Ichanohichuru 18

Coriinto turuha Faborone

1Nii baiha jetaote, nii Atena caje amuhin, Coriinto cue Faboro. 2Cuu jetaote, Poonto batane caje unaa leeinjiin Jorioo Aquila neein curuajai aina, ita eruure. Aca jetaote, rai comasai Firisila aina, enanejeein Italia caje turuhin neeure Coriinto. Nii bana, Romanocuru curuaanaacuru curuaanaa enferadoro neein nenaa Culaodio, nii Roma caje, satiin mituuruha Jorioocurune coina, mijiainetiin aitohane jaun jetao, jelai caje mituure. Nii jana jetaote, acaauru rene turuha cue jetao, Faboro. 3Jerichanejeein, acaauru rijijieein, jacari caje loanarine que, acaauru ichanaa que amihaniha acaaentonaine jaun coaranaaca cue Faboro, cuu acaauru aina neein, jiniiquiin acaauru aina amihanihane coina. 4Cuu jetaote, nebetacanaa cojoanonaa bana naineein, ita taojiaain Cana Coaunera bajaauruha Jorioocurune jaan loreri sinacoca asae turuha cuhin nejesina ne Faboro. Cuu Jesocurisito beratenojoi beebejeein, Jorioocuru relaain, Jorioniheichuru maajeein relaane, esenetana nainecuruhane coina.

5Inae Masedonia batane caje, rene turuuruha Silasi aina Timoteeocurune jana jetaote, jacari caje loanarine namihaneeo jianeein, Cana Curuaanaacha beratenojoi benaacha que ne Faboro, rauhijiriin, aitoha Cana Coaunera Quiricha Inoaesi cuhanene rijitojoeein: “Jesosote esinae rauhijiriin canaacha cohajei Mesihasi ne”, naain coitucuuruha Jorioocurune coina. 6Ne jetaote, rautaaurenihane jaun, aina obajeein cotaain, Faboro nocoeje chanuure Jorioocuru. Nii jaun jetaote, rautaaureniha Jorioocurune jaun, jelai caje mituhane, cojunacanu que jetao, cuu cajione romaromaain jetao:

“Inaraacha jerei neeinte, caseteconeein nitajeriquicheeincha. Inae canu enene caje coaauneein, cha ujuaihoneein nihaaunta. Inarate, nii ujuaihoneein neeiche. Inae aihane amuhanu. Ena caje coaauneeine Jorioniheichuru rene aihane cureeunnicha”, nae jetao Faboro, Jorioocuru rai.

7Nitohaneein, nii ita taojiaauruhana jaan sinacoca caje mituhin jetaote, rohan nenaa leeinjiin cacha Tisio Josto loreri asae turuha cue Faboro. Nii cacha jetao, Jorionihei. Ne jetaote, esinae rauhijiriin laaen Cana Coaunera ere esenetaain coroajeein, tonoraera ne. 8Nitohaneein jetaote, sinacoca curuaanaa Curisifo, saain rai bereecuru, rai comasai, saain rai loreri asae nenacaauru aina jiniiquiin, Cana Curuaanaa ere esenetaaure. Nitohaneein jetaote, arajiin Coriinto cocoaichanecuruhane jetao, beebejiha Faborone aonaain esenetaauruhane jaun, baotisanojoineein neeure.

9Le janotiin cuhane jetaote, coetacai rijitojoeein jetao, Faboro siniha cue Cana Curuaanaa. Sinihu, rai ecocohin jetaote: “Coa canu ere beebejeeine jianihara. Jiaohine casiin jianeeinera. 10Canune, ii aina nereeunicha. Nerihaain, caohachanainejeein chatohaneein cheterata, cau, caa nese que neeuruha arajiin canu cachaaurune jaunne ichei aitoonra”, nae jetao, Cana Curuaanaa, Faboro sinihu. 11Nii jaun jetaote, coroata jaanacai cataaun tiaain jetao, nii Coriinto neein, jelai cocoaichacuru rai, Cana Coaunera ere beebeje jetao Faboro.

12Ne jetaote, Acaiha batane coberenadoro neein niha Calioonne jana jetao, Faboro aina nejerateein jetao, ita taojiaaure Jorioocuru. Nitohaneein, ita taojiaain jetaote, Faboro mucuhin amaaure, ita colurujueeuruhane jaan coloheri tribonal asae. 13Nitohaneein, mucuhin amaain, coberenadoro acatiha turuaain jetaote:

“Caa cachate, cachaauru suujua tacaain, nejelauneein Cana Coaunera coroajeein tonoraauruha cachaaurune jereein ne, cana rai cocoaeraa nitohanai ichaonaane saijieein, rautanaa cojoaelanaalara”, naauruhane jana, 14cuu irihane coina, aonajiha Faborone jana jetaote, cuu Jorioocuru cotaicha rijitiin jetao:

“Jataain baaso ichaain, sonajaain jaohin, naaonjoaain que inara ere nihane jana nihanena, nainereeun canu rerohecaaichene latelanaala, jeriquichene rijijieein, inara Jorionequichene aonacaaun tonajelanaalanera. 15Nena, inara aohana naineneeun, joaereein, nitohaniha inara ichaona jaun aitiin, inara raajenihane inaraacha coacuhi que aitocohichene jaunra. Inara nii rucuhecuche. Coatiha canu, nii que enonaa nainihaaun, nitohanai rucuheranu que nenihanune jaun”, naain jetao, 16nii ita colurujueeuruhane jaan coloheri tribonal caje, nii Jorioocuru sitae, coberenadoro Calioon.

