Timoteeo Rai Coroataja 1
1
Coaiteen nacoauneein Timoteeo rai quiricha laenaa Faborone
1Jeriha Cana Coaunerana jaunte caletoae, Jesocurisito que cachauru relaanune, esenetaauruhane ichaonaa esine raauruhane coina. 2Ii raine nacoauneein laenaaunra quiicha belaai cacalabi Timoteeo. Raotojoein neeine coina, rai raotonoque ii rausiajeein ii coroatajaneeuruine Cana Inaca Cana Coaunera, Cana Curuaanaa Jesocurisito, naaonjoain.
“Nariha”, naain ichoreniha Cana Coaunera coroajeein
3Jerichanejeein aichejetocuruha caferateracurune rijijieeine Cana Coaunera belaain, nere tonoraain casuujua coaraain neeun. Itolere banana janotiin netojoeein Cana Coaunera bajaebajaecaaunne jana casuujuaniha neeoritohine, “Nariha”, naain ichoreniha Cana Coaunera coroajeein.
4Itolere banana inota baca raainaaine coaaujeeun. Nii jaunna ichoaranaa jereeun, jataain raotojoein rachoojoeein nihanune coina. 5Ishuujua coaraain Cana Coaunera esenetaaine quena, casuujua ereerejeeun coaaucaaune. Jerichanejeein techu Cana Coaunera esenetaaurelu edaae Loira, choba Eonise, naaojoaihunri. Nii jaunna, “Daae, rai neba, naaojoaihunri rijijieeinte esinae rauhijiriin Cana Coaunera tonorae Timoteeo”, naain casuujua ereerejeeun.
Atiin coejelanaala, “Canacaanu Curuaanaa Jesocurisito ere tonoraera nichaaun”, naain joaenreein cacha rai beeu.
6Nii jaunna ichei aitoon, atiin nacoauneein que nemucuhin, nii Cana Coaunera tenojoin amihanenaa ichaaine coina. Nii ichouturi choae cacoii meecaanune jana Cana Coauneraacha tei amihanenaa ichaau. 7Coa casiha. Coatiha casiinaa najaannu que rai esenetaera suujua corihei Cana Coaunera. Laraajiin, neeunaain, Cana Coaunera, leeochaauru, naaonjoain belaain nererojoecaelanaala neein, suujua coaraain nihane coinate esenetaera suujua core Cana Coaunera.
8Atiin coejelanaala, “Canacaanu Curuaanaa Jesocurisito ere tonoraera nichaaun”, naain joaenreein cacha rai beeu. Coa caresero cuhane caseteco neein nihanune que necoejiha, Jesocurisito que cacha relaanune coreniha caseteco neein nihanune jaun. Aihana jaun, iitonai Jesocurisito que cacha relaaine coreniha, iitonai rerohecaauruhane, atiin laraajiin neeunaain neeu. Ii coroatajanerichaain Cana Coaunerana jaunte, abaantaain neunanaa naineriquiin.
9Caohachaain nihacachene que ainaa tocohaneeinte, cana cotijiaain cana rae Cana Coaunera, acaihanejein nere tonoraera neein nihacachene coina. Niritiin jauriaanejeein aitiin cacha coaunaane jaunte, Jesocurisito cacha nichaachene coreniha cana belaain cana rae Cana Coaunera. 10Nitohanihane jaunte jianacoon cana terane que Jesocurisito letoae Cana Coaunera, coaraain coitucuhacachene coina. Cana coreniha ohin ichanaa Jesocurisitone jaunte, ohacachene necairichanaa coaraelanaala, neculocohin onaacharanejeein nerichaacheein coaiteen turuha Jesocurisitone.
11Nii jaunte canu cocoainaain caenoaain caletoae Cana Coaunera, rai nere beebejeein Jorioniheichuru relaanune coina. 12Nii jaunna chaque casilanaala nere beebejeein cachaauru relaanune coreniha, caa catohaneein caseteco neein neeun niqui, nena coejelanaala caa neeun, cana coroatajanera coitucuhanune jaun. Acate laen naine cacorataaneein cacoeraiha ne, coaiteen nacoauneein turuhane reeintiaain.
13Nii jauriaa ichelaanulune rijijieein ichaaechajeein neeu. Jesocurisito cacha nichaachene jaun, coanete Jesoso esenetaain, Cana Coaunera, leeochaauru, naaonjoain belaain nihacache. 14Cana suujua cuhane ichaoha Cana Coaunera Suujuena jaun uhaain, atiin que neeunaain nii ichei Cana Coauneraacha tenojoin erenaa rauhi tonoraain ichaau.
Cacoelaain cacorataaniha Onesiforo ne
15Nii coitucuhine tocohaneeinte caque jaolecoore saain Asia cocoaichacuru. Fijelo, Eremojene, naaojoaihunri nihanatiinte saain caque jaolecoore.
16Onesiforo sinijiera, bereecuru, naaonjoain belaain coroatajaneeine Cana Coaunera atiin carai, araai saain cacoelaain cacorataanihane coreniha. Acate caseteco neein nihanu natiin, cacoreniha necoejelanaala cacorataane. 17Cau Romau turuhinte, mainajeein amuhemujueein caariin, tabiicha cauruhin atiin cacorataane. 18Nii choae tacaain techu, nii Efesoo nihaca jiniiquiinne bana, jataain cana coroatajanelu nii Onesiforo. Nii coreniha atiin belaaine Cana Curuaanaa Jesocurisito, inae coaiteen cau chauratane que turuhane bana.
Currently Selected:
Timoteeo Rai Coroataja 1: URA
Highlight
Share
Compare
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
