Génesis 30

1Nii jana, Jacobo aina canaanai sirisinihane coaraane jaun jetaote, nii ninana Leara que jetao jataain necoelai rai nocoasai Raqueri. Nitohaneein necoelaihane jaun jetaote:

“Canu beree tesineeinene inae oreeunnicha”, nae jetao Raqueri, Jacobo rai.

2Ne jetaote, niritoha raine jana obajeein jetao:

“Inasiina Cana Coaunera nichaaunne coalanaala, ichei leinjiin canaanai tereeun. Cana Coaunerate, canaanai siriine jerenihane jaun, leinjiinniji canaanai siriheeincha”, naain jetao Raqueri cotai Jacobo.

3Niritohane jaun jetaote:

“Aonaaun. Taa canu coseenra Bilaa raau ii comasainu que. Aihate, iniha canaanaihuru sirihane, jerichanejeein canu aina siricha rijijieein canu bereeneein neeuruhinera. Nitohanihane banaachate, canu rai nenaa nainere canaanaihurura”, nae jetao Raqueri.

4Nitohaneein jetaote, rai coseenra Bilaa te jetao, Jacobo comasainu que Raqueri. Nii jaun jetaote, rai comasainu que Bilaa raa Jacobone jana jetao, 5inae Jacobo aina leinjiin calaohi siri Bilaa. 6Nii jana jetaote, inae nejanoaa nii canaanaine jana jetao: “Caa canaanaite Daanneein curuaareeincha, bajaae bajaaecaaunne aonaain, esinae rauhijiriin latichaaunne coitucuhin, leinjiin quicha cojoahuajai tiha carai Cana Coaunerane jaunra”, nae jetao Raqueri.

7Nii baiha nacoaauneein Jacobo aina leinjiin calaohicha Bilaane jaun jetaote: 8“Jataain mainajeein counujueein, canu inanai amuritohanune jana nenaanihane jaunte, Neftalineein curuaareein caa canaanaicha”, nae jetao Raqueri.

9Nii jaun jetaote, inae canaanaihuru sirina inaenihane coaraane jaun jetao, rai coseenra Silfa te jetao, Jacobo comasainu que Leara. 10Nii jana, inae leinjiin calaohicha Jacobo aina Silfane jana jetaote, nejanoaane jana: 11“Caa canaanaite, Gadaneein curuaareein, canu rausiaeca nenaa nihane jaunra”, nae jetao Leara.

12Nii baiha nacoaauneein Jacobo aina leinjiin calaohicha Silfane jana jetaote: 13“Inae laen, ‘Rachoojoeein ichaonaa’, naaururichaain caque camute enecurura. Nii jaunte, Asereneein curuaareein caa canaanaicha”, nae jetao Leara.

14Nii jana jetaote tirico tainaca bana ocoana jana cuhin, mandragora jii eruhin, neba Leara rai uhaain te Robeen. Nii jana jetaote, nii mandragora jii coaraain:

“Atiin inatajajeeiniji, nii ii rai ii calaohi uhanojoin mandragora jii que caisihura”, nae jetao Leara rai Raqueri, canaanai sirina inaenihane nihanatiin nii mandragora jii quihane canaanai siriha enecurune esenetaauruhane jaun.

15Nitohaneein caje nii mandragora jii bajaa Raquerine jaun jetaote: “Inae acaihaniji que, canu lana Jacobo ruluhi canu caje natiinnachura, nacoaauneein canu calaohi tenojoin mandragora jii rulunaa jereei cacajete”, naa Learane jaun jetaote:

“Nii mandragora jii, ii calaohi uhanojoi teei carainete, coreniha enene janotiin ii aina sinicheein Jacobora”, nae jetao rai Raqueri.

16Nii jaun jetaote, nii cosonaina que ocoana caje turuha uha Jacobone jana jetao, que tacaain coineteein:

“Enene cojoanotiin cuhane caniha siniine coinane canu calaohi uhanojoin mandragora jii teeunni Raqueri raicha”, nae jetao Jacobo rai Leara.

Nii cojoanotiin cuhane jetaote, aina siniha Jacobone jaun jetao, 17aina canaanai siriin, Jacobo aina rai bereecuru nesaoquinu siri quicha cojoaajineein Leara, Cana Coaunera bajaane jana, coroatajaniha Cana Coaunerane jaun.

18Nii jaun jetaote, inae nejanoaane jana: “Caa canaanaite, Isacaraneein curuaareeincha; canu lana rai canu coseenra tihanune coaraane jaun cacorataaniha Cana Coaunerane aina sirichaaunne jaunra”, nae jetao Leara.

19Nii baiha coaiteen Jacobo aina canaanai siriin jetaote: 20“Cana Coaunerate, jataain cacoelaihane jaun, carai cacoerejeeuru saotanenu te caraicha. Inae caa saotaneein aina calaohichaaunne jaunte, jeelai amuritoheriin canu jerereein calanara. Nii jaunte Saboloonneein curuaareein caa canaanaicha”, nae jetao Leara.

21Nitohaneein jetaote, canaanai sirihane satononejeein leinjiin ene cojoaajineein cacunocohin, Dinaneein curuaate Leara.

22Ne jetaote, canaanai sirina inaenihane jaun bajaae bajaaenajaaoca Raquerine coacuhin jetao, canaanaihuru sirihane coina coroatajane Cana Coaunera. 23Nii jaun jetaote, jauriaanejeein calaojoiin jetao: “Canaanai sirina inaenihanune jaun, nocoejenajaaocaaunne janate, inae carai leinjiin quicha cojoaaji te Cana Coaunerara. 24Bajiaanachuinti nacoaauneein sirichaaunne coina cacorataane neta”, naane jaun jetao, Joseneein nii calaohi curuaate Raqueri.

