Timoteeo Rai Leinjiin 6

Niha fatoroonne

1Rebeeocuruha fatoroon quene, nere tonoraauruhine. Nabana Cana Coaunera que ereein, nii Jesocurisito que cacha relaacachene que ereein cana que baasoneein ereeuruhane coataa. 2Chaenchu Jesocurisito coitucuhin esenetaera niha fatoroonne jerichanejeein nere tonoraauruhine. Jesocurisito coitucuha fatoroonne coreniha acaauru nejera rijijiein nihane coreniha, coa baasoneein nere tonoraauruha. Nii choae jauhecotojoeriin coroatajanecurumiin nere tonoraain, Jesocurisito esenetaera fatoroon nihane.

Itolere coitucuha nocoetocuri

3Caritiin relanajaeniha chuneine, Cana Curuaana Jesocurisito ere rauhi tonoraelanaala neeuruhane coataa, rauhijiriin cana relaa cana relaaurerane jaan tonoraelanaala nenaate, 4itolere coitucuera niha nocoetoreein. Niite ita cotainaa jerereein joaenreein casaje coreniha nejesinajeein. Nitohaneeinte ita inasinee rijitoherijitojoeein, ita cotaain, ita que ereein, ita esenetaelanaala, 5ita que nejesinajeein nejerateein ita cotaairiin neeurureein. Nitohaneeinte neeurureein esinae erenaa rauhi baiteein naasaenacaauru. Nitorijia neeinchurute necoriquijiaain, nerujueletein nenaa coacuhin Cana Coaunera Ere tonorana jerereein inacojoeein. Nitohanai nihane, caje neloonaaun.

6Jataainte nelate, caa chauratane que nenaa rucuhele que cana suujuelanaala, raotojoein Cana Coaunera esenetaain tonoraacachene.

7Charijieein teeinti nejanoaacachene cha colane nejanoaacache. Nii rijijieeintechu ohacachene, cha amaelanaala curichaachein dedeeu. 8Aihana jaun neejiha cana lenone, cana cajione naajeine, niicha aina raotojoeein nihacachenete caohachae.

9Jana coriqui, rucuhele, naaonjoain taojiaa jereraaurute raaje necairichaaurure. Inacojoeein necoriquihana que suujuateeinte, raajenihane necoritaain necairichaaurureein nitohaneein nenaa jereraauru. 10Caohachaai jataain coriquiicha jeriha cachane, cacha aasaeraneein niha coriquine jaun. Nii corenihate Cana Coaunera esenetaain tonorana jianeein, raajenihane necairichaaure cacha tabaauru.

Jesocurisito esenetaain neeunaain ichaau

11Jiaonriha nitohanei ichaain neei Cana Coaunera coitucuera neeina jaunne. Cana Coaunera Ere tonoraain, Cana Coaunera Ere esenetaain, Cana Coaunera belaain, cachaauru belaain, joaenreein abaantaain, ishuujua coaraain, naaonjoaain nii ichaonaa caohachaacha sacuu.

12Arajiin aonajeeurera urichoo, “Inaen Cana Coaunera Calaohi Jesocurisito esenetaain nere tonorarichaunni”, naailune jaun, laraajiin neeunaain, caohachaain nii sanaachara nejeein nenaa ichaonaa caohati que nemucuhin atiin ichaau. Nii ichaaine coina ichotijiaa Cana Coaunerana jaan ichaau.

13Itolere cachaauru rai ichaonaa tera Cana Coaunera notaracaae, chaaen nii cocoainanacai Ponsio Filato rai caohati erenaa que erei Jesocurisito notaracaaena, ichei caa aitiin letoaaun. 14Caa ichei aitocoaunne rijijiein rauhijiriin ichaau. Nabana coaiteen caa chauratane que turuha Jesocurisitone bana que necocauhatiaaine coataa. 15Inae cuu tihane banate, Jesocurisito ecotiha cureein acaihanejein Cana Coaunera- canaacha belaai satiin curuaanaacuru curuaanaa. 16Acate chariji bana onaachara nejeein ne. Chabana cacha turunaja nihein cono tabai jana ne nii Cana Coaunera inanacaelanaala nenaa. Acate acaneein nereein itolere amuritoheriin laraajiin itolere bana coroaenojoineein.

Nitohaneein neeine.

Coriqui nebaauru suujuatihane

17Coriqui neba niha chuneine, coa “Chabana, cha lateriaunni”, naain leeochaauru que necohasitaain niha. Enaachate nitajihane, nitajeeoricheein coriqui. “Cana coroatajanerihani Cana Coaunerana jaun cha lateriaunni”, naauruhine. Acate canaacha latei teraneein ne, raotojoein cha latelanaala nihacachene coina. 18Aihana jaun cairicheihuru coroatajanejeein neein, raotojoeein neein chaelai latecuruha leeochaaurune, acaauru rai tiaajeein neeuruhine coriquihonaauru. 19Nitohaneein neeuruhanete, nii acatiha tacaain belainaanca Cana Coaunerane, nii niicha tei ichaonaa chabana nitajenaachara nejeein nenaa raa cuurureein, necairichanacaauru coroatajanecuruhane jaun.

Satonotihane rai Timoteeo suujuatiha Faborone

20-21Caa ichei caitoonjoan erenaa rauhi tonoraau inoaenlu netojoeein. Coa caa chauratane que ecocohin nenaa erenaa tonoraa. Coa, coitucuera rijitiin turuhin casaje que inara relaeranihane coa tonoraa. Nitohanai tonoraauruhane, Cana Coaunera bero rauhi udaa cuuruha tabaaurune jaun.

Ichoelaain ii beraaine Cana Coaunerara Timoteeo.

Inaen saa.

Currently Selected:

Timoteeo Rai Leinjiin 6: URA

Highlight

Compare

Copy