Génesis 33

Ita belaihuruha Esao aina Jacobone

1Nii jana, jena fashai cachaauru que corihaneraain uha Esaone coaraain jetaote, bereecuru aina jelai Leara teein jetao, Raqueri netonai te jelai beree aina Jacobo. Jerichanejeein jetaotechu, jelai bereecuru aina coroatajai rai coseenraauru tihacoae. 2Nitohaneein jelai tihacoanajaain jetaote, jauriaanejeein ichoaichaniha rai calaohichuru aina coseenraauru te. Acaauru que jauhecaain jetaote, calaohichuru aina Leara te. Acaauru satononiha jetaote, rai calaohi Jose aina Raqueri te.

3Nitohaneein jelai tihacoanajaane baiha jetaote, acaauru ichoaichaniha cuhin jetao, jauriaalu nii inana Esao coritaane jaun atiin, que suujua acatiha nii Esaone coina caainsi saneein inacuhin atane que nauri turuanacanejeein nenoracae jetao, rai nejera Esao rohan turuhane reentiaain. 4Ne jetaote, coaariin que tacaain jeluhariin coineteein jetao que baluunetiin nojoaun ichoae biji teein nomeri lihoracaa Esaone jaun jetao, ecu jiniiquiin chanaaure.

5Nii baiha jetaote, nii canaanaihuru aina enecuru coaraain jetao:

“Chaauruna jana chaaen caa iniha unacaauru cachaaauru”, naain bajaa Esaone jaun jetaote:

“Ii letononeein neeinnichaaunne coroatajaniha Cana Coaunera tenojoihuru canu calaohichurura”, nae jetao Jacobo.

6Nii jana jetaote, nichuuntaain atane que nauri turuanacanejeein jetao nenoracaaure rai calaohichuru aina rai coseenraauru. 7Nii baiha jetaote, jerichanejeein calaohichuru aina nichuutaain jetao nenoracae Leara. Que jauhequiin jetaote, calaohi Jose aina nichuutaain jetao, jerichanejeein satononejeein nenoracaa uhe Raqueri. Nii jana jetaote:

8“Chatoanai ichana coaauquine jaunna, taa arajiin ii irihuru letoai ichoaichanihane jana, rerohacoanajaain ii coaraa uunte, ichaso”, naa Esaone jana jetaote:

“II belaihane ii rai letoaaun, canu que ii suujua acateeine coinara”, naa Jacobone jaun jetaote:

9“Nirimiinnaare ichaso. Jataainnaane ii belaihure. Lanaaina carai irihuru netonaite. Ichei nihane jaun inaaine sirihura”, naa Esaone jana jetaote:

10“Atiin canu coreniha caa ii belaichaaunne jaa raau; esinae rauhijiriin canu belainera. Inae Cana Coauneraacha jerenohineein jataain canu belaain canu raai natiin. 11Nii jaunna ichei aitoon, ii belaichaaunne coina caa ichei banihateein quiicha uhaauri raaine coinara. Canu coroatajaniha Cana Coaunerane jaunne, jataain arajiin irihocaaunne jaun, nii chaque lanaeneeunra”, naain conujiha Jacobone cotabeniha jetaote, nii belaihane jaa raain: 12“Coanete caelai caje amuhacara. Canu caaijie uune, canu ii ichoaichaniha cunicha”, naa Esaone jana jetaote:

13“Jiaohinera, ichaso. Naininaaun jerihane, ichaso. Iite erojoeein amunaa nainecureniha canaanaihurune coitucuhicha. Chaentechu, aterona caaun oorure satiin carenerocuru aina bacaauru calaohichuru, erojoeein cuhanune le jiichoo cuhanera. 14Jerihanete caohachare, caa ii letononeein neinichaaunne ratiriin ichoaichaniha cuhinera, ichaso. Canune laen, ii caaijie ichoaichaniha uujueeuruha lenone ariirijieein canu irihurune coina jeraaen cohanajaain uujuereeunnicha. Nirijieeinne jeraaen uujueeuruha canaanaihurune rijijieein jeraaen cohanajaain Seiriu ii rene turuhanune reentihaain uujuereeunnicha”, naa Jacobone jana jetaote:

15“Aihujia aihanera, ichaso. Tane iniha inatajajeeinniji caa caniha unacaauru cachaauru ratirite, ichorataaneeuruhine ii irihuru uhanaa quera”, naa rai Esaone jana jetaote:

“Aihachuhisi niquicha, ichaso. Niriimiincha coa tonajiha canu quera”, nae jetao rai Jacobo.

16Niritoha rai nocoala Jacobone jaun jetaote, nii bananeein jelaiha nii nihane jaan Seiriu cauha cue Esao. 17Jana nii Jacobo jetaote, Socoto nichae cuhin ecu turuhin jetao, rai loreri jaain jetao, rai nirihuru loanarite anaa rijijieein enoto jateeuruhane coina. Nitohanihane jaun jetaote, jelai curuaate Socotoneein. “Socoto”, naa ebereeo ere cuhane jetaote, “Anaa rijijieein loreri”, nae.

18Nitohaneein jetaote, Padan-aram caje uhin, jerichanejeein tonajelanaala Canaan batane turuhin jetao, Siqueen nese jeraniha teein jacari caje nenaa que neloanarite Jacobo. 19Ecu jetaote, lefashai monedani coreneein jetao, Siqueen inaca Hamoro calaohichuru caje atane coreteein jetao, ecu teein neloanarite. 20Nii baiha jetaote, ajerichuru caje leinjiin rori jaain nichoae teein iniho mocoha Cana Coaunera raine coina jetao, E Elohe Isaraelineein curuaate. “E Elohe Isaraele”, naa ebereeo ere cuhanene jetaote, “Isaraele coaunerate Cana Coaunerane”, nae.

Currently Selected:

Génesis 33: URA

Highlight

Copy