Números 4
4
Coatpita miraq levitakuna imacho aruyänanpaqpis nishqan
1Moiséstawan Aaróntami Tayta Dios nirqan: 2<<Coatpita miraq levitakunata ayllunpa ayllunpa y castanpa castanpa censayay. 3Paykunata censayanki kimsa chunka (30) watayuqpita pisqa chunka (50) watayuqyaq. Say edä runakunami Tinkunansi Tolducho imapis ruraypaq kaqkunata rurayanqa. 4Coatpita miraq runakunami Tinkunansi Tolducho sagrädu kaqkunata apayanqa.
5<<Posädakuyashqanpita Israel runakuna aywakuyänanpaqmi Aarónwan surinkuna Pactu Babulta pituyanqa. Sayno pituyanqa Lugar Santupita Lugar Santïsimuta rakiraq cortïnawanmi. 6Say jananmanmi fïnu qarapita rurash tolduwan pituyanqa. Say toldu jananmannami juk piëzala awash azul tëlawan pituyanqa. Nirkurnami ishkay largu qerukunata churayanqa apayänanpaq.
7<<Saynöpis tanta churakuna mësapita tantata jorqurkur azul tëlawan pituyanqa. Say tëla jananmanmi churayanqa plätukunata, wishlakunata y altarman vïnuta jichapänanpaq cöpakunatapis järrakunatapis. Saynölami jorqushqan tantatapis tëla jananman churayanqa. 8Lapanta churaykurmi puka tëlawan jananpa pituyanqa. Say jananpa fïnu qarapita rurash tolduwan pituykurmi ishkay largu qerukunata churayanqa apayänanpaq.
9<<Saynölami azul tëlawan pituyanqa mechëruntinta candelabruta, alicätinkunata, platïllukunata y aceiti winakuyänan väsunkunatapis. 10Nirkurnami fïnu qarapita rurash tolduwan pituykur apayänanpaq kirma jananman churayanqa.
11<<Saynölami qoripita rurash altartapis azul tëlawan pituyanqa. Say jananpami fïnu qarapita rurash tolduwan pituyanqa. Saypitanami ishkay largu qerukunata churayanqa apayänanpaq.
12<<Nirkurnami Tinkunansi Sagrädu Tolducho kaq manëjukunatapis azul tëlakunawan pituyanqa. Saypitanami fïnu qarapita rurash tolduwan piturkur kirma jananman apayänanpaq churayanqa.
13<<Sacrificiu rupasina altarpita uchpata pisaskirmi granäti tëlawan saparkuyanqa. 14Nirkurnami tëla jananman churayanqa tenäzakunata, trinchikunata, kanalakunata, tazonkunata y altarcho kaq lapan manëjukunatapis. Nirkur fïnu qarapita rurash tolduwan piturkurmi ishkay largu qerukunata apayänanpaq churayanqa.
15<<Aarón y surinkuna lapan say sagrädu kaqkunata pituyta ushaskiyaptinnami Coatpita miraqkuna shayämunqa apayänanpaq. Manaraq pituptinqa manami yataylapis yatayanmansu. Saykunata yatarqa wanuyanqami. Saynöpami Tinkuna Tolducho kaqkunata Coatpita miraqkuna apayanqa.
16<<Aarónpa surin Eleazarmi apanqa candelabru ratananpaq aceitita, mushkuq inciensuta, altarcho rupasinanpaq apayämushqan saki mikuykunata y sagrädu aceititapis. Paymi kanqa Sagrädu Tolduta y saycho kaykaq lapan manëjukunatapis rikananpaq>>.
17Moiséstawan Aaróntami Tayta Dios nirqan: 18<<Cuidä levitakunacho Coat ayllupita miraqkuna ushakäyanman. 19Sagrädu manëjukunata yatar mana wanuyänanpaq Aarón y surinkuna Coat ayllu runakunata tantiyasiyanqa imata rurayänanpaq y imata apayänanpaqpis. 20Say sagrädu manëjukunata manaraq pituyaptin Tinkunansi Tolduman ama yaykuyäsunsu. Say manëjukunata rikarqa wanuyanqami>>.
Gersónpita miraq levitakuna imacho aruyänanpaqpis nishqan
21Nirkurnami Moisésta Tayta Dios nirqan: 22<<Saynöpis Gersónpita miraq levitakunata ayllunpa ayllunpa y castanpa castanpa censayay. 23Paykunata censayanki kimsa chunka (30) watayuqpita pisqa chunka (50) watayuqyaq. Say edä runakunami Tinkunansi Tolducho imapis ruraypaq kaqkunata rurayanqa.
24<<Gersónpita miraq levitakunami kaykunata apayanqa: 25Tinkunansi Sagrädu Toldupa cortïnankunata, Tinkunansi Tolduta, qataraq toldunkunata, say jananman qataraq fïnu qarapita rurash tolduta, Tinkunansi Toldupa punkun saparaq cortïnata, 26patiutawan altarta jiruruypa saparaq cortïnakunata watuntinta, waqtapita patiuman yaykuna cortïnata y wakin manëjunkunatapis. 27Aarón y surinkunami niyanqa Gersón runakuna imata rurayänanpaq y imata apayänanpaqpis. 28Say manëjukunatami Gersónpita miraqkuna apayanqa. Lapantapis rurayanqa cüra Aarónpa surin Itamar tantiyasishqannöla.
Meraripita miraq levitakuna imacho aruyänanpaqpis nishqan
29<<Saynöpis Meraripita miraq runakunata ayllunpa ayllunpa y castanpa castanpa censayay. 30Paykunata censayanki kimsa chunka (30) watayuqpita pisqa chunka (50) watayuqyaq. Say edä runakunami Tinkunansi Tolducho imapis ruraypaq kaqkunata rurayanqa. 31Paykunami apayanqa Tinkunansi Sagrädu Toldupa marcunkunata, travesäñunkunata, jorconninkunata, jawiräkunanta, 32Tinkunansi Sagrädu Toldupa patiunpa jorconninkunata, jorconpa jawiräkunanta, estäcankunata, watunkunata y lapan manëjunkunatapis. Qammi ninki cada ünun imata apayänanpaq kashqantapis. 33Say manëjukunatami Meraripita miraqkuna apayanqa. Tinkunansi Tolducho sirvimar lapantapis rurayanqa cüra Aarónpa surin Itamar tantiyasishqannöla>>.
Levitakunata censayashqan
34 Tayta Dios sayno niptinmi Moisés, Aarón y mayor runakuna Coatpita miraqkunata ayllunpa ayllunpa y castanpa castanpa censayarqan. 35Sayno censayarqan kimsa chunka (30) watayuqpita pisqa chunka (50) watayuqyaqmi. Say edä runakunami Tinkuna Tolducho imapis ruraypaq kaqkunata rurayarqan. 36Coatpita miraqkunata censayaptin ishkay waranqa qanchis pachak pisqa chunka (2,750) runakunami kayarqan. 37Paykunami Tinkuna Tolducho ima ruraykunatapis rurayarqan. Moisésta Tayta Dios nishqannölami paykunata Moiséswan Aarón censayarqan.
38Gersónpita miraqkunatapis ayllunpa ayllunpa y castanpa castanpami censayarqan. 39Sayno censayarqan kimsa chunka (30) watayuqpita pisqa chunka (50) watayuqyaqmi. Say edä runakunami Tinkuna Tolducho imapis ruraypaq kaqkunata rurayanqa. 40Gersónpita miraqkunata censayaptinmi ishkay waranqa soqta pachak kimsa chunka (2,630) runakuna kayarqan. 41Paykunami Tinkuna Tolducho ima ruraykunatapis rurayarqan. Tayta Dios nishqannölami Moiséswan Aarón paykunata censayarqan.
42Meraripita miraqkunatapis ayllunpa ayllunpa y castanpa castanpami censayarqan. 43Sayno censayarqan kimsa chunka (30) watayuqpita pisqa chunka (50) watayuqyaqmi. Say edä runakunami Tinkuna Tolducho imapis ruraypaq kaqkunata rurayarqan. 44Meraripita miraqkunata censayaptinmi kimsa waranqa ishkay pachak (3,200) runakuna kayarqan. 45Paykunami Tinkuna Tolducho ima ruraykunatapis rurayarqan. Tayta Dios nishqannölami Moiséswan Aarón paykunata censayarqan.
46 Levitakunata ayllunpa ayllunpa y castanpa castanpa censashpanmi Moisés, Aarón y Israel runakunapa mandaqninkuna 47kimsa chunka (30) watayuqpita pisqa chunka (50) watayuqyaq censayarqan. Say edä runakunami Tinkuna Tolducho imapis ruraypaq kaqkunata rurayarqan. 48Lapanta censayaptinmi puwaq waranqa pisqa pachak puwaq chunka (8,580) runakuna kayarqan. 49Moisésta Tayta Dios nishqannölami cada ünun imata apayänanpaqpis niyarqan.
Moisésta Tayta Dios nishqannölami levitakuna censash kayarqan.
Currently Selected:
Números 4: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
