Génesis 31

Laban caje sorohane coina coaauca Jacobone

1Ne jetaote: “Taa Jacobote, satiin cana inaca que banijiaain nenaa raane jaun, aina jataain itolere sirichaneein coriquihonaneein nera”, naain que ereerejeein amuuruha Laban calaohichurune coitucue jetao Jacobo. 2Chaaen jetaotechu, inae jauriaalu rijijieein, rautaain caohachaain coaraeniha Labanne quene maajeein nainaane jana jetao:

3“Chajaain nii neeuruha charaaichurune jaan, efojiaraauru atane caunihune, canu cuhine jaauru ichorataanera”, nae jetao Jacobo rai Cana Coaunera.

4Nii jaun jetaote, nii rai carenerocuru aina nihane jaan neein cohanajaain jetao, Leara aina curuataain Raqueri cotiharate Jacobo.

5Nii jana, inae uhin rene turuuruhane jana jetaote:

“Inae jauriaalu rijijieein carautaain caohachaain cacoharaeniha taa inara inacane coaracaaunne jaunne inara cotiharateeun inara rai irihanune coinara. Nete itolere bana caniha neein cacorataane canu inaca Coaunera Cana Coaunerara.

6Inarate raotojoeein jataain nainichaaunne jaau tiaajeein, caohachaain nii inara inaca rai amihanihanulune coitucuhichera. 7Nii sainejeeinte: ‘Ichoreterichaaunnicha’, naane nihanatiin, itolere bana araai saain cacoritaera. Nete, nii chatohaneein canu cairichaane nainatejeniha Cana Coaunerane jaun, chatohaneein canu cairichanaa nainenera. 8Nii jaunte: ‘Ichoreterichaaunni taa irihuru ererocolojiaani quera’, naa cacoritaane jana, satiin ererocolijiaanaain calaohichure. Jana: ‘Ichoreterichaaunni daradaraaerii colohi quera’, naanete, satiin daradaraaerii colohin calaohichurera. 9Nitohaneeinte, canu cairichanaa coaauca inara inacane jana, canu rai tihane coina, nii inara inaca caje nii irihuru ruluelu Cana Coaunerara.

10Inae rai curuaanaa jerecuruha nii irihurune jana sinihanune janate, casene nii benecuru amijiaauruha cabaraauru curuaanaacuru ererocojoaain, daradaraaerii colohin, naaonjaoihunrine coaraaun. 11Nii canu sinihute, canu curuaateein, canu bajaa Cana Coaunera letono anjerane jana: ‘Cauna neeunra’, naain tonoraanune janate: 12‘Caohachaain rautaain coaraainete, caa bene amijiaauruha caa ererejerii, daradaraaerii colohin, naaonjoaihunrine jana coaariquiincha. Nitohaneeinte ii coritaa Labanne jana, que nainaain, ii coroatajaniha ichacaaunne que nainariquiincha. 13Canune, ii Coauneraneein, Beteli ichei ecoona neeunra. Ecute ajeri chujuriaain canu coroajeein aitohilu, ii coroatajanichaaunne, canuhacha jerei icharaneein neeine coinara. Aihane jaun chajaain nimichuhin nii neein nejanoaailune jaau, chatane caunihura’, naain beratiha canu rai Cana Coaunerane rijijieein be canu rai Cana Coaunera letono anjera”, naain jetao Leara aina Raqueri rai be Jacobo.

14Niritoha acaauru raine jaun jetaote:

“Coatiha chujian inae nihei canacaanu rai cha, Ofa loreri asae canacaanuhacha coaauneni. 15Chaaen nejelau coaana rijijieein, canacaanu coaraa Ofa natiin. Coaraau nachuhinti canacaanu que necoritihalu ii raine jaun, ii amihaneeon que canacaanu coreteeine jaan aina arajiin irihuru siriin necoriquihacalu niquineta. 16Nete esinae rauhijiriin, nii necoriquihaca ofane jaan ruluhin, cana calaohichuru raine maajeein nelatihane coina, cana rai te Cana Coaunera. Aihane jaun, satiin nii ichei aitoha Cana Coaunerane rijijieein ichaaura”, naaure jetao Jacobo rai Leara aina Raqueri.

Padan-aram caje amuha Jacobone

17-18Niritocuruha rai comasaihurune jaun jetaote, neruujueein, bereecuru, comasaihuru, itolere rai rucuheleeuru naaonjoaihunri camecho ichoae teein jetao, nii Canaan ichaohalu inaca Isacane jaaun jetao cauha cue Jacobo. Nitohaneein jetaote, bero cuhane cuhin, nii Padan-araum namihaneeon coreniha niicha rai nirihurune maajeein amaain cue.

