Tesalonecau Nenacaauru Rai Coroataja 2
2
Inae cuu te lalajiha Cana Curuaanaa turune janate niha cureein leinjiin cacha coritaeraanu
1-2“Naaonjoaainte turuha ureein Cana Curuaanaa Jesocurisito”, naain bihacaanulu inara raina jaun, coa inara coritaera nihane esenetaain nihache. Inara rene turuhin, “Canacaanu rai beein beratiha Cana Coaunerana jaunna coaiteen turuha Cana Curuaanaane bihacaanune coina, cau inara rene turuha uhacaanu”, naa chuneine nijiaonriha esenetaaichene. Chaaen chu, “Canacaanuhacha letoaijie”, naain inara rai quiricha tera nihane nijiaonriha esenetaain neeichene. 3Nijiaonriha chatohaneein nihanatiin, tonaain inara coritana jerera nihane esenetaain neeichene. Inae cuu te lalajiha Cana Curuaanaa turune janate niha cureein leinjiin necha aansai cacha coritaera, Cana Coaunera niha nocoetiin. Nii erete tonoraa cuurureein, Cana Coaunera ere tonorana coacuelanaala. Niqui nete nii acaauruacha ere tonorai itajiha cureein Cana Coaunera. 4Niite Cana Coaunera aina nejerateein, niicha tonorai tonoraa cachane, aina nejeratereein. Acaihanejein acaacha ere tonoraacachane jereein Cana Coaunera niha nocoetiin nelauriaa cureein Jerosaleen nenaa Cana Coaunera Loreri asaae.
5Coaauquiche chachu natiin, inara aina nihanune banana chu caritiin inara rai bihacaanulu. 6Inarate cojunacatiha Cana Coaunerane ajiniha turuenerihanine coitucuhiche raotojoein. 7Inae nunuejiha nii Osa neba amihaneeon asinojoineein. Inae jianiha nii acatera neechate cohajei, 8ecooca nii nechu aansai atebinaene coina. Nii banate turuha uha Cana Curuaanaa Jesocurisitone, neraaicha que jiheitiin itajiha cureein Cana Curuaanaa Jesocurisito. 9Nii nechu aansai ataibinaen osaaonate turureein nechu aansai atebinaen Moconajaaera letono neein, nechu jataain itolere ichaain cacha coritaeraanu que, nohaneein itolere ichaain cacha notaaranu que. 10Nitohaneeinte itolere que nohaneein ichaonaa rauhi aonane jerecuruhi coritaa cureein. 11Nitohaneeinte casajeje esenetaauruhane coina, ninauhene coarajenajareein Cana Coaunera, 12nitajeeuruha nii nere rauhi jerelanaala casajeeicha tonoraeraaurune coina.
13Nii jaunna inetono janonaa bana, “Nariha”, naain Cana Coaunera coroaecaanu inara coreniha. Jataainte inara belai Cana Curuaanaara, canejeraauru, jauriaa nejeein inara que tacaajeein inara raa Cana Coaunerana jaun. Nere rauhi esenetaaichene corenihate, rai Suujue que inara suujua coreein inara rae Cana Coaunera. 14Nii jaunte nii canacaanuhacha beebejei nere aina cuaain inara cotijiae Cana Coaunera aina Cana Curuaanaa Jesocurisito rijijieein aina neeiche caohatiine coina.
15Aihana jaun nitohaneein rauhijiriin ichaaoche. Coa nii quiricha cuhane reein tiaain inara suujuateein nihacaanune jaan baitichache. 16-17Inara suujua lararajiaain, nunaaine Cana Curuaanaa Jesocurisito, Cana Inaca Cana Coaunera nii inoaenlu caje coaauneein cana belaicha, nii cha bana satonohane que ainaa rijijieein aina niha curichaacheine tera. Aihute inara suujua coaraain raotojoeein ereerejeein caohacha ichaain neeiche, Cana Coaunera coreniha.
Currently Selected:
Tesalonecau Nenacaauru Rai Coroataja 2: URA
Highlight
Share
Compare
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
