Tesalonecau Nenacaauru Rai Coroataja 1
1
“Chatohaneein neeiche”, naa Faborone
1Canu Faboro nichaaune, Siribano, Timoteeo, naaonjoain nichaanunena caa laenaain letoarichaanuhin. Saain nii Tesalonecau nenacaauru Cana Inaca Cana Coaunera, Cana Curuaanaa Jesocurisito naaonjoaunri coitucuurera raina caa laenaain letoacaanu. 2Inara coroatajaneein Cana Inaca Cana Coaunera, Cana Curuaanaa Jesocurisito naaonjoaainte raotojoeein neeiche.
“Nariha”, naain coroajeein Cana Coaunera bajaa Faborone
3Esinae rauhijiriin jelai choae jauhecotojoeriin Cana Coaunera esenetaain, ita belaain neeichene jaun, “Nariha”, naain Cana Coaunera rai inara coroaecaanunete caohachae. 4Nii jaunna Cana Coaunera rai ita taojiaeraauru rai raotojoeein inara beebejihacaanu, Cana Coaunera Calaohi Jesocurisito coitucuhichene coreniha inara rerohecaain, inara cairichaauruhane nihanatiin, cha que erelanaala abaantaain itolere necairichanaa abaantaain neeichene jaun. 5Nitohaneein abaantaain neeichene jaunte esinae rauhijiriin caohatiin inara raain niha Cana Coaunerane coaraa cuurureein inara coaaraauru.
6Nii inara cairichaaeriin nenacaauru cairichaain niha Cana Coauneranete caohachae. 7Inae dede caje turuha uha Cana Curuaanaa Jesocurisito, rai letonocuru mijiaainetoori- anjeraauru ainane banate, nebetacanaa tereein cana rai Cana Coaunera. Nebetacaacachene jana, acaauru cana rerohariha necairichaauruhane coina. 8Cana Coaunera esenetaauruhi, chaaen nii jianacoon cana mitaera Jesocurisito ere esenetaauruhi, casetecaa usi tabai quene coinate turuha ureein Cana Coaunera Calaohi. 9-10Canacaanuhacha beebejei esenetaaichene jaunte, Cana Curuaanaa coroaecurureein saain esenetaerauru inae turuhane bana. Nii banate caseteco coaraa cuurureein, cha bana jelai caje mituuruhane coina que aina rijijieein. Nii banate coriae Cana Curuaanaa coarihei rijijieein niha cuurureein nii nere esenetaauruhi.
11Nii jaunna inara rai Cana Coaunera itolere amurijiriin nenaa bajaacaanu, inacojoeein inara cotijiaeniha Cana Coaunerana jaun. Chaaen nachu caohachaain coaauquichene rijijieein inara tiha Cana Coaunerane coina Cana Coaunera bajaacaanu. Chaaen nachu nii nunuheteeichene rijijieein, jerichanejeein inara amihaneeo ichaain neeichene coina Cana Coaunera bajaacaanu, esenetaain ichaquichene jaun. 12Nitohaneein ichaquichene jaunte, inara coreniha Cana Curuaanaa Jesocurisito coroaecurureein satiin. Nitohaneein Jesocurisito letononeein neeichene jaunte inara coroaeca cuurureein, nitohaneein jeriha Cana Coaunera, Cana Curuaanaa Jesocurisito, naaonjoaine jaun.
Currently Selected:
Tesalonecau Nenacaauru Rai Coroataja 1: URA
Highlight
Share
Compare
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.