17Nii jaun jetaote, sinacoca curuaanaa Sosetenesi mucuhin jetao, faohacure, nii ita colurujueeuruhane jaan coloheri tribonal acatiha teein. Ne jetaote: “Coaraain nainauruinera”, naain jetao cuu coarajenajae coberenadoro Calioon.

Antioquihau cauhin, jelai caje nacoauneein misioneroneein cuhane nichata satiha Faborone

18Araai janohin, Coriinto nihane baiha jetaote, Jesocurisito coreniha cana nejeraauru rai necoeeure jetao, Aquila chaaen rai sinijiera Firisila, naaonjoaain aina jiniiquiin Faboro, Siria batane cuuruhane coina. Nitohaneein cuhin jetaote, cucuana cuhane cuujueein, Cencrea turuhin jetao, caje amuhane coina bote cuhane fau rai, rai couturi loroaecaain joaerate jetao Faboro, Cana Coaunera rai naitoonjoalu nainaane cojunacaneein. 19Nitohaneein cuhin, inae Efesoo turuhin jetaote, cuu Aquila ratiri, rai sinijiera Firisila aina. Nitohaneein cuu ratirinajaain jetaote, naain nenaa sinacoca asae turuha cue jetao Faboro. Cuu turuhin jetaote, enohin cuu nenacaauru ita taojiaeraauru Jorioocuru rai ereerejeein jetao, relanajae Faboro. 20Nii jaun jetaote, cuu carajaain acaauru aina nihane coina, Faboro chunaaure. Ne jetaote, ainaa jerelanaala, acaauru rai:

21“Jeriha, Cana Coaunera nena, caa baiha inara rene turuha ureeunicha”, naain jetao necoe acaauru rai Faboro.

Nitohaneein, necoeein jetaote, leinjiin bote cuhane fauhin, Efeso caje amuhe Faboro. 22Nitohaneein amuhin jetaote, Sesareea turuhin, jelai caje coaauneein, atane choae cuhin, Jerosaleeun turuha cue Faboro, cuu nenacaauru Jesocurisito ranojoihunru coaraane coina. Nii baiha jetaote, caje Antioquihau cue jetao Faboro. 23Nii baiha carajaaojoaain neein jetaote, coaiteen amuhemuhena nunuheteein, itolere Galasia batane, Firijia batane, naaonjoainuri sacutaain amuhemujueein, Jesocurisito esenetaerauru suujuateein, acaauru suujua lararajiae jetao Faboro.

Efesoo Jesocurisito que ereerejiha Aforone

24Nii jana jetaote, amuhemuheca Faborone nainiha, Efesoo turue jetao, leinjiin cacha Alejaandiria cocoaicha Aforoneein curuajai. Nii jetaote, caohatiin Cana Coaunera Quiricha Inoaesi coitucuhin, raotojoeein ereerejeein, cacha relanaa coitucue jetao. 25Aca jetaote, esinae rauhijiriin, Cana Curuaanaa aitoonjoa coitucuhin, esenetaain, tonoraain nenaane. Nii jaun jetaote, raotojoeein ereerejeein coroajeein, rauhi cuhane cuaain, Jesoso aitoonjoa beebejeein, que cacha relae. Ne jetaote, Jesocurisito esenetaerauru rai, rai Suujue tiha Cana Coaunerane coitucuhelanaala, acaihanejein Cana Coaunera ere tonoraera neein niha cachane coujunacanu que, cacha baotisaa Joaan neeicha coitucuujiha natiin jetao, nitohaneein cacha relae jetao, Aforo. 26Nitohaneein jetaote, chaque tonaje lanaala, ita taojiaauruha Jorioocurune jaan loreri sinacoca asae cacha relae, satiin aonajera urichoo. Nii jana cuu neein aonajiha Aquila, rai sinijiera Firisila ainane jaun jetao, cotijiaain bujuaihu amaain jetao, rauhijiriin jeriha Cana Coaunerane rijijieein jetao, beeure Aforo rai, jelai amuritoheriin coitucuhane coina. 27Nii baiha jetaote, Acaiha batane cunaa jeriha Aforone jaun jetao, quiricha laenaain, aina letoaaure, nii Acaiha nenacaauru Jesocurisito esenetaerauru rai, caohachaain belaain raauruhane coina. Inae Acaiha turuhin jetaote, Cana Coauneraacha belainojoineein Jesocurisito esenetaerauru coroatajane jetao, jataain Aforo. 28Nitohaneein jetaote, rauhi coaraain, rauhi cuhane cuaain, Jorioocuru rai ere, satiin aonajera urichoo. Nitohaneein, acaauru rai ereerejeein jetaote, acaauru rai Cana Coaunera Quiricha Inoaesi ereretae jetao, Cana Coaunera jerenohineein, letononeein Mesihasi niha Jesoso ne que, aitoha Cana Coaunerane beein. Nii jaun jetaote, chunijiun cuaain tonaain Aforo batiin tonaain erenaa nainecurene jetao, Jorioocuru, acaauru que coaarateein aitohane jaun.

Currently Selected:

Ichanohichuru 18: URA

Highlight

Compare

Copy