Génesis 32

Esao aina ita eruuruha Jacobone

1Nitohaneein amuhin, nacoaauneein bero cuhane cuujiha Jacobone jana jetaote, que tacaa cuure Cana Coaunera letonocuru anjeraauru. 2Nii jana coaarinajaain jetaote: “Caate Cana Coaunera turunaja loanarihurunera”, naane jaun jetao, Mahanaaimineein jelai curuaate Jacobo.

Nii “Mahanaaim”, naane jetaote, “coroata turii loanari”, naane aite.

3Nitohaneein cuhin jetaote, Edom batane que nenaa Seiri batane que jetao rai letonocuru letoae Jacobo, inae nichuutaa turuhanune jaun, rai nihana Esao rai turuhane biha cuuruhane coina. 4Nitohaneein letoanajaain jetaote: “Canu inana Esao rai: ‘Tajiaate uujue ii ocoala Jacobo, chatohanaijien jereei ii rai ichaane coina, naainte bajaerate’. Nii ichoae tacaaintechu: ‘Cana coitucuera Laban aina ichaohanu carajaainne jaunne, 5arajiin carenero, baca, asno, canu cachaauru, canu coseenraauru, naaonjoaihunri sirihun. Nii jaunne, canu curuaanaaneeine rai canu ere letoaaun, turuha uhanune jana raotojoeein canu raaine jerenacaaun’, naain benichuche canu inana Esao raicha”, naain jetao rai letonocuru letoae Jacobo.

6Nitohaneein rai letonocuru letoaa Jacobone jana caje turuhin jetaote:

“Inae inana Esao coaracaanune caje turuhacaanu. Inae uujiha ii coaraane coina, jena fashai cachaauru que corianeraain”, naaure jetao nii letonocuru.

7Niritiin turuhin beeuruhane jaun jetaote, jataain casihane jaun, ita rohan coroata lauriin rai cachaauru leruhin jetao, carenero, baca, camecho, naaonjoaihunri te, acaauru nainetiin: 8“Le laurii soha Esaone tonohanau nichotenaa nainiha le lauriine coina”, naain coaaucane jaun.

9Niritiin coaaucane baiha jetaote Cana Coaunera bajaain: “Canu Curuaanaa, canu coitucuera Abaraaun aina canu inaca Isaca Coauneraneein nenaa Cana Coaunera, iite caraaichuru atane cauhanune jereein, chatohanelanaala raotojoeein cauhanune coina cacorataaneeine coina aitohilu. 10Coatiha niqui chaque jataain ichei nelatejehaun caohachaain cacorataaneeine coina. Leinjiin canu biji achuneecha baaejeeinne niqui, caa nucuhe Jorodaaun jera jaohin uunlu. Nena inae ena caa coroata turiin itolereeuru sirihun. 11Nena atiin nabana chatohaneein caetiha canu inana Esaone coataa, canu coroatajaneein canu ichoterateeine jereeun, jataain cacoineteein canaanaihuru sohin, enecurune maajeein sohin jaohane coasichaaunne jaun. 12Iite esinae rauhijiriin cacorataaneeine, caohachaain cuha camune jereein, arajiin nefaauruha janiinacajelanaala canu nefoerateeuru, carene catuniji jeeoneeine coina aitohilu caraicha”, naain jetao Cana Coaunera bajae Jacobo.

13Nii cojoanotiin cuhane ecu siniin jetaote, nii bijihu nenacaauru irihuru janiji, rai nihana Esao belaihane jaanu que. 14Coroata fashaain cabara, coroata chooncaain cabara curuaanaa, coroata fashaain carenero, coroata chooncaain carenero curuaanaa, 15nichata chooncaain rai calaohichuru aina enanejeein calaohi nalaain nenacaauru camechocuru, jena chooncaain baca, lechooncaain toro, coroata chooncaain asno bene, lechooncaain asno, naaonjoaihunri janiji jetao que Esao belaihane coina.

16Nii baiha jetaote, jelai teein janiinajaain jetao, le laurii tihacoae nii rai cachaauru rai. Nitohaneein acaauru rai teein jetaote:

“Chajaain ichoaichaniha amaauche. Chaaen le laurichuru nita ita coarajihanaain cuuruhine”, naain jetao acaauru letoae.

