Marcos 8

Chusku waranqa runakuna mikuyänanpaq milagruta Jesús rurashqan

Mateo 15.32-39

1Say junaqkunami aska runakuna Jesús kaqman yapay shuntakäyarqan. Imapis mikuyänanpaq mana kaptinmi discïpulunkunata qayaykur Jesús nirqan: 2<<Kay runakunata pasaypami kuyapä. Kimsa junaqnami mikuytapis mana yawaypa noqansiwan kaykäyan. 3Wakin shayämush karu markapitami. Mikünilata aywakuyänanpaq niptïqa wayinkunamanpis manaraq charchir malaqaywan aywapakäyanqa>>.

4Sayno niptinmi discïpulunkuna niyarqan: <<Kay sunyaq jirkachöqa ¿maychöraq mikuyta tariykushun kaysika runakunapaq?>>

5Niyaptinmi Jesús tapurqan: <<¿Aykalataq tantayki kaykan?>>

<<Qanchislami, taytay>> niyarqan.

6Sayno niyaptinmi runakuna jamakuyänanpaq Jesús nirqan. Jamaykuyaptinnami qanchis tantata aptarkur Tayta Diosta manakur päkilä nirqan. Nirkurnami pakirir discïpulunkunata makyarqan aypukuyänanpaq. 7Saynölami juk ishkay akapala pescädutapis Jesúsman apapäyarqan. Saykunatapis aptarkurmi Tayta Diosta agradëcikur runakunata aypukuyänanpaq discïpulunkunata makyarqan. 8Saymi lapan mikuyarqan pacha junta. Pusushqankunatanami discïpulunkuna shuntayarqan qanchis canasta juntata. 9Saycho mikuqkuna kayarqan chusku waranqanömi (4,000).

Mikuyta ushaskiyaptinnami runakunata Jesús despacharqan. 10Saypitanami büquiman wisarkur discïpulunkunawan aywakuyarqan Dalmanuta niyashqanman.

Milagrutaraq rikayta munayashqan

Mateo 16.1-4

11Chaykuyaptinmi fariseukuna manakaqman churayta munar Jesústa niyarqan: <<Tayta Dios rasunpaypa kachamushushqaykita musyayänäpaq ima milagrutapis ruraykulay taytay>>.#Mat. 12.38; Luc. 11.16.

12Sayno niyaptinmi Jesús lakikushpan nirqan: <<¿Imanirtaq kanan wisan runakuna munaykäyan milagrutaraq ruranäta?#Mat. 12.39; Luc. 11.29. Rasunpami nï: Qamkuna munayashqaykinöqa manami ima milagrutapis rurashaqsu>>.

13Sayno niskirmi runakunata kachaykur büquiman wisarkushpan discïpulunkunawan jukaq simpaman aywakuyarqan.

Fariseukuna mana criyiyashqanta levadüraman Jesús tinkusishqan

Mateo 16.5-12

14Jesúspa discïpulunkuna mirkapankunata apayta qonqash kaptinmi büquicho juk tantala karqan. 15Simpaykäyaptinmi Jesús nirqan: <<Fariseukunapa y Herodespa levadüranta cuidädu chaskipäyankimantaq>>.#Luc. 12.1.

16Sayno niptinmi discïpulunkuna kikinpura ninakuyarqan: <<Tantata mana mirkapakamushqansipitami sayno nikämansi>>.

17Sayno parlaykäyashqanta tantiyarmi Jesús nirqan: <<¿Imanirtaq parlaykäyanki tantata mana apayämushqaykipita? ¿Manaku tantiyayanki imapaq parlaykashqätapis? ¿Juiciuynaqku kayanki? 18Nawiyuq kaykarpis ¿manaku rikayanki? Rinriyuq kaykarpis ¿manaku wiyayanki?#Jer. 5.21; Eze. 12.2; Mar. 4.12. ¿Manaku yarpäyanki? 19Pisqa tantalapita pisqa waranqa (5,000) runakuna mikuyänanpaq milagruta rurashqäpita pusuqta ¿ayka canastatataq shuntayarqayki?>>

<<Chunka ishkaytami, taytay>> niyarqan.

20<<Saynöpis qanchis tantalapita chusku waranqa (4,000) runakuna mikuyänanpaq milagruta ruraptï pusuqta ¿ayka canastatataq shuntayarqayki?>>

<<Qanchistami, taytay>> niyarqan.

21Saymi Jesús nirqan: <<Sayta rikaykarpis ¿manaku tantiyayankiraq?>>

Betsaidacho qapra runata Jesús aliyäsishqan

22Saypitanami Betsaida markaman chäyarqan. Saycho kaykäyaptinmi qapra runata pushar Jesústa ruwayarqan aliyäsinanpaq. 23Saymi makinpita janchakurkur markapita jukläman Jesús jorqurqan. Saychömi qaprapa nawinman toqapaykur yataykushpan tapurqan: <<¿Rikankinaku?>> nir.

24Saymi rikachakuskir nirqan: <<Jachakunatanömi runakunata rikaykä. Isanqa puriykäyanmi>>.

25Saymi nawinta yapay yataykuptin lapanta shumaq rikarqan. 26Sayno aliyarkasirmi Jesús nirqan: <<Markaman mana chaylapa [ni pitapis mana wilapaylapa] wayikiman kutikuy>>.

Jesúsqa Cristo kashqanta Pedro nishqan

Mateo 16.13-20; Lucas 9.18-21

27Saypitanami discïpulunkunawan Jesús aywarqan Cesarea de Filipupa caseriunkunaman. Aywaykäyashqanchömi discïpulunkunata tapurqan: <<¿Pï kashqätataq runakuna nikäyan?>> nir.

28Saymi discïpulunkuna niyarqan: <<Wakin niyan Bautizaq Juan kