Ichanohichuru 19

Efesoo turuha Faborone

1Coriinto niha Aforone nainiha jetaote, Efesoo cue Faboro. Efesoo turuhane coina jetaote, ichatane tabai ucuuno que iniin, ichatane tabai choae situhin, turuha cue jetao, Efesoo Faboro. Cuu jetaote, le laurijieein Jesocurisito esenetaeraauru aina ita eruure jetao. 2Nitohaneein, erunajaain jetaote, acaauru rai:

“Tana, Jesocurisito esenetaaichene nunuheteeichene bana, inae Cana Coaunera Suujue raain neeicheluneta”, naain acaauru caje bajaa Faborone jana jetaote:

“Aihaacaanuta. Coatiha chaabana niritiin, esenetaerauru rai, rai Suujue tiha Cana Coaunerane coitucuhaacaanuta”, naain tonoraauruhane jaun jetaote:

3“Chatoanai quetejia, baotisanojoineein neeicheta”, naain bajaa Faborone jana jetaote:

“Cacha baotisaain coujunacatihalu Joaane rijijieeinchate, canacaanu cojunacateein neeunlura”, naain tonoraauruhane jaun jetaote:

4“Aiha chuhisicha. Nii Joaante chuisi rauhijiriin Cana Coaunera esenetaerauru cojunacaatelu baotisaain. Chaentechu nii caaijie turuheneni Jesoso esenetaauruha saain cachaaurune coina beebejelu”, naain beebejiha acaauru rai Faborone jaun jetaote, 5Cana Curuaanaa Jesocurisito coreniha, inae baotisaain cojounacatenohineein neeure. 6Chaaen, acaauru choae biji merecaain, Cana Coaunera bajaa Faborone jana jetaote, acaauru choae fauha uha Cana Coaunera Suujuena jaun, itolere nejelau ere que ereein, Aitorohatiha Cana Coaunerane beebejeeure. Nitohaneein jetaote, rai nere cuhanene maajeein Cana Coaunera beratenojoi ita rai beebejeeure. 7Itolereneein jetaote, lechoonca coroatajaaure, nii cachaauru- Cana Coaunera Suujue raeracuru.

8Nichata ateein, cuu neein jetaote, netaojiaauruha Jorioocurune jaan loreri sinacoca asaae cuhin, Cana Coaunera ere beebeje jetao, Faboro, chaque casilanaala. Cuu jetaote, “Naaojoarichaain nii Cana Coaunera Cojoanonaa Ena Turunaa”, naain beebeje, esenetaauruha cachaaurune coina. 9Ne jetaote, tabaauru, nechu jataain, cotaiha esenetana jerecurenihane jaun, esenetana jerelanaala jetao, satiin aonajeeurera urichoo baasoneein, nii Ena Turunaa Ichaonaa que ereeuruhane jaun jetao, cuu ratirinajaain, cachaauru relaa leeinjiin cacha Tiranoneein curuajaine jaan coloheri asaae, nii Jesocurisito esenetaeraauru jitariin amaain jetao, nelonae Faboro. Cuu jetaote, cojoanoonetojoeein, Cana Coaunera ere beebeje jetao, Faboro. 10Nitohaneein jetaote, cuu coroata jaanacaain, cacha relaane jaun jetao, Asia batane sacutaain nenacaauru, Jorioocuru, Jorioniheichuru maajeeinchuru, Cana Curuaanaa aitoonjoan beebejiha Faborone jaun, aonacure.

11Nitohanihane jaun jetaote, Faboro aina cuaain jetao, itolere cojoaelanaacojoai ichaain jetao, cachaauru notajae Cana Coaunera. 12Nitohaneein coroatajaniha Cana Coaunerana jaun jetaote, Faboro que, cajione turuaain, amaain jetao, cunaitenacaauru dadaauruhane jetao, nerautaaure itolere cunai caaun cunaitenacaauru, itolere coitucuchuichuru ichanaaneeinchuru cunaitenacaauru caje jetaote, nii coitucuchuichuru sitae.