19Nii jana jetaote, rai carenerocuru ujuhi jaoha cuha Labanne tonohanau jetao, rai loreri asae niicha sirii rai chosichuru basijiae Raqueri. 20Nitohaneein jetaote, nii Arameeoneein nenaa Laban rai amuhane belanaala jetao, 21jitariin niicha sirii rucuhele amaain cuhin, carajaelanaala leinjiin nucuhe Eufrates jera jaohin jetao, Galara batane bichatane jeloon cue jetao Jacobo.

Jacobo sacuha Labanne

22Inae nichata janoha amuha Jacobone baiha jetaote, amuhane coitucue Laban. 23Nitohaneein amuhane coitucuhin jetaote, rai naraaichuru que corianeraain sacuhin jetao, caainsi janone cuhane jetao eruha cue, Galara batane bichatane ne jana. 24Nitohaneein eruhane cojoanotiin cuhane jetaote, Arameeoneein nenaa Laban sinihu ecocohin jetao: “Jiaonriha Jacobo cotaicha rijitiin rai ereeinera”, nae jetao rai Cana Coaunera.

25Nitohaneein Galara batane bichatane jacari caje nenaa que neloanariteein niha Jacobone jana eruhin jetaote, acaentonai rohan neloanariteein jetao: 26“Chaanate sonaana que nenaa caje rulunajaain ichara rijijieein catohaneein cacoritaain, canu cacunucuru uhaaita. 27Bana carai beein aine jana nihanena, auno aina toonto toteein rachoojoeein ichei necoereeunra. Nete carai belanaala, nasiin cacoritaain uhi.

28Niheichu canu cacunucuru, carinajaauru, naaonjoaihunri nomeri lihoracaain, acaauru rai necoihanune jereein aiheeita.

Jataain leinjiin aaso cacha rijijieeinte aiicha.

29Nainichaaun niqui jitariin chatohaneein inara tihanunera. Nete enene janotiin canu sinihu: ‘Jiaonriha Jacobo cotaicha rijitiin ereei rainera’, naa chaca Coaunerane jaun chatohaneein satiin inara tenaa naineneeunra.

30Chanuna jana chaaen jataain efojiaraauru nenajaun caunaa jereeine jaun, uhinatiin carai chosichuru basijiauhin uhaai”, nae Jacobo rai Laban.

31Niritoha rai Labanne jaun jetaote:

“Aihanu chuhisicha. ‘Jerecurenihane nihanatiin jecha, caa ii cacunucuru rulureei cacaje’, naanune jaunne canu necasa caaun aihunra. 32Nete, chunucohacuru cau nenacaauruniji, nii ichei chosichuru sirihane caohachae ohanera. Ena coarajeeuruha caa cana araaichurune notaracae, canu rucuhele jana ii rucuhele ariin eruhine amaaunra”, nae jetao, nii Laban rai Jacobo.

Ne jetaote, nii chosichuru basijiauha Raquerine coitucuenihane jaun aite Jacobo.

33Nii jaun jetaote, nii Jacobo loanari asae enohin arihane baiha jetao, Leara loanari asae enohin ariin, nii coroatajai coseenraauru rucuhele janane maajeein ariha natiin jetao, nii rai chosichuru eruene Laban. Nitohaneein jetaote, Leara loanari asae arihane caje mituhin, Raqueri loanari asae enohin ariha cuhane jana jetao, 34camecho ichoae nelauriananaja rori asae nii rai chosichuru teein jetao, nichoae nelauriaa lauhecoha Raquerine jaun jetao, nii loanari asae ariha natiin jetao eruene Laban. 35Nii jaun jetaote, inae nii Raqueri rohan turuhane jana jetao:

“Ofa, jiaonriha nimichuhenihanune coreniha obaaequichenera. Enene nelauriaanune jaunne nimichuna naineneeunchera”, nae jetao Raqueri.

Nitohaneein nii rai chosichuru eruelanaala, Jacobo rucuheleeuru jana ariirijiha Labanne jana jetaote, 36obajeein jetao nii Laban rai:

“Chatohanaina ichei ichaain neosateein neeun, cacairichanaa coacuhin catohaneein casaauquine coina. 37Inae jitariin carujeleeuru jana, ichujeleeuru arii. Chajana ichujeleneein carujeleeuru jana eruhi. Eruhine caa charaaichuru aina caraaichuru acatiha teeute coaracurumiin. Aihate acaauru, ‘Charijicha nii ujuaihoneein ne’, naain coaracurumiin.

38Caa coroata choonca jaanacaneein ii rai amihanihanune que, nii chariji bana suri cuhane calaohichuru jitohin neeuruhilu ii rai carenerocuru, cabaraauru, naaonjoaihunri. Coatihachu chariji bana nii irihuru caje leinjiinniji carenero quiin nerejetohaaunlu. 39Nechu taebinae sonojoineein nitajeeuruha nii ii irihurune nihanatiine, chabana ii que coaaratelanaala nii sonaaneeuruhane coreteraaetoonlu. Janotiin, jiichoo, naaonjoaain ii irihuru basijiaauruhane nihanatiinte canu cobaraaine, canu jitariin nii nitajenacaauru coreteraaetoonlu. 40Nitohaneeinne, jiichoo ajaaronaa que necairichajeein, janotiin jelaronaa que necairichajeein, naaonjoaain sinirena quene maajeein necairicharejetoonlu.

