Ichanohichuru 20

Masedonia, Curesia, naaonjoaihunri turuha cuha Faborone

1Inae nitohaneein, cajihaneein, ita rerohecaauruhane jianecuruhane baiha jetaote, jitariin, nii Jesocurisito coitucuurera cotijiaain jetao, suujuatenajae Faboro. Nitohaneein, suujuatenajaane baiha jetaote, acaauru rai necoeein, Masedonia batane cue jetao. 2Cuu jetaote, neseeuru naineein, cuu nenacaauru Jesocurisito coreniha cana nejeraauru rene bedaeneein, cuu acaauru suujuateein, jelai amuritoheriin Jesocurisito esenetaauruhane coina, acaauru rai ereereje Faboro. Nitohaneein, acaauru rai ereerejeein, acaauru suujua lararajihane baiha jetaote, Curesia batane cue jetao Faboro. 3Nitohaneein, Curesia batane turuhin jetaote, cuu ne nichata ateein. Cuu nichata ateein nihane baiha jetaote, inae Siriau cuhane coina, bote cuhane fau rai, nihane jana jetaote, que necosuujuaauruha Jorioocurune coitucuuriin jetao, jelaiha atane ichoae cauha cunaa jere jetao, nacoauneein Masedonia choae situhin cuhin, Faboro. 4Nii janate, canacaanu corihaniha uure, Berea cocoaicha Firo calaohi Sofate, chaaen Tesaloneca cocoaichacuru Arisitaroco aina Secoondo, chaaen Derebe caje unaa Caiho, chaaen Timoteeo, chaaen Asia batane caje unacaauru Tiquico aina Torofimo, naaonjoaihunri. 5Satiin niichurute, ichoachaniha amaain, Toroasihu, canacaanu cohaca cuure, Masedoniau canacaanu ratiriin. 6Nii janana, canacaanu, Filipoo caje nesaruhacaanu, leeinjiin bote cuhane, jorerera colane ichanohi faan quihuruhane jaan cojoanonaa Fasocoa beseta bitoacaanune baiha. Nitohaneein nesaruhin cuhine, saoqui janone cuhane, turuha cuhacaanu Toroasihu. Cuuna canacaanu cohacuruha, nii ichoachaniha cunacaauru Jesocurisito coreniha cana nejeraaurune jaun, cuu erunajaacaanu. Nii Toroasihuna, caaunsi janoneein nihacaanu.

Toroasihu nenacaauru rene bedaeniha Faborone

7Cuuna, semana nunuhe cojoanonaa bana ita taojiacaanu, cana coreniha ohalune coaaucuruha, satiin esenetaeraaurune coina, faan chaluhin quihalu Jesocurisitone rijijieein, ita aina jiniiquiin faan chaluhin quihacaanune coina. Nitohaneein netaojiaacaanune janate, Jesocurisito coreniha cana nejeraauru rai, carajaain itolere que, dede cataaun tiaain, ereereje Faboro, nii cojoanoo, jelai caje amuhane nihane jaun. 8Nitohaneeina, leeinjiin loreri ecuunetiin nenaa nichata coarana satono que, netaojiacaanu. Cuurute, nihacoae arajiin conooru, moconojoineein. 9Nii janate, jelai caje nemarote, leeinjiin enamanaa Eoticoneein curuajai. Acuujua laaojoiri bacuujuaniha lauhequiin, cuu carajaain ereereeca Faborone aonajihane jaunte, amuritooriha sinirenane jaun, nemarote, nii loreri ecuunetiin nenaa nichata coarana caje. Nii janate, soroneein fauhin, michuuruhane jana, inae ohe nii enamanaa. 10Nii jaunte, fauhin nii enamanaa que baluunetiin, cuu nenacaauru cana nejeraauru rai:

“Coa nesoonetohachera. Esinaete niqui inae ohera. Nete, inae ichanaera”, nae Faboro.

11Nii baihate, jelaiha iniin, faan beeunebeeuneein chaluhin quihane baiha, coaiteen janohajeein ereereecane baihate, inae jelai amue. 12Nitohaneein, nemaroteein oha nii enamanaane jana, oo caje ichatiha Faboro aina cuaain Cana Coaunerane jaunte, jataain que nelararajiaaure.

Toroasi cajene Miletoo cuhacaanu.

13Nii janana, ichoachaniha bote cuhane cuhin, Asoo, Faboro cohaca cuhacaanu, aca nitohaneein jereein, atane ichoae cuhane jaun. 14Inae nii Asoo, ita ruhacaanune janate, canacaanu aina, bote cuhane faain cue Faboro, Mitileneu. 15Jelai caje nesaruhine, cojoanoo Quihoo situha cuhacaanu. Nii cajena, le janohin turuha cuhacaanu, Saamo cofauhanau. Cajena cojoanoo cuhin, turuhacaanu Miletoo. 16Asia jeloon cuhin, carajanaa jerenihane jaunte, Efesoo cunaa jerene Faboro, Jorionecuruhane beseta Feentecosetesi bana Jerosaleeun nenaa jerihane jaun, chajaaojoaain Jerosaleeun turuhane coina.

