Éxodo 2

Moisesa nejanoha

1Nii jana jetaote, jeelai lauri caje nenaa ene que necoansaijiae Lebi inamaco neein nenaa leinjiin cacha. 2Nitohaneein jetaote inae leinjiin canaanai sirichuruhane jana, jataain caohachaaeritiin nejanoaane jaun jetao, nichata ateein asinojoineein jetao siri rai neba. 3Nejetaote inae carajaain asinojoineein sirina nainenihane jaun jetao jiarana rijijieein nenaa caje ichanohin omari cuhane nii canaanai teein jetao caohatiin murane que couisineein Nilo neein curuajai nucuhe auhaniha jetao modohecaain, nii canaanai bai que jetao beraichate rai neba. 4“Chatohaneein teeuruhane coarajeeu coriaae netiincha”, nae jetao rai neba.

5Nii jana jetaote, fauhin nacaaonjoaan cue Egipto curuaanaa Faraaon cacunu, beraiha nucuhe auhaniha amuhemuhecuruha rai coseenraaurune tonohanau. Nii jana jetaote, modohecoha jiarana caje ichanohin omarine coaariin jetao, coseenra leeocha rai jetao, “Carai taa omari ranihune coaraera”, nae jetao Egipto curuaanaa Faraaon cacunu. 6Nitohaneein nii jiarana caje ichanohin omari joracaain coaraa Faraaon cacunune jana jetaote, cuhane neein chanaae chanaje nii canaanai. Nii jaun jetaote, cairichaaojoain coaraain, “Caate Ebereeo bereenera”, nae jetao Egipto curuaanaa Faraaon cacunu.

7Nii jana jetaote, nii Faraaon cacunu rohan nichuuntaain jetao, “Coane ichei sisiaain fojiaane coina, leinjiin Ebereeo bene cotihanicha”, nae Faraaon cacunu rai nii canaanai bai.

8Nii jaun jetaote: “Chajaain aihane cotihanihu caraicha”, nae jetao Faraaon cacunu, nii canaanai bai rai. Nii jaun jetaote, nii canaanai neba cotijiaain Faraaon cacunu rene turuhane jana, 9“Carai caa canaanai fojiaaura, ii coreterichaaunicha”, naain jetao, nii canaanai te neba rai, nii Faraaon cacunu. Nii jaun jetaote, nii canaanai amaain loreri asaae teein fojiaain, 10inae fohecane jana Egipto curuaanaa Faraaon cacunu rai jetao, nii canaanai te, nii neba. Nii jaun jetaote, rai beree rijijieein siriin jetao: “Canune acauhana ne jana raaun”, naain jetao Moisesa neein curuaate Egipto curuaanaa Faraaon cacunu.

Egipto caje soroha Moisesane

11Inaae ichauhenaneein turuhin naraaichuru coaraa cuha moisesa ne jana jetao, amihanenaa caaintati que necairichaecuruha naraaichuru coarae jetao Moisesa. Nii jana jetaote, nii Moisesa lauri caje nenaa leinjiin ebereeo sohaje jetao leinjiin Egipto cocoaicha. 12Nii jana jetaote coaariin, coarajeeuruha leeochaaurune coataa cajihaneein cacha coroontaane baiha, neniha cachane coaraain jetao nii leinjiin Egipto cocoaicha sohin carene bajeein jetao conaute Moisesa. 13Nii Egipto cocoaicha sohin jaohane cojoanoo jetaote, coaiteen amuhemuheca cue Moisesa. Nii jana jetaote, Isaraele cocoaicha nejesina nejeein jetao ita sooruhane jana jetao, “Chanuna nejesinajeein ita sohiche”, nae jetao Moisesa acaauru coaraain.

14Nii jana jetaote, “Nii leinjiin Egipto cocoaicha sohin jaaoine rijijieeina casohin cajaonaa jereeite. Chana curuaanaa neein teein ii cocoainae, niritiin canacaanu rai ereeine coina”, naain jetao Moisesa tonorae nii Isaraele cocoaicha.

Niritoha rai nii Isaraele cocoaichane jaun jetaote, esinae rauhijiriin aitohane jaun jetao nainacori nii Moisesa.

15Niritoha rai nii Isaraele cocoaichane jaun jetaote, esinae rauhijiriin aitohane jaun jetao nainacori nii Moisesa. Nii jana jetaote, inae nii leinjiin Egipto cocoaicha sohin jaohane coitucuuriin jetao, sohin jaohane coina Moisesa arichatiha Egipto curuaanaa Faraaonne coasiha, Egipto caje Mariaan batane que cuhin, sorohin ichaoha cue jetao Moisesa. Nitohaneein sorohin jetaote, atane jachu cuhane acau raauruhane jaaun rohan turuhin, cuu nelauriaain jetao lauheque Moisesa.

16Nii jana jetaote, nii atane jachu caje acau raa uure caainsineein Cana Coaunera bajaera saseredote Roeli neein curuajaain nenaa Mariaan cocoaicha cacunucuru. Niichuru jetaote, nii atane jachu caje acau rocohin roriha cuhane teein, inaca rai carenerocuru cocoaauruhane coina cuu turuure. 17Nii jana jetaote, nitohaneein itolere bana nii acau raauruhane jaan atane jachu caje acau raauruha nii saseredote cacunucurune, ajiniha nii saseredote cacunucuru sitaaure leeocha iri beraihureraauru. Nii jaun jetaote, coaraain nii ranunaauru comaleein, nii iri beraihurera baaso sitaain, nii atane jachu caje acau rocohin, nii carenerocuru cocoae nii Moisesa.

18Nii jaun jetaote:

“Cha aaonriana carajaelanaala turuhiche”, naain bajaa acaauru inacane jana jetao:

19“Canacaanu rai, iri beraihurera sitaain, acau rocohin carenerocuru cocoaain, canacaanu comaliha Egipto cocoaichane jaunna aaonriana carajaelanaala cauhacaanura”, naauruhane jana jetao:

20“Aanca chaaen nii cacha. Chanuna jelai ratiriiche. Chajaain cotihanihuchete lenoniha uhinera”, nae jetao cacunucuru rai Roeli. 21Nitohaneein jetaote, nii ucuaetoha nii Roeli loreri asaae ichoae nii Moisesa. Nii jana jetaote, nii Sejora neein curuajaain nenaa rai cacunu que nii Moisesa comasaijiae jetao nii Roeli. 22Nii jaun jetaote inae canaanai siri nii ene Moisesa aina. Nii jana jetaote “Canune leeocha atane caje uhin, caa nejelau atane que ichaoha uun”, naane neein jetao Gereso neein nii beree curuaate Moisesa.

23Nii jana jetaote, carajaaeriin nii baiha ohe jetao taoni Egipto curuaanaa Faraaon. Nii inatiin jetaote, inaderaain nererojoecaaeriin sacuure Isaraele cocoaichacuru, mainajeein amihanenaa tabai que cairichanajaauruha Egipto cocoaichacurune coreniha. 24-25Nii jana jetaote, inaae inoaelu acaauru inoaesi Abaraaun, chaaen rai calaohi Isaca, chaaen nii Isaca calaohi Jacobo, naaonjoainuri aina nitohaneein acaauru inamacooru rocoha Egiptoo necairichaauru cajene coina inae inoaelu aitosihalu acaauru inoaesi Abaraaun aina Cana Coaunerane jaun jetao coacuhin Moisesa cotijiaain, Egipto caje Isaraele cocoaichacuru rocohane coina Egiptoo Moisesa letoae jetao Cana Coaunera.

Currently Selected:

Éxodo 2: URA

Highlight

Compare

Copy