Timoteeo Rai Leinjiin 5

Cana Coaunera coitucuurera aina suujua coaraain nihane

1Baasoneein ichaa chunei ichauhenane, coa cotaicha rijitiin suujuatiha. Charijieein teeinti chaca suujuateeine suujuateei. Nii rijijiein raotojoeein belaain suujuateeu. Chaenchu chocoalacuru belaaine rijitojoeein enamanaacuru belaihu. 2Jericha nejeeinchu choba aina caoachaain neeine rijijieein enecuru aina caoachaain neeu. Jericha nejeeinchu ii baihuru aina caoachaain neeine rijijieein ranunaauru aina netonai caoachaain neeu.

3Niha autananeein enene coroatajaneeu, esinae rauhijiriin cairicheineein nihane. 4Jana, niha calaohi, nichoala, naaonjoainne fojiaraauru nihane coitucuhin, coitucueracuru neein nihane coitucuhin coroatajanecuruhinete, nii acaauru fojiaa acaauru fojiarane acatiha tacaain cainaauruhine, nitohaneein jeriha Cana Coaunerana jaun.

5Canaanai sirilanaala jataain jelai nihanete, Cana Coaunera bajaaebajaaecure janotiin netojoeein autanaauru esineeuru, acaauru coroatajanena nainiha Cana Coaunerane coitucuuruhana jaun. 6Jana, itolere rucuheleeuruhacha coacuhin caohatiin neruujuein raotojoeein ichaonaa coaauca autananete, ninauhene nenaa rijijiein niha cureein.

7Caritiinchu acaauru relaau, suujuatera latecuruhane coataa. 8Chunocoha chaelai latiha naraaichuru jana coroatajanena jerenihane choae tacaain fojiaraauru coroatajanena jerenihanete, Cana Coaunera coitucuuruhi fautaeriin nereein, “Cana Coaunera coitucuhanu”, naane niha natiin, Cana Coaunera Ere tonoraenihane.

9Coa joaenreein autana curuaa laenaa, autana esine canaacha coroatajaneeni curuaacuru siricha quiricha cuhane. Caohachaain saota choonca ajaanaca niha autanane curuaa laenaau. Chaaen leinjiin quicha aina neein autana nihane, curuaa laenaau. 10Chaenchu jaiti jiniiquiin ichaohin neeuruhane caje coaauneein, caohatiin bereecuru fojiara neein, rene bedaenecuruha niicha coitucuuruhi cachaaurune jana caohatiin raera neein, rene bedaenecuruha cana nejeraauru Cana Coaunera coitucuurerane jana jataain belaain raera neein, necairichaa chuneine jana coroatajanera neein, naaonjoaain neinihanete caohachare.

11Jana jaiti ena nichauhenane cataaun tiha autanane, coa curuaa laenaa quiricha cuhane. Nabana “Inae coaiteen nelanajariaunni”, naain iriha Jesocurisito raine baiha, 12Jesocurisito ere tonorana coiinteein nacoauneein nelanajaane, caseteco coaraane coataa. 13Chaenchu bajeritiin neein, le lorerichuru asae cuhin cajihaneein casaje que ereerejeein itolere cachaacha rautaai que enohane coataa.

14Nii jaunna, jaiti ranunaniha autanane nelanajaane jereeun. Nelanajain bereecuru fojiaain, rai namihaneeon ichaane jereeun, nihei cha que lerateein colurujuenaa naineniha Moconajaerane coina. 15Tabaauru Cana Coaunera jianeein, Moconajaaera ere tonoraauruha autanaaurune jaun.

16Cana Coaunera coitucuhin esenetaerauru enecuru, autananiha chuni naraaine coroatajanemiin. Nabana jataain mainajeein amihaneein coroatajanecuruha Cana Coaunera rai ita taojiaeraauru cachaaurune coataa. Nitohaneein ichaquichenete, esinae cairicheineein nenacaauru autanaauru coroatajanena nainecurureein Cana Coaunera rai ita taojiaeraauru cachaauru.

Cana Coaunera rai ita taojiaeraauru cachaauru ichauhenaauru coroatajanecuche

17Atiin caohatiin Cana Coaunera rai ita taojiaeraauru cachaauru suujuateein beraihurera ichauhenaauru belaain coroatajanecuruhine. Chaenchu acaihanejein Cana Coaunera Ere beebejeein cachaauru relaaureraacha coroatajanecuruhine, leeochaauru coroatajanecuruhane amuritoheriin.

18“Baca amiharateeiche aroso rojoeenaa quene, coa aroso quihane coataa borasa que nujuae conajaain amiharatihache”, aitoha Cana Coaunera ere cuhanaine jaun, amihanihane coreniha quihanete caohachae. Nii rijijiein core raauruha nii Cana Coaunera Ere beebejeein cacha relaaurera ichauhenaaurunete caohachae.

19Neniha coroatajaain, nichatajaain, naaonjoain coaraaurune jana ii rai ichauhena colurujiha chuneine coa tonoraa. 20Chaenchu baaso ichaaechajeein nosatihajeein sacuha chunei ichauhenane, ita taojiaauruha cachaaurune jana, aonajeeuruha satiinne urichoo mijiainetiin rai aitiin suujuateeute caje coaraain casihuruhine nii leeochaauru.

21Chunei jataain ii suujua acateeine jaan niha natiin baaso ichaane, ita taojiaauruha cachaaurune jana acaauru suujuateeu, caa aitocoaunne tocohaneein. Cana Coaunera, Cana Curuaanaa Jesocurisito, chaaen janijiin nii niicha raauri letonocuru anjeraauru, naaonjoaihunri notaracaaena caa caritiin letoaaun, atiin nitohaneein ichaaine coina.

22Ena Jesocurisito esenetaera nihane, coa Cana Coaunera rai ita taojiaeraauru bichauhenaneein enoha, nabana enoin baasoneein ichaane, coroatajaneraneein ii nerotohine coata. Atiin ishuujua coaraain neeu.

23Cunaitejerii ii suriquene rijijiein, coa jeesiaanca nejeesinaacha coha. Ansijiin bino cohin coaraau.

24Inanacaa tabaauru osaque nesaruhane, “Naaonjoaainte nera”, naain que iriha chuneine latelanaala. Jana tabaauru raite inanacaene, “Naaojoaainte nera”, naain que erei colane.

25Jericha nejeeintechu nii rijijiein inanacae caohacha ichaain niha cachane. Jana jauriaanejeein inanacaenihane nihanatiinte nirijieein cuaajeein inanacaa cue.

Currently Selected:

Timoteeo Rai Leinjiin 5: URA

Highlight

Compare

Copy