bai jere canu calaohi Siqueen. Aihane jaun atiin jianecuchete, rai comasainu que raaine. 9Aihate nitohaneein canacaanu que naraaiteeichene, inara cacunucuru que necoasaijianaa nainichaanune jana, inara netonai canacaanu cacunucuru que necoasaijianaa nainequiche. 10Cau canacaanu aina neein ichaooche. Caa atanete, inara que banijiaain nenaa rijijieein nereein. Aihane jaunte nainequiche atane coreteein que nocoanajaain ecu ichaohichene”, naa acaauru rai, nii enamanaa inacane jana jetaote, 11nii enamanaa netonoain raajenihane nujuaaen caje jetao, acaauru rai:
“Caa inara rai aitoha ofane jaa rijijieein neeichenena niqui jereeun canuhetonai. Cha chaainti cacaje bajaaiche, niine tereeunni inara raicha. 12Coatiha nii carai chanihei inara rai coretichaaunne amurijiriin inara coreteein nihanuneta. Nii choae tacaainechu, jataain arajiin chaelai que inara belaicheeunnicha. Nena laen caa ranuna jianequiche canu comasainu quene jereeunra”, nae jetao Siqueen nii Dina inaca, conacuru, naaonjoaihunru rai.
13Ne jetaote, coiintiha Dinane sainejeein mucuha Siqueenne jaun jetao, nechu jataain coritaa:
14“Nena nainenihacaanu, leinjiin cacha jaberoco macohi cari saeratelanaala nenaa rai canacaanu bai tihacaanune, jataain banejelanaala nocoejenaa neriha nitohanai canacaanu raine jaun. 15Caa aihacaanune rijijieein, satiin canaanaihuru aina curuaaequiin inara netonai, inara jaberoco macohi cari saerateein neeichene banaachane jererihacaanu. 16Nitohaneein neeichenete laen, nainequiche canacaanu cacunucuru que necoasaijiaaichene, canacaanu netonai inara cacunucuru que necoasaijianaa nainichaanune coina; ita caje nenaa rijijieein, le lauriin ita aina ichaonaa coina. 17Nena laen caa inara rai aitocoaanune rijijieein, inara jaberoco macohi cari saerateneeichene, caa canacaanu bai amaain caalai caje amurichaanuhincha”, naain jetao nii rai calaohi aina curuaecaain nii Hamoro coritaaure Jacobo calaohichuru.
18Niritiin coritanaacuruhane jaun jetaote, rai inaca Hamoro aina esenetaain, 19nii caeneenejelanaala cauhin jetao, rai jaberoco macohi cari saeratiha cue jetao Siqueen, jataain Jacobo cacunu jerihane jaun. Nii Siqueencha que, leeocha naraaichuru que suujua acatecuruhane amurijiriin, que suujua acateein nere tonoraauruha cachaaurune jaun jetaote, 20rai inaca Hamoro aina, nii neseu coenorau cuure. Chaelai que erenaa jerecuruhane, ecu netaojiaain ereerecuruhane jaan turuhin jetaote: 21“Caa cachaaurute cana belaichaneein neeure. Nii jaunte, cau nocoanajaain, caa jana ichaoorureein. Niha jataain banejelanaala neeuruhane jaanu que atane. Chaentechu, acaauru cacunucuru que necoasaijianaa nainichaache, acaauru netonai, cana cacunucuru que necoasaijianaa nainecuruhane coina. 22Nete laen, le lauriin ita aina ichaonaa coina, aihuruha acaaurune rijijieein, satiin canaanaihuru aina jiniiquiin cana jaberoco macohi cari saerateein ichaohacachene jerecure. 23Satiin acaauru que banijiaain nenaa, satiin acaauru irihuru, naaojoaihurite cana raineein niha cureein. Aihane jaun: ‘Nitohaneeinna chujian nerichaanuhin’, naacache acaauru rainete caohachare, cana aina cau ichaooruhane coina”, naaure jetao jelai cocoaichacuru rai.
24Niritocuruha acaauru rai, nii calaohi Siqueen aina Hamorone jaun jetaote, satiin acaauru rijitojoeein esenetaain jetao, jaberoco macohi cari saeratiha cuure nii nese que nejeratenaa nihane cocoaerateein nenacaauru, satiin enamanacaauru, ichauhenaauru, naaonjoaihunri.
25Nitohaneein acaauru esenetaain rai jaberoco macohi cari saeratihacoaauruhane jaun, jaiti cunatoha nii cachaauru jaberocone jana jetaote, neurinanaa nainecurenihane jana, nichata janohane cuhane cuhin jetao, sabere amaain, satiin nii cachaauru saaujiin sohajenajaa cuure nii Dina conacuru Jacobo calaohichuru Simeeon, Lebi, naaonjoaihunri. 26Nitohaneein jetaote, sabere que saaujiin, nii calaohi Siqueen aina curuaecaain Hamoro ateinaain jetao, nii baiha Siqueen loreri caje Dina amaain jelai caje amuure. 27Nii baiha jetaote, acaauru caaijie turuhin, nii onacaauru ichoae situhin cuhin jetao, nii jerenihane sainejeein acaauru bai mucuuruhane coreniha, 28carenero, baca, asno, naaonjoaihunri mucuhin amaain jetao, satiin nii neseu nenacaauru nenaanaja laaroniha nenacaaurune maajeein amaaure. 29Nitohaneein jetaote, satiin loreri asae nenacaauru basijiauhin jetao, satiin canaanaihuru, enecuru, naaonjoainne maajeein amaaure Jacobo calaohichuru leeochaauru.
30Nii jaun jetaote, calaohichuru nii Simoon aina Lebi rai:
“Inae laen jataain banejelanaala, baaso ichaquiche caraicha. Nitohaneeichene corenihate, caque nejerateein ita taojiaa cacoinetiha uurureein caalai cocoaichacuru, Cananeeocuru, Fereseecuru, naaonjoaihunricha. Nii jana, coroatajajeein cachaauru sirichaaunne jaunte laen, satiin caa canu cachaauru aina curuaecaain camuritiin casohin cajaoha uurureein saain cau neiniquichene ainane maajeeincha”, nae jetao, rai calaohichuru Simeeon, Lebi, naaonjoaain rai acaauru inaca Jacobo.
31Niritoha acaauru raine jaun jetaote:
“Inasiicha chujian leinjiin ajaeloroe ichara rijijieein canacaanu bai tihane jana, nirijieein coarajerichaanuta”, naain jetao inaca tonoraaure.
Currently Selected:
Génesis 34: URA
Highlight
Share
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
