Números 27
27
Warmikunapis herenciata chaskiyänanpaq tantiyasishqan
1Manasés trïbuchömi say nanala pisqa warmikuna kayarqan. Paykunapa jutinkunami karqan Maala, Noa, Hogla, Milca y Tirsa. Paykuna kayarqan Zelofehadpa warmi surinkunami. Zelofehadnami karqan Heferpa surin, Hefernami karqan Galaadpa surin, Galaadnami karqan Maquirpa surin, Maquirnami karqan Manaséspa surin, Manasésnami karqan Josépa surin. 2Say pisqan warmikunami Tinkuna Toldu patiuman aywayarqan Moiséswan, cüra Eleazarwan y wakin mandaqkunawanpis parlayänanpaq. Chaykurmi niyarqan: 3<<Sunyaq jirkachömi papänï wanush. Tayta Diospa contran Coré sharkuptin pay manami mëtikurqansu say runakunawan wanunanpaq, sinöqa saypita qepataraqmi kikinpa jusanpita wanurqan. Saynöpis papänïpa olqu surin manami kashsu. 4Sayno kaptinpis olqu surin mana kashlanpitaqa papänïpa jutin manami elaqaykunmansu. Mana elaqakänanpaq papänïpa wawqinkunata aypuyashqayki kaqlapa noqakunatapis chakrata aypuykayälämay>>.
5Warmikuna sayno manakuyaptinmi Tayta Diosta Moisés tapukurqan. 6Sayno tapukuptinmi Tayta Dios nirqan: 7<<Zelofehadpa warmi surinkuna alitami yarpaykäyan. Zelofehadpa wawqinkunata aypur nawpankunalapa say warmikunatapis chakrata aypunki. Saynöpami papäninpa trukan paykunana chakrata chaskiyanqa.#Núm. 36.2. 8Saynöpis Israel runakunata niy: <Pipis olqu suriynaqla wanuptinqa warmi surinpaqnami chakran kanqa. 9Juklaylapis surin mana kaptinmi isanqa wawqinkunapaqna say runapa chakran kanqa. 10Wawqinkuna mana kaptinqa tiyunkunapaqnami chakran kanqa. 11Papäninpa wawqinkuna mana kaptinqa mayqanpis legïtimu ayllunpaqmi chakran kanqa. Kay nishqäkunaqa leymi kanqa Israel runakuna imaypis cumpliyänanpaq> >>.
Moiséspa trukan kananpaq Josuéta churashqan
Deuteronomio 31.1-8
12Saypitanami Moisésta Tayta Dios nirqan: <<Israel runakunata qoykunäpaq kaq nacionta rikanaykipaq Abarim jirkakunaman wisämuy. 13Saypita lapanta rikaskirmi wanukurna wawqiki Aarónnöpis unay aylluykikunawan tinkuq aywakunki. 14Sayno wanunki Zin niyashqan sunyaq jirkacho Israel runakuna yakunar conträ parlayaptin mana cäsukayämashqaykipitami. Qaqapita yakuta pashtasimushqayki höra runakunata manami musyasirqaykisu santu kashqäta>>.
(Sayno päsarqan Cades particho kaykaq Meriba pukyuchömi. Cadesqa Zin niyashqan sunyaq jirkachömi kaykan.)#Núm. 20.1-13; Deut. 3.23-27; 32.48-52.
15Sayno niptinmi Tayta Diosta Moisés nirqan: 16<<Tayta Dios, qammi pïmaytapis kawayta qonki. Kananqa noqapa trukä juk mandaqta churaykulay 17Israel runakunata maypa aywayaptinpis pusharänanpaq. Manasayqa misiqniynaq uyshanömi kayanqa>>.#1Rey. 22.17; Eze. 34.5; Mat. 9.36; Mar. 6.34.
18Sayno niptinmi Tayta Dios nirqan: <<Nunpa surin Josuémi#Éxo. 24.13. noqa munashqäno kawan. Qampa trukayki Israel runakunapa mandaqnin kananpaq paypa umanman makikita churay. 19Nirkurna cüra Eleazarman pushaykur lapan runakunapa nawpancho mandaq kananpaq churay. 20Israel runakunata wilay payta cäsukuyänanpaq.#Deut. 34.9; Jos. 1.16-18. 21Josué imatapis tapukamayta munarqa cüra Eleazarmanmi aywanqa. Eleazarnami Josuépa jutincho Urim rumiwan#Éxo. 28.30; 1Sam. 28.6. tapukamanqa. Imata rurananpaqpis musyaykurnami Israel runakunata Josué mandanqa>>.
22 Tayta Dios nishqannöla lapantapis Moisés rurarmi cüra Eleazarpa y lapan runakunapa nawpanman Josuéta pusharqan. 23Tayta Dios nishqannölami Moisésqa Josuépa umanman makinta churarqan trukan mandaq kananpaq.
Currently Selected:
Números 27: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
