Tesalonecau Nenacaauru Rai Leinjiin 5
5
1“Naaonjoain banate turuha ureein Cana Curuaanaara”, naain coitucuhi chunei, nii coitucuhichene tocohaneein. 2Nii coitucuhichene tocohaneeinte cha coatajeniha chuneine jana turuha ureein. Charijieein teeinti janotiin turue asijiato. Nii rijijieeinte turuha ureein. 3Nitohanerichaainne banate, “Jataain raotojoeeinte ichaohacache. Coatiha nihei cana que nejerateein chatohaneein cana ichao itajeranu”, naain ereein neeurureein Cana Coaunera coitucuuruhi cachaauru. Nii lacuritiinte caseteco coaraa cuurureein luhecotariin, acaauru casetecaa Cana Coaunera ne. Nihei chunijihun cuhin nichotenaa nainecururinaain. Charijieein teeinti, canaanai siriha enene, inae saa rai batenene, rai cunaane, cuna caje nichotenaa nainene. Nii rijijieein techu luhecotariin cau turuha Cana Curuaanaane acaauru casetecaane nii cuna aonacurureein. 4Jana inara laen nesoonenaa coaariheicheein, cohajeeichene jana tururichaaine jaun. 5Cana Curuaanaa jerenohin coitucuhin tonoraaichene jaunte, jiichoo conaera- cono cachaneein neeiche. Coatiha Cana Curuaanaa ere tonoraauruhi rijijieein nocohenaana nenaa cacha neein nihaacache. 6-7Nii jaun nainihei ninauhene neein ajenacaauru rijijieein nihacachene. Itolere bana cana suujua coaraain nihacache nete caohachae. 8Charijieein teeinti, nelarijia que coata teeure soondarooru, acaauru jaberoco acateraanu que, nabana chatohaneein tenajaera nihane, acaauru que temuhin nihane coataa. Nii rijijieein techu inara netonai, cana acateraanu que Cana Curuaanaa esenetaain, tonoraain, ita belaain, cacha belaain, naaonjoain nihacachenete cana acatera niha nereein nii canaacha esenetai. Nitohaniha cachenete cana rohan nichuutaain cana coritana nainenereein Moconajaaera. Charijieein teeinti, coata caje ichanohin asiho lauriae soondaro, nabana chatohaneein couturi tiha aina nejerateine coataa. Nii rijijieein techu, chatohaneein cana suujua tenaa nainenereein Moconajaaera, batoelanaala esinae rauhijiriin jianacoon cana mitaa Cana Mitaeranu esenetaacachene. 9Coatiha caseteco coaraain nihacachene coina, cana raain nihei Cana Coaunera. Rai Calaohi Jesocurisito coreniha jianacoon mituhin nihacachene coinate cana raain ne Cana Coaunera. 10Ohacachene nihanatiin aina nihacachene coinate cana coreniha ohe Cana Coaunera Calaohi Jesocurisito. 11Nii jaun nii aaichene rijijieein jiniiquiin ita suujua lararajiaain laraajiin neeuche.
Satono nejeein Cana Coaunera coitucuurera suujuatiha Faborone
12Aonacuchena inara rai irihacaanu. Nii inara beraihurera que inara suujua acateein, nere tonoraain neeuche, Cana Coaunera coitucuurera beraichaneein neeuruhane jaun. 13Nii jaun acaauru que inara suujua acateein belainajaain, leeochaauru aina jiniiquiin raotojoeein neeuche.
14Amihanenaa jeriheichuru cotaicha rijitiin suujuateein letoaauche. Chaaen chu nererojoecaain nenacaauru belaain suujuateeuchete, suujua tocharaain suujua nunaain neeuruhine. Chaaen chu nacanacaenaauru coroatajanecuche. Raotojoeein satiin acaauru suujuateein, acaauru suujua lararajiaain neeuche.
15Coaracuche, jiaonriha inara rai baaso chara nihane coa nacatiha tacaain cainaain nihache. Ita belaain, saain itolere cacha, Cana Coaunera coitucuuruhi nihanatiin belaain neeuche.
16Raotojoeein rachoojoeeriin neeuche inetono janonaa bana. 17Cana Coaunera bajaebajajeein neeuche inetono janonaa bana. 18Chatohaneein inara tera nihane nihanatiin coroaaecuche, nitohaneein coujuriu Cana Coaunera Calaohi Jesocurisito esenetaera neein nenaa tocohaneein neeichene jeriha Cana Coaunerana jaun.
19Inara suujuatenaa jeriha Cana Coaunera Suujuane, aonaain tonoracuche.
20Cana Coaunera Ere biha Cana Coaunera letonone, nijiaonriha batohin neeichene. 21Esinae rauhijiriin suujua coaraain inara relaacaanune rijitojoeein inara relaauruhane esenetaain tonoraauche. 22Itolere baaso jianeein neeuche.
23Acaiha nejeein nere esenetaain tonoraera neein neeichene coina inara suujua cureein atiin cana rai raoti ichaonaa tera Cana Coaunera. Aihute neculocohin neeine inara jaberoco, inara suujue aina coaiteen turuha Cana Curuaanaa Jesocurisito nereein tiaain. 24Nitohaneeinte ichareein nii Inara Cotiharalu, nitohaneein nihana jaun.
Laenaane satononiha acaauru coroajeein acaauru coaaucane biha Faborone
25Cana Coaunera bajaauche canacaanu rai atiin.
26“Inara coaaucuruha jera Faborooru”, naauche satiin cana nejeraauru Cana Coaunera coitucuurera rai.
27Aihana jaun acaauru rai caa canuhacha laenai ereretaauche, Cana Curuaanaa letoaeratenojohin neein nihana jaun.
28Inara coroatajaneeine Cana Curuaanaa Jesocurisitote raotojoeein neeiche.
Nitohaneein neeine.
Currently Selected:
Tesalonecau Nenacaauru Rai Leinjiin 5: URA
Highlight
Share
Compare
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