Efesoo nenacaauru Jesocurisito ranojoihunru bichauhenaauru rai ereerejiha Faborone

17Inae Miletoo turuhinte, jelai caje coaauneein, Efesoo nenacaauru Jesocurisito ranojoihunru bichauhenaauru cotiharate Faboro. 18Inae turuuruha nii niicha cotiharateeurine janate, acaauru rai:

“Cau caa Asia batane que turuhanune caje coaauneein, inara ainaacha ichaohanulune jaunte, inara raotojoeein canu ichao coitucuhichera. 19Itolere janonaa banana, joaereein cacha rijijieein inara aina amuhemujueein, Cana Curuaanaacha jerenohi ichajeein nerejetoonlu, casuujua fononoichuru, itolere necairichanaa abaantaain, canasineene rijitocuruha Jorioocurune abaantaain. 20Nena, atiin jianelanaala, inara caohachanu que, tabaauru que inara loreri asae, tabaauru que nenaanaja cataaun, naaonjoaihun teeinchuru, satiin aonajeeurera urichoo inara rai, Cana Coaunera ere beebejeein, inara relarejetoonlu. 21Chaaen nechu, Jorioocuru rai, Jorioniheichuru, naaonjoaihunri raine maajeein: ‘Coaiteen nacoauneein Cana Coaunera ere tonoraain, rai Calaohi Jesocurisito netonoai esenetaain tonoraauchera’, narejetoonlura. 22Enane laen, inae Jerosaleeun cureeuni, ucuae caletoaa Cana Coaunera Suujuane jaun. ‘Naaojoanrichaauni cuura’, naain coitucuelanaalane, caa cureeunicha. 23Leeinjiin, neseeuru naineein, cuhanunejaauru naineeinchurute, cuu turuhanune, caresero cuhane caenoaain, cacairichaaururichaaine benajaque canu rai, Cana Coaunera Suujue, acaihaniji niichane coitucuujueeun. 24Nena, chaque tonajeneeun. Coatiha chaque nelatihei canu rai, canu ichao. Nenacaaenejian, cacairichaauruhane que nelararajiaain, rachoojoeein caletoaa Cana Coaunera Calaohi Jesocurisitone jaan nainana jereeun. Niicha beratei erenaa caohati beebejeein, jataain cacha belaiha Cana Coaunerane maajeeinne beebejereeunni.

25Esinae rauhijiriine, satiin, cau neinequichene raina, beeoricheeunni, Cana Coaunera Janonaa beebejihanune aonajera neeichene, coatiha inae chunei nacoauneein cacohararihaain. 26Nii jaunna, enene inara rai aitona jereeun, rauhijiriin, nihei chunei coreniha, cha ujuaihoneein nenerihanuhine jaun, 27nii chunei que suujuelanaala, satiin cacha urichoo, Cana Coauneraacha jerei beebejihanune jaunna, cha ujuaihoneein nenereeunni. 28Aihana jaun, itolere que nainaain, necohalajiin, caohachaain necoeraain neein, Cana Coaunera rai ita taojiaeraauru beraihuche, acaauru coreniha, coroso que ohalu rai Calaohine jaun. Niicha ranojoihunru beraichanu quete, inara cotijiaain, nii beraichanu que inara te Cana Coaunera Suujue. 29Inae amuhanune baihate, turuha uurureein nechu aansai taibinaaeneein cacha quicha rijijieein nenacaauru cachaauru, nechu jataain Jesocurisito ranojoihunru itajeene rijitiin. 30Chaaente, inara tabaauru nihanatiin, nechu jataain joaereein caje rocohin, relaa cuurureein, nii casaje esenetaain, acaauru aina cuuruha Jesocurisito ranojoihunrune coina. Nitohaneeinte, nechu jataain casaje que, cacha relaa cuurureein, suujua caje rocohin. 31Nii jaun, inara aina, nichata jaanacaain nihanune bana, cojoanoo netojoeein, janotiin netojoeeinchuru, inara suujuaterejetocoaaunlu, casuujua fononohine coacuhin, que nainaain necohalajiin ichaooche.

32Nii jaun, Jesocurisito coreniha canejeraneein nenacaauru, caa inara rai quiicha beebejei naitoonjoa nerete, inara coroatajanereein, jelai amuritoheriin caohachaain coitucuhin, esenetaaichene coina. Cana Coaunerate naine satiin rai cachaneein neenihuru rai aitohane tocohaneein, inara coroatajanihane, nitohaneein coitucuhin esenetaerauru coroatajanihane coina aitohalune jaun. 33Coatiha, canu caohachanu que, inara relarejetohaaunlu, nirijieein core colane. Nieichu, chunei cacha cajione bajarejetohaaunlu. 34Nii jaunte, inara raotojoeein, cacoii que amihaneein quiicha latei raain, canu aina nenacaauru rai netonaine, acaauruacha lateine maajeein raanune coaraain coitucuhichelu. 35Nitohaneein, inara netonai, itolere janonaa bana ichaohichene coinana, inara que coaarateein, inara rai aitoraaetoonlu, chaelai que jataain cairicheinejeein nenacaauru coroatajanequichene coina: ‘Nenacaetejian, tihacane, raacane amuritoheriin raotojoeein nenaa nainichaa, chaaelai que, cairicheinejeein nenaa rai, cha teein coroatajanichaane’, naain cana relaalu Cana Coaunera Calaohi Jesosone coacuhin ichaquichene coina”, naain jetao, acaauru suujuate Faboro.

36Niritoha, acaauru raine baihate, neseeonriaain, acaauru aina jiniiquiin Cana Coaunera bajae Faboro. 37Nitohanihane janate, satiin Faboro que baalu baluuneeinchuru, loalocoaainchuru coisichure. 38“Inae caachanijia cacoharariichenera”, naain rauhijiriin biha Faborone jaunte, jataain coinaderaaure. Nii baihate, corianiha cuure, nii cunaa jerihane jaan bote nenajaun tiaain.

Currently Selected:

Ichanohichuru 20: URA

Highlight

Compare

Copy