41Nitohaneeine coroata choonca jaanacaneein ii loreri asae neein, lechoonca jena jaanacaain coroatajai ii cacunucuru coreniha ichei amihaneeunlu. Jana ii irihuru coreniha, ichei saota jaanacaneein amihanihanune janate, ‘Ii coreterihanuhincha’, naainatiin chabana nii aitohine jeeoneein telanaala, itolere bana coroatajaenanaain terejetohilu. 42Bana cacorataaniha Abaraaun Coaunera, canu inaca Isacaacha coroaerejeti Cana Coaunerane colanete, esinae rauhijiriin nii cha colane, cacoiicha baejeein caratiricheei. Nete, jataain inaderaanune coaraain, camijianeeonne maajeein coaraa Cana Coaunerane jana, cairichaaojoaanune jaunte, canu coroatajaneein, nabana chatohaneein caeteeine caohateein janotiin ichei aitonicha”, nae jetao Laban rai Jacobo.

Raotojoeein ita rerohecaelanaala neeuruhane coina, Jacobo rai aitoha Labanne

43Niritoha rai Jacobone jaun jetaote:

“Caa enecurute, canu cacunucurune. Jana canaanaihurute, carinajaaurune. Satiin caa carenerocurute canu raine. Satiin cau caa iicha coarajeite, caraineein ne. Nena inae canu cacunucuru, acaauru bereecuru, naaonjoaihunri aina cha chana naineneeun. 44Aihane jaun chajaau caute ita rai rucujueein, ita que jerajejeein rucuhecaane coujunacane que ichacaara”, nae jetao Jacobo rai Laban.

45Niritohane jaun jetaote, leinjiin ajeri raain, ecu chujuriaain jetao:

46“Chajaauchete cau ajeri codoriae”, naa naraaichuru rai Jacobone jaun jetaote, nii aitohane jaun teein, arajiin ajeri codoriaaure satiin. Nitohaneein jetaote, nii ajeri niicha codoriaauri rohan teein lenonecure.

47Nii jaun jetaote, jelai curuaate nere cuhane, “Jeqar Sahadota”, naain Laban. Nii jana Jacobo jetaote, nere cuhane, “Galara”, naain jelai curuaate: “Rucuhena coujunacaneein le turiin codohaque ajeri”, naa acaauru ereeuru cuhanene jaun.

48Nitohaneein jetaote: “Caa ena, itaque jerajejeein rucuhecaane jaan coujunacaneeinte ne caa ajeri canaacha codoriai”, nae jetao Laban. Nii jaun jetaote, Galara neein jelai curuaateein, 49Mizpaneein jelai curuaateeure jetao:

“Cana beraaine Cana Coaunera caa itaque jerajejeein nihacane baiha ita coaana nainenihacane jana, nabana chatohaneein ita tenaa coataara”, naane jaun Laban. Niritiin jetaote: 50“Aihane jaun, canu cacunucuru que nererojoecaain, acaauru aina neeine choae tacaain, leeochaauru enecuru raaine jana, coaracureniha caa cana jana nenacaaurune nihanatiinte, Cana Coaunera nii coaraa cureein”, nae jetao Jacobo rai Laban.

51Niritiin jetaote:

“Aonaaun. Nocoa caa ajeri codohaque. Nocoachu caa ajeri, cana cataaun teein quiicha chujuriai. 52Aihane jaun, caa ajerichurute, nabana rerohin cuhin, ita rerohecaain naaonjoana coataa coujunacaneein ne. 53Caa cana aitoonjoan tonoraenihacane, cana casetecaaine ii rinaja Abaraaun Coaunera canu rinaja Nacoro Coauneraneein nenaa Cana Coaunera”, nae jetao Jacobo rai Laban. Nii jaun jetaote, rai inaca Isacaacha coroaerejeti Cana Coaunera notaracaa netiin jetao jere Jacobo. 54Nii baiha jetaote, ichatane ecuuno que rai niri sohin Cana Coaunera rai mocohane baiha jetao, enoalaain rai naraaichuru cotihaca Jacobone jaun jetao, satiin turuhin lenoneein jetao nii ichatane ecuuno janoore.

55Nii cojoanoo janone nimichuneein jetaote, rai rinajaauru meri lihoracaain, cacunucuru merine maajeein lihoracaain jetao: “Raotojoeein neeuche”, naain necoeein jelaiha natane cauha cue Laban.

Currently Selected:

Génesis 31: URA

Highlight

Copy