Ita coritaauruha Laban aina Jacobone

25-26Inae nitohaneein nii calaohi Jose janoaa Raquerine baiha jetaote, nii rai tanaa Laban rai jetao:

“Chajaain laen, caa canu comasaihuru, canu bereecuru, naaonjoain aina curuaecaain caihaneeune, jelaiha catane caunicha. Iite raotojoeein acaauru coreniha ichei amihanihanune coitucuhicha”, naa Laban rai Jacobone jana jetaote: 27“Saan. Aihachuhisi niquicha. Niriichamiincha. Atiin cacoreniha jiaonriha amuhine. Cau caniha neechaaura. Ii coreniha cacorataaniha Cana Coaunerane cojoeluinaain coitucuhanune jaunna aitoonra. 28Inaaonjoaain esinae rauhijiriin ichoretihanune jereeita. Chajaaincha beeu carai ichoretihanune coinara”, naa Labanne jaun jetaote:

29“Iite ichei amihaneein, ii irihurune maajeein beraain, naaonjoaanune coitucuhi. 30Jaiti turuhenihanune jana, coroatajajeein siriilu natiinte, caa turuhin inae ichei beraihanune caje coaauneein ichorataaniha Cana Coaunerane jaun, inae arajiin nefae ii irihurura.

Nitohaneein ichei amihanejeein sacuhanune. Cha banaa chajian jana jelai teein cacoerejeeuru sirina nainichaaunne coina, caraine que amihanereeunta”, naa Jacobone jaun jetaote:

31“Aiha laen esinaera. Inaaonjoaainjia ichoretihanune jereeita”, naain conujiha Labanne jaun jetaote:

“Nii chaque cacoreteeine jerihaaun niquita. Nena ena ichei aitorichaaunnine jereeine, nacoaauneein ichei carenerocuru beraicheeunnicha. 32Jereeunejian, taa ichei neeuruha carenerocurune jaa caje carenerocuru narejeen, cabara narejeencuru, satiin taa jichonerei, satiin ererocojoai, daradaraeriin, naaonjoaain nenacaauru elonajacoae jelai teeincha. Acaaurute, camijianeeon coreneein niha cureeincha. 33Nii banate, jelai camijianeeon core tihanune jana, coaraa uhine bana ichoasijiaelanaala caohachaain iniha ichacaaunne coaariquiincha. Jana, nii carai carenerocuru jichojoai, chaaen cabara ererocojoai, daradaraerii, naaonjoaain nenacaauru jana niha somanerinete, ii basijiauhanune jaun aicheeincha”, nae jetao Laban rai Jacobo. Niritoha raine jaun jetaote:

34“Saan. Nitohanihanena chujian jereeunra. Caohatoha nii carai aitohine rijijieein ichaainera”, nae jetao Laban.

35Niritiin jerihane saijieein jetaote, nii aitohane bananeein, nii sirihane jaa caje, satiin carenerocuru jichojoaain nenaa, chaaen ererocojoaain nenaa, daradaraeriin colohin nenaa, somajai que jasisiin nenaa cabaraauru, naaonjoaihunri elonaain jetao, jitariin calaohichuru rai te Laban, beraaihuruhane coina. 36Nitohaneein jetaote, nii irihuru niicha ranojoi amaain, nii niha Jacobone jaa caje, nichata janohin atane choae cuhin jetao, ecu tenajae Laban. Nitohaneein nii naitoonjoan carenerocuru amaa Labanne saijieein jetaote, ecu Laban rai carenerocuru leeochaauru beraiha jetao ne Jacobo.

37Nii jaun jetaote, enuha alamo, almendro, castaino, naaonjoaihunri uune sauhin raain jetao, rolohin 38-39nii acau cooruha irihurune jaa rohan jetao, nii enuha rolone temuaaje, acau cooruhane jana coaracuruhane coina. Nitohaneein jetaote, ecu necoodoriaain nii enuha rolone coarajeein bene amijiaa curuaanaane jetao, ererocolojiaanaain, daradaraerii colohin, naaonjoaain nihacoae calaohichuru.

40Nitohaneein jetaote, nii Laban rai caje, satiin nii daradaraeriin, jichositohanai, naaonjoaain nejanoanacaauru jelai tihacoaain jetao, le turiin rai irihuru te Jacobo.

41Nitohaneein acau cooruhane coina netaojiaain, ecu ita amijiaauruha nii carenerocuru aina cabaraauru jataain coerenetonanaine jana jetaote, nii acau cooruhane jaa rohan nii enuha rolone te Jacobo, coaracuruhane coina. 42Jana uuruha, carenerocuru aina cabaraauru jarejeerihanaine jetao, coatiha nii enuha rolone tihei Jacobo.

Nii jaun jetaote, nii carenerocuru aina cabaraauru jarejeerihanai Laban raine. Jana nii coerenetonanai jetaote, Jacobo raine. 43Nitohanihane jaun jetaote, jataain coriqui sirihane jaun jetao, arajiin camecho siriin, carenero, asno, naaonjoaihunri sirihane jaun jetao, arajiin nelu rai cachaauru, coseenraauru, naaonjoaihunri.

Currently Selected:

Génesis 30: URA

Highlight

Copy