13Nii jana jetaote, neeurelu benaneneein nenacaauru Jorioocuru amuhemujueein moconajaaera ichanaaneein cunaitenacaauru rautaeraniha nenacaauru. Niichuru jetaote, “Jesoso coreniha mituuche”, naain, nii suujua cuhane moconajaaera letono sirichaauru caje sitaauruhane coina jetao, coacuhin, ichaa Faborone rijijieein jetao, nii moconajaaera ichanohineein coitucuchuhi que, cojoeeonacaauru rai jetao: “Faborohacha beebejei Jesoso coreniha, nii cacha caje mituhin amuura”, naaure jetao.

14Leeinjiin Jorioo Esesebaneein curuajai calaohichuru- caainsineein nenacaauru jetaote, nitohanecure. Nii Esesebate, saseredotecuru curuaanaaneein ne. 15Ne jetaote, coitucuchuichuru sitanaa jerecuruha, que cojoeeonaa cajene jana jetao:

“Canune, Jesoso coitucuhin, Faborone maajeein coitucuunra. Jana laaen, inara coitucuhaaun. Cha nequiche chaainti inarata”, 16naa nii cacha suujueniha netiin nii coitucuchuhine rijieeoritiin jetaote, acaauru choae tacaatiin jetao, sonajae jetao, acaauru amuritiin nunujuetohana jaun jetao, banejelanaala jataain cunaitanajaain, jitariin acaauru cajionene maajeein, caohachanainejeein, soaisoairiin sonajae jetao, nii coitucuchuhi que cojoeeona cacha. Nii jaun jetaote, machorojoa machorojoaain jetao, nii neeurunajaa loreri caje jetao, soroore. 17Nii nitohanihane jaun jetaote, satiin nii Efesoo nenacaauru Jorioocuru, Jorioniheichuru, naaonjoaihunri satiin, nii coitucuhin casihure. Nii jaun jetaote, itolereneein, Cana Coaunera Calaohi niha Cana Curuaanaa Jesocurisitone coitucuure jetao, beebejeeuruhane jaun.

18Nitohaneein jetaote, arajiin cachaauru nii coaraain esenetaerauru, satiin, aonajeeuruha cachaaurune jana jetao, jauriaa jaiti coitucuelanaala itolere baaso acaauruacha ichai beeure jetao, jitariin caohachanainejeein. 19Chaaen, arajiin benanecuru jetaote, nii nerelaauruhane jaan acaauru quiricha jitariin uhaain jetao, satiin coarajeeurera notaracae teein, jitariin mocoore. Nii acaauruacha mocoi acaauru quiricha core rocooruhane jana jetaote, saoquichoonca oaraancani, acaauru coriquineein jataain coretineein jetao mitue rai core. 20Nii jaun jetaote, itolere sacutaain, jelai amuritoheriin Cana Curuaanaa Jesocurisito esenetaain jetao neeure cachaauru. Nii jaun jetaote, esinae rauhijiriin nelateein itolere ichaa Cana Coaunerane coaracuruhane jaun jetao, leeochaauru cachaauru netonoai esenetaaure.

21Nii nitohanihane baiha jetaote, coaiteen Masedonia, Acaiha, naaonjoaihunri, cunaa jere jetao, Faboro, nii caje cuaain, Jerosaleeun cuhin, caje coaauneein Romau cunaa jerihane jaun. 22Nitohaneein coacuhin jetaote, ichoachaniha coroatajai coroatajaneraauru Timoteeo, Erasto, naaonjoaihunri letoae jetao, Masedoniau, Faboro, turuha curichaaine beeuruha ichoaichaniha, amaaine coina. Nitohaneein, ichoachaniha letoanajaain jetaote, nii Asia batane que nedae jetao, Faboro.