17Nitohaneein letoanajaain jetaote, jauriaanejeein ichoaichaniha niicha letoai rai jetao:

“Ii eruhin: ‘Chu cuhi. Chaa rai caa irihuru amaaiche. Cha ii fatoroonne’, naain inara caje bajaa canu inana Esaone: 18‘Caate ii belaiha letononera, canu curuaanaa Esao. Ii belaihane jaaun letoae ii ocoala ii letononeein neeninu Jacobora. Acate, tajiha uujue canacaanu caijiera’, naain tonoraaura”, naain jetao letoae Jacobo.

19Niritiin nii jauriaanejeein ichoaichaniha cunaa suujuateein letoaain jetaote, nii que jauhequiin cunaa que coaiteen que jauhequiin cunaa rai jetao, satiin nii le laurii irihuru amaaurera rai jetao:

“Esao eruhichene jerichanetojoeein aitocuche: 20‘Canacaanu caijiete tajiha uujue ii letononeein neeninu Jacobora’, naauchera”, naain jetao letoanajae.

“Tane ichoaichaniha caa belaichaaunne jaa letoaain, caniha obaaecane caje ajetera. Nii baihane nainereeun caraajenihane turuhin coaraa cuhanunera. Nirijieeinte, jerihane nainere caohachaain canu belaain canu raanera”, naain coacuhin jetao irihuru letoae Jacobo.

21Nitohaneein jetaote, ichoaichaniha belaihane jaa letoaain jetao aca jelaiha loanari asae nedaain sini.

Leinjiin anjera aina ita soha Jacobone

22-23Nii nedaane cojoanotiin cuhane jetaote nimichuhin, coroatajai comasaihuru, coroatajai coseenraauru, lechoonca leinjiin calaohichuru, satiin niicha sirichuri nirihuru, naaonjoaihunri letoaain jetao leinjiin nucuhe Jaboc jerau jetao joaeratenajae Jacobo.

24Nitohaneein jetaote, inae jelai nedaa Jacobone jana jetao rene turuhin, aina ita soe janoaajeein leinjiin cacha. 25Ne jetaote, nii Jacobo amuritosinihane jaun jetao, rai rorihoco jelai faohitoha nii cachane jaun jetao, ita tarohite nii Jacobo bucu nelaurianaja jelai caje. 26Nii jana jetaote:

“Inae janohara. Caiha neeunra”, naa nii cachane jana jetao:

“Chabana chaainti canu cojiotaai. Nii banaachane iihanereeunnicha”, naa rai Jacobone jana jetaote:

27“Tonaajia ichurujuata”, naa nii cachane jaun jetao:

“Canu curuaate Jacobonera”, naain tonoraane jana jetaote:

28“Inae ena caje coaauneein, Jacoboneein curuaariheeinita. Isaraelineeinte curuaariquiincha, Cana Coaunera aina ita sohin, cachaaurune maajeein amuritohine jaunra”, naa nii cachane jaun jetaote:

29“Chajaain laen ena carai ichurujua beeura. Tonaa ichurujuata”, naa Jacobone jaun jetaote:

“Chaanate cacurujua bajaain coitucunaa jereeita”, naane baiha jetaote, ecu netiin raotojoeein nerichaainne coina Isarael cojiotae nii cacha.

30Nii jaun jetaote, Penoele rauhijiriineein jeelai curuaate Jacobo. “Esinae rauhijiriinne, Cana Coaunera aina ita acatiha turuhin ita coaracaanu; nena atiin, jaiti ichaojoeeun”, naane jaun. Acaauru ere cuhane “Penoel”, naanete, “Cana Coaunera meri”, naane aite. 31Inae janohane jana jetaote, nii Penoele caje rafuute rafuutiin amue Jacobo, cunatoha nii rai niicha faohiti rorihocone jaun.

32Nitohanihane jaun jetaote, enenetojoeein, lenone rorihoco bucu cananasi que lenonecurene nii Isaraele nefoerateeuru, rai rorihoco jeloon faohitonojoi nihalu acaauru foeratera Jacobone jaun.

Currently Selected:

Génesis 32: URA

Highlight

Copy