Números 28
28
Waran waran sacrificiuta rupasinanpaq tantiyasishqan
Éxodo 29.38-46
1Saypitanami Moisésta Tayta Dios nirqan: 2<<Israel runakunata yäsinki nishqä junaqkunacho mana qonqaypa sacrificiuta rupasiyänanpaq. Say rupasiyashqanqa mikuynïmi kaykan. Mushkuyninta mayarmi kushikushaq.
3<<Saynöpis tantiyasir ninki: <Waran waran juk watayuq ishkay sänu carnishta Tayta Diospaq rupasiyanki. Carnishkunata rupasiyashqaykimi rupasina sacrificiu kanqa. 4Jukaq carnishta pasa waraykaptin rupasiyanki y jukaqtana pasa sakaykaptin rupasiyanki. 5Saykunata rupasir saki mikuytapis rupasiyanki ishkay kïlu alinnin jarinata juk litru olïvu aceitiwan sapurkur> >>.
6(Saynömi Sinaí jirkacho rupasina sacrificiukunata waran waran rupasiyarqan. Say rupasiyashqanpa mushkuyninmi Tayta Diospa shonqunpaqno karqan.)
7<< <Cada carnishta rupasinaykipaq apamurmi juk litru vïnutapis apayämunki. Say vïnutami Tayta Diosta adorar Tinkuna Sagrädu Toldu patiucho kaykaq altarman winayanki. 8Jukaq carnishtana tutapa rupasiyashqaykinöla tardipapis rupasiyanki. Say jananmanmi tutapa winayashqaykinöla saki mikuytawan vïnutapis winayanki. Say rupasiyashqaykipa mushkuyninmi Tayta Diospa shonqunpaqno kanqa.
Jamay junaqcho sacrificiuta rupasiyänanpaq tantiyasishqan
9<< <Jamay junaqpis juk watayuq ishkay sänu carnishkunata altarcho rupasiyanki. Say jananman chusku kïlu alinnin jarinata olïvu aceitiwan sapurkur saki mikuy ofrendata rupasiyanki. Saynöpis rupaykäsishqayki jananman vïnutapis winayanki. 10Jamay junaqcho sayno rupasirpis y vïnuta jananman winaparpis ama qonqäyankisu waran waran rupasina sacrificiuta rupasiytapis.#Mat. 12.5.
Cada killa sacrificiukunata rupasiyänanpaq tantiyasishqan
11<< <Cada killacho punta kaq junaq Tayta Diospaq sacrificiuta rupasiyanki ishkay sänu turïtukunata, juk sänu carnita y juk watayuq qanchis sänu carnishkunata. 12Cada turïtuta rupasir soqta kïlu alinnin jarinata aceitiwan sapurkur jananman winayanki. Saynöla cada carnita rupasirpis chusku kïlu alinnin jarinata aceitiwan sapurkur winayanki. 13Cada carnishta rupasir ishkay kïlu alinnin jarinata aceitiwan sapurkur winayanki. Say rupasiyashqaykipa mushkuyninmi Tayta Diospa shonqunpaqno kanqa. 14Turïtuta rupasir jananman winayanki ishkay litru vïnuta. Saynöla cada carnita rupasir juk litru mediu vïnuta winayanki. Cada carnishta rupasir juk litru vïnuta winayanki. Saynöla cada killa rupasina sacrificiuta imaypis rupasiyanki.
15<< <Juk chïvutapis say junaq purificasina sacrificiupaq rupasir jananman vïnuta winayanki. Saynöla waran waran rupasina sacrificiutapis mana qonqaypa rupasiyanki.
Pascua fiestacho sacrificiukunata rupasiyänanpaq tantiyasishqan
Levítico 23.5-8
16<< <Wata qalaykunan killa chunka chusku junaqcho Tayta Diosta adorar Pascua fiestata rurayanki.#Éxo. 12.1-13; Deut. 16.1-2. 17Say waraynin junaqpita qalaykurmi qanchis junaqyaq levadüraynaq tantata mikuyanki.#Éxo. 12.14-20; 23.15; 34.18; Deut. 16.3-8. 18Fiesta qalaykunan junaq ima aruytapis ama aruyankisu, saypa trukanqa Tayta Diosta adorayänaykipaq shuntakäyanki. 19Saynöpis Tayta Diosta adorar sacrificiuta rupasiyanki ishkay sänu turïtukunata, juk sänu carnita y juk watayuq qanchis sänu carnishkunata. 20Say sacrificiu rupaykashqan jananman winayanki aceitiwan sapush alinnin jarinata. Cada turïtuta rupasir soqta kïlu jarinata winapäyanki. Saynöla cada carnita rupasirpis chusku kïlu jarinata winapäyanki. 21Cada carnishta rupasir ishkay kïlu jarinata winapäyanki. 22Saynöpis purificasina sacrificiupaq juk chïvuta altarcho rupasiyanki. Say kanqa jusalikuyashqaykipita perdonash kayänaykipaqmi. 23Saykunata rupasirqa cada tuta rupasina sacrificiutapis mana qonqaypa rupasiyanki.
24<< <Waran waranmi qanchis junaqyaq fiestata rurar sayno rupasiyanki. Say rupasiyashqaykipa mushkuyninmi Tayta Diospa shonqunpaqno kanqa. Saynöla rupaykäsiyashqayki jananmanpis vïnuta winapäyanki. Saykunata rupasirqa cada tuta rupasina sacrificiutapis mana qonqaypa rupasiyanki. 25Qanchis kaq junaqchöqa ima aruytapis ama aruyankisu, saypa trukanqa Tayta Diosta adorayänaykipaq shuntakäyanki.
Semäna fiestacho sacrificiukunata rupasiyänanpaq tantiyasishqan
Levítico 23.9-22
26<< <Punta cosëchata shuntar Semäna fiestata#Éxo. 23.16; 34.22; Deut. 16.9-12. rurayaptiki juk junaq kanqa cosechayashqaykipita primiciata Tayta Diospaq apayämunaykipaqmi. Say junaqchöqa ima aruytapis ama aruyankisu, saypa trukanqa Tayta Diosta adorayänaykipaq shuntakäyanki. 27Say junaq Tayta Diospaq sacrificiuta rupasiyanki ishkay turïtuta, juk carnita y juk watayuq qanchis carnishkunata. Say rupasiyashqaykipa mushkuyninmi Tayta Diospa shonqunpaqno kanqa. 28Cada turïtuta rupasir aceitiwan sapush soqta kïlu alinnin jarinata winapäyanki. Saynöla carnita rupasirpis aceitiwan sapush chusku kïlu alinnin jarinata winapäyanki. 29Cada carnishta rupasir ishkay kïlu alinnin jarinata winapäyanki. 30Saynöpis purificasina sacrificiupaq juk chïvuta altarcho rupasiyanki. Say kanqa jusalikuyashqaykipita perdonash kayänaykipaqmi.
31<< <Saki mikuy ofrendantinta y vïnuntinta say sacrificiukunata rupasirpis waran waran rupasina sacrificiutapis mana qonqaypa rupasiyanki. Rupasiyänaykipaq kaq uywakunaqa lapanpis sänu kayanqa.
Currently Selected:
Números 28: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
