Números 3
3
Levitakunata tantiyasishqan
1Sinaí jirkacho Moisésta Tayta Dios parlapänan wisan Moiséspa y Aarónpa surinkuna kayarqannami. 2Aarónpa surinkuna kayarqan Nadab, Abiú, Eleazar y Itamar.#Núm. 26.60. Nadab karqan qechpa surinmi. 3Paykunatami cüra kayänanpaq Moisés churarqan. 4Sinaí sunyaq jirkacho yarpaylankunapita inciensuwan qoshnisiyashqanpitami Nadabwan Abiú suriynaqla Tayta Diospa nawpancho wanuyarqan.#Lev. 10.1-2; Núm. 26.61. Eleazarwan Itamarnami taytan Aarón yäsishqannöla cüra kayarqan.
5Saypitanami Moisésta Tayta Dios nirqan: 6<<Levitakunata qayaykasir wilay Aarónta imaypis yanapäyänanpaq. 7Paykunami Aarónta y Israel mayinkunata yanapar Tinkunansi Tolducho imapis ruraypaq kaqkunata rurayanqa. 8Tolducho lapan manëjukunatapis shumaq rikayanqa. Paykunami Israel mayinkunapa trukan Tinkunansi Sagrädu Tolducho imapis ruraypaq kaqkunata rurayanqa. 9Sayno kaptinqa levitakunata churay Aarónpa y paypita miraqkunapa makincho kar imaypis yanapäyänanpaq. 10Aarón y paypita miraqkunalami cüra kayanqa. Pipis cüra mana kaykar cüra rurananpaq kaqkunata rurarqa wanunqami>>.
Levitakunata Tayta Dios akrashqan
11Nirkurnami Moisésta Tayta Dios nirqan: 12-13<<Egiptucho lapan qechpa kaqkunata wanusirmi noqa nirqä Israel runakunapa qechpa surinkuna y uywankunapa punta yuriq wawankunapis noqapa kayänanpaq.#Éxo. 13.2, 11-16. Israel runakunapa qechpa olqu surinkunapa trukanmi levitakunatana akrashkä noqapa kayänanpaq. Saymi paykunaqa noqapana kaykäyan. Noqami Tayta Dios kaykä>>.
Leví trïbuta censayashqan
14Sinaí sunyaq jirkachömi Moisésta Tayta Dios nirqan: 15<<Leví trïbuta ayllunpa ayllunpa y castanpa castanpa olqu kaqkunata juk killayuqpita janaman censanki>>.
16 Tayta Dios nishqannölami Moisés censarqan.
17Levípa surinkunami kayarqan Gersón, Coat y Merari.
18Gersónpa surinkunami kayarqan Libniwan Simei. Paykunapita miraqkunami kaykäyan Libni ayllu y Simei ayllu runakuna.
19Coatpa surinkuna kayarqan Amram, Izhar, Hebrón y Uziel. Paykunapita miraqkunami kaykäyan Amram ayllu, Izhar ayllu, Hebrón ayllu y Uziel ayllu runakuna.
20Meraripa surinkunami kayarqan Mahliwan Musi. Paykunapita miraqkunami kaykäyan Mahli ayllu y Musi ayllu runakuna. Saynömi levitakunapa ayllunkuna qechpapita shulkayaq kaykäyan.
21Gersónpita miraqkunami kaykäyan Libni ayllu y Simei ayllu runakuna. 22Juk killayuqpita janaman lapan olqukunata yupaptin say ishkay ayllu runakuna kayarqan qanchis waranqa pisqa pachakmi (7,500). 23Gersónpita miraqkunami Sagrädu Toldupita inti jeqanan kaqläpa toldunkunata sharkasiyarqan. 24Paykunapa mandaqninmi karqan Laelpa surin Eliasaf. 25Say ishkay ayllu runakunami Tinkuna Tolduta, qataraq toldukunata y yaykuna cortïnatapis cuidayaq. 26Saynöpis cuidayaq patiupa cortïnankunata, patiuman yaykuna cortïnata y watunkunatapis. Say patiuqa Tinkuna Sagrädu Toldupa y altarpa intëru waqtankunapami karqan.
27Coatpita miraqkuna kaykäyan Amram ayllu, Izhar ayllu, Hebrón ayllu y Uziel ayllu runakunami. 28Juk killayuqpita janaman lapan olqukunata yupaptin say chusku ayllu runakuna kayarqan puwaq waranqa kimsa pachakmi (8,300). Paykunami Tinkuna Sagrädu Toldu rurincho kaqkunata cuidayaq. 29Coatpita miraqkunami Sagrädu Toldupita sur kaqläpa toldunkunata sharkasiyarqan. 30Paykunapa mandaqninmi karqan Uzielpa surin Elizafán. 31Say chusku ayllu runakunami täpayaq Pactu Babulta, mësata, candelabruta, altarkunata, Tinkuna Sagrädu Toldu rurincho cortïnata y sagrädu manëjunkunatapis.
32Levitakunapa mandaqninmi karqan cüra Aarónpa surin Eleazar. Saymi Tinkuna Sagrädu Tolduta täpayänanpaq levitakunata mandarqan.
33Meraripita miraqkunami kaykäyan Mahli ayllu y Musi ayllu runakuna. 34Juk killayuqpita janaman lapan olqukunata yupayaptin say ishkay ayllu runakuna kayarqan soqta waranqa ishkay pachakmi (6,200). 35Meraripita miraqkunapa mandaqninmi karqan Abihailpa surin Zuriel. Paykunami Sagrädu Toldupita norti kaqläpa toldunkunata sharkasiyarqan. 36Say ishkay ayllu runakunami täpayaq Sagrädu Toldupa marcunkunata, travesäñunkunata, jorconninkunata, jawiräkuyänankunata y lapan manëjunkunatapis. 37Saynölami täpayaq Tinkuna Sagrädu Toldu patiupa jiruruypa tumaraq jorconkunata, estäcankunata y watunkunatapis.
38Tinkuna Toldupita inti jeqamunan kaqläpanami Moiséswan Aarón toldunkunata sharkasiyarqan. Saynölami paykunapa nawpalanpa Aarónpa surinkunapis toldunkunata sharkasiyarqan. Paykunami kayarqan Israel mayinkunapa trukan Sagrädu Tolduta shumaq täpayänanpaq. Pipis cüra mana kaykar cüra rurananpaq kaqkunaman jatikarqa wanunqami.
39 Tayta Dios nishqannöla Moiséswan Aarón levitakunata ayllunpa ayllunpa juk killayuqpita janaman censayaptinmi ishkay chunka ishkay waranqa (22,000) olqukuna kayarqan.
Israel runakuna wakin qechpa surinkunapita pägayashqan
40Moiséstami Tayta Dios nirqan: <<Juk killayuqpita janaman Israel runakunapa qechpa surinkunata censay. 41Israel runakunapa qechpa surinkunapa trukan levitakunami noqapaq kaykäyan. Saynöpis Israel runakunapa uywankunapa punta yuriq wawankunapa trukan levitakunapa uywankunami noqapaq kaykäyan. Noqami Tayta Dios kaykä>>.
42 Tayta Dios nishqannölami Israel runakunapa qechpa surinkunata Moisés censarqan. 43Juk killayuqpita janaman olqu kaqkunata censaptinmi ishkay chunka ishkay waranqa ishkay pachak qanchis chunka kimsa (22,273) qechpakuna kayarqan.
44Saymi Moisésta Tayta Dios nirqan: 45<<Israel runakunapa qechpa olqu surinkunapa trukan levitakunami noqapa kaykäyan. Saynöpis Israel runakunapa punta yuriq uywankunapa trukan levitakunapa uywankunami noqapa kaykäyan. Noqami Tayta Dios kaykä. 46Levitakunapitaqa Israel runakunapa qechpa surinkuna ishkay pachak qanchis chunka kimsa (273) masmi kayan. Say pusuq runakunapa trukanta 47mananki cada ünunpita pisqa siclo qellayta#3.47 Juk siclo qellayqa killa arur gänashqannömi karqan. pägayäshunaykipaq. Juk siclo qellayqa Tinkuna Sagrädu Tolducho kaykaq pësakunawan pësaptin chunka juk grämu qellaymi kaykan. 48Say qellayta Aarónta y surinkunata entreganki>>.
49Sayno niptinmi Israel runakunapa qechpa surinkunapita pägayashqanta ishkay pachak qanchis chunka kimsa (273) qellayta Moisés shuntarqan. 50Sayno shuntarqan juk waranqa kimsa pachak soqta chunka pisqa (1,365) siclo qellaytami. Say siclukunata pësarqan Tinkuna Sagrädu Tolducho qellay pësakunawanmi. 51Tayta Dios nishqannölami Aaróntawan surinkunata say qellayta Moisés entregarqan.
Currently Selected:
Números 3: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