Faboro aina, rai corihacuru que nejerateein, ita rerohecaauruha Efesoo nenacaaurune

23Nii bana jetaote, satiin nii Efesoo nenacaauru jetao, ita que nejerateein, ita rerohecaaure nejesinajeein, nii Ena Turunaa Ichaonaa que, acaauru relaauruhane jana, esenetaauruhane coreniha. 24Leeinjiin cacha Demetirioneein curuajai coata que amihanenaa jetaote, nii leratera ne. Nii Demetirio jetaote, itolere ecaantoneenanai ichae jetao, coata caje, nii acaauru chosineein acaauruacha tei eneneein nenaa Aretemiasa rai Teenforo coujunaca sirijiacoaain. Nii que coretiin que cachaauru rai necoreteein jetaote, nii aina amihanenacaauru coretenajaque jetao, jataain coretiin. 25Nii Demetirio jetaote, jitariin coroatajaneraauru cotijiae jetao, leeocha cachaauru- acaauru rijijieein jelai ecaanto icharaneein amihanenacaauru cotijiaain jetao, acaauru rai jetao:

“Niha naaonjoaain raotojoeein amihaneein raotojoeein ichaohacachenajaan cana amihaneeo core aasaerane jaunna, inara cotijiaain, nii que erenaa coinara”, nae jetao, nii coata caje ecaanto ichaera Demetirio. 26Niritiin jetaote: “Inara netonaite, raotojoeein coitucuhin, inara uricho que, nii aonaain neeichera. Nii Faboro naain acaauruacha curuaatei cachate, cajihaneein amuhemujueein, cachaauru rai: ‘Nelatihei caa canaacha ichai cacha ichanohineein nenaa cana chosicha’, naain, arajiin cachaauru rai bihana jaun jetaote, inae esenetaaure arajiin cachaauru. Coatiha leeinjiin cau Efesohacha nitohanai ichaaita. Itolereneein, Asia batane sacutaae lalajeeinte, amuhemujueein, nii chosi esenetaauruhane jianecuruha cachaaurune coina relanajaane jaun, esenetaacoaaure. 27Niite laaen, jataain cana rai elunaain nedaera. Nabana chunei, cana amihaneeon coretena nainenihane, cana amihaneeon niha natiinte, nitajenaa naine. Chaentechu, Asia batane sacutaain, satiin chauratane sacutaain coroaenojoineein niha, jataain nelateein nihane corenihane saijieein, caa cana rai chosi Aretemiasa que jaolecoorureein cachaaurura. Chaaen inae turuururihaain rai Teenforo asaae, coroaeca”, nae jetao Demetirio.

28Nii jaun jetaote, nii aonaain obajeein nujuae soaisoaain jetao:

“Caohachaain laraajiin neeine Efeso cocoaichanichaachene chosi Aretemiasara”, naaure jetao, nii coata que amihanenacaauru.

29Nitohaneein jetaote, cajihaneein, ita cotaicha rijitiin jetao, nii coroatajai cachaauru- Faboro corianiha cunacaauru Masedonia caje unacaauru Caiho, chaaen, nii leeocha Arisitaroconeein curuajai naaojoaihunri curuataain jetao, codoonetiin mucunajaain jetao, acaauru tararaain, ita taojiaain chaaelai coaracuruhane jaun teatro neein acaauruacha curuhateihu amanajaain jetao, ita taojiaeraauru acatiha jetao, tenajaa cuure. 30Nii jaun jetaote, acaauru coreniha enohin, cachaauru rai, iriha cunaa jeriha Faborone jana jetao, caohateeure, ecu nenacaauru Jesocurisito esenetaerauru, nabana, chatohaneein teeuruhane coataa. 31Nii cuu Asia batane nenacaauru cocoainanacaihuri tabaauru jetaote, Faboro belaichaauru nihana jaun jetaote, “Jiaonriha jera, nenoainera”, naerateeure jetao. 32Nii nainiha jetaote, nii ita taojiaauruhana jaun jetao, ita rai cajihaneein nujuae sooaichure jetao, ita rerohecaain. Jana, tabaauru jetaote, “Naaonjoaain coinate ne caa netaojianaja”, naain jetao, coitucuurene. 33Nii jaun jetaote, acaauru tabaauru jetao, “Naaonjoaane jaunte, nii rucuhecuruhane coina, netaojiaaure”, naain jetao, leeinjiin cacha Alejaandoro neein curuajai rai, beeure. Nitohaneein rai berateein jetaote, acaauru ajiniha teein jetao, Alejaandoro sarasaracaain amaaure Jorioocuru, nii netaojianacaauru acatiha, cuu nichaauraain, nii ita rerohecaeraauru rai, iriha Jorionecuruhane corenihane coina. Nii jaun jetaote, turuhin, nii netaojianacaauru rai jetao, biji sarasarari, curuatoroaain aonajeeuruhane, acaauru rai, satiin urichoo, Jorioocuru coreniha, irihane coina. 34Nitohaneein, irihane jana jetaote, nere cajeecha nainacorichure, acaaentonai, Jorionihane que. Nitohaneein, nainacoriin jetaote:

“Caohachaain, laraajiin neeine, Efeso cocoaichanichaachene chosi Aretemiasara”, naaure jetao, ita rai nujuae soaijiin, carajaain, coroata oraain, acaauru chosi niha Aretemiasa beeuruhane jana, esenetaaureniha Jorioocurune coitucuuruhane jaun.

35Nii jana, nii neseu acaauru rai chaaelai que ereeuruhane laenaain rucuhera “secretario”, jetaote, inae aitoha acaauru raine jaun, sitonaaonjoauruhane jana jetao, acaauru rai:

“Aonacuche, Efeso nese cocoaichacuru. Satiin itolere cachate, nii jataain cana rai nelateein nenaa cana chosi loreri Teenforo, chaaen, nii dede caje ajerineein Aretemiasa tocohaneein nalunaane maajeein beraihane coina nenaa neein niha caa nese cocoaichanihacachanene coitucuurera. 36Nihei chunei, nii que, ‘Nohanenaa’, naain iriha chuneine jaanu. Nii jaun, inae nii jianecuchera. Coa obaaecache. Coa caohachaain inara suujua coarihei amuneein, chatohaneein, baaso chana coaaucachera. 37Coatiha, chatonaain cana chosi que ereein, niheichu Teenforo asaae asijiauhin naaonjoaauruha caa inaraacha mucuhin inaraacha uhaauri cachaaurune coaalanaalata. 38Chatonaain, acaauru colurujueein niha, nii coata que amihanenaa Demetirio, nii aina amihanenacaauru ainane, taute neeure nii rucuheraanu que nenacaauru joesiocuru, chaaen, acaauru curuaanaacuru, naaonjoaihunri. Niha chunocoha, acaauru colurujuerane, taa, nii rucuheraanu que nenacaauru rene amanajaauchete, neruujueeuruhine, ecu le cachaauru jabereco coreniha irihane coinara. 39Niha esinae rauhijiriin chatohaneine, rucuhena jeriquichene, satiin cocoainanacaihuri aina, ita taojiaain, nii rucujueein neeuchera. Nii banate, esinae rauhijiriin, caohachaain ita taojiaa esineneein rucuheriquicheeincha. 40Jana, jerichanejeein, sacunaa coauquichenete, cana colurujuenaa nainecurureein, ‘Cana jecha cachaauru suujua rerohecaache’, naain. Nii quete, jataain elunaain nihacachera. Charijieein nejeein, coitucuhin, cana caje, ‘Chatohaneein, lerateein, ita rerohecaaureta’, naain bajaauruha cocoainanacaihurine, tonaainte berichaacheta”, naain jetao:

41“Chajaaincha cauhachanichuchera”, nae acaauru rai, nii chaelai que ereeuruha nii neseu nenacaaurune laenaain rucuhera.

Currently Selected:

Ichanohichuru 19: URA

Highlight

Compare

Copy