Números 5
5
Impüru runakunata qarquyänanpaq tantiyasishqan
1Moiséstami Tayta Dios nirqan: 2<<Israel runakunata niy leprawan qeshyaqkunata, purgacionwan qeshyaqkunata y aya yataqkunatapis campamentupita qarquyänanpaq. 3Campamentu impüru mana rikakunanpaq warmi kaptinpis olqu kaptinpis qarquyanki. Campamentuchöqa qamkunawanmi noqa taykä>>.
4Moisésta Tayta Dios nishqannölami sayno kaqkunata Israel runakuna campamentupita qarquyarqan.
Perjuiciuta ruraq runa pägapakunanpaq tantiyasishqan
5Moiséstami Tayta Dios nirqan: 6<<Israel runakunata niy: <Warmipis olqupis Tayta Diosta mana cäsukur runa mayinta perjuiciuta rurarqa jusalikuykanmi. 7Saymi jusalikushqanta reconöcir runa mayinta perjuiciuta rurashqanpita päganqa. Say jananmanraq quinta parti masta päganqa. 8Perjuiciu rurashqan runa wanukushna kaptin y ayllunkunapis manana kayaptinqa pägapakunanpaq kaqta cürata entreganqa. Say pägapakushqan Tayta Diospaq kaptinmi cürapaqna kanqa. Saynöpis entreganqa juk carnita altarcho rupasiptin perdonash kananpaq.#Lev. 6.1-7.
9<< <Sagrädu ofrendakunata Israel runakuna Tayta Diospaq apayashqankuna cürapaqmi kanqa. 10Lapan chaskishqankunapis kikin cürapaqmi kanqa> >>.
Celösu runa imata rurananpaqpis tantiyasishqan
11Moiséstami Tayta Dios nirqan: 12<<Israel runakunata niy: <Aybësis cäsu kanmanmi pï warmipis runanta qanratashqan. 13Runanta sayno qanratashqanta pipis mana tariykaptin 14runan celösu rikakurqa 15warminta cüraman pushanqa. Saynöpis saki mikuy ofrendapaq ishkay kïlu cebäda jarinata apanqa. Say ofrendamanqa ama winapanqasu aceitita ni inciensuta. Say ofrendaqa kanqa warmin qanrataykashqanta o mana qanrataykashqantapis musyananpaqmi.
16<< <Cüranami say warmita Tayta Diospa nawpanman#5.16 Tayta Diospa nawpanman nirqa Tinkuna Tolducho kaykaq altarpa nawpanmanmi nikan. pushanqa. 17Saypitanami sagrädu yakuta mitu väsuman winaykur say yakuman Sagrädu Tolducho kaykaq alpata shuntarkur winanqa. 18Say warmita Tayta Diospa nawpanman pushaykurnami piltash aqsanta paskasinqa. Saychömi celösu kashqanpita runan apamushqan ofrendata cüra aptapanqa. Saynöpis iwjiq yakuta väsuwan aptaranqa say warmi jusayuq kar maldicionash kananpaq. 19Nirkurna say warmita jurasir ninqa: <<Pï runawanpis qowaykita mana qanratash kaptikiqa kay iwjiq yakuta upuptiki manami maldición päsashunkisu. 20Qowaykita qanratar jukta waynäkush kaptikiqa 21lapan runakuna rikakuyänanpaqmi Tayta Dios maldicionashunki. Saymi mädrinniki jakaptin shuluyla shulunki. 22Say maldición päsashunki kay iwjiq yakuta upuptikimi>>.
<< <Cüra sayno niptinmi say warmi ishkay kuti ninqa: <<Nishqaykino kasun>>.
23<< <Saypitanami maldición päsananpaq nishqanta cüra qelqanqa. Nirkurmi qelqashqanta maylaskir say yakuta winanqa väsucho kaykaq iwjiq yakuman. 24Say iwjiq yakutanami warmita cüra makyanqa. Jusayuq karqa say yakuta upuskir pasaypami nakanqa. 25Yakuta chaskirkurmi qowan celösu kashqanpita apamushqan saki mikuy ofrendata cürata entreganqa. Saytami Tayta Diospa nawpancho joqarkur wakman kayman kuyurkasir cüraqa altarman churanqa. 26Tayta Dios imaypis yarparänanpaqmi say ofrendapita juk aptayta jorquskir altarcho rupasinqa. Nirkurnami iwjiq yakuta warmita upusinqa. 27Runanta qanratash karqa say yakuta upuskir pasaypami nakanqa. Saymi mädrinnin jakaptin shuluyla shulunqa. Sayno nakanqa lapan runakuna rikakuyänanpaqmi. 28Runanta mana qanratash kaptinmi isanqa imapis päsanqasu y qeshyaq rikakurpis shulunqasu.
29<< <Sayno rurayanki warmin jarukushqanta runa maliciaptin 30jusayuq o mana jusayuq kashqantapis musyananpaq. Say warmitami Tayta Diospa nawpanman cüra pushanqa Tayta Dios nishqankunata lapanta rurananpaq. 31Sayno ruraptinqa runan manami jusayuqsu kanqa. Warminmi isanqa kikinpa jusanpita shuluyla shulunqa> >>.
Currently Selected:
Números 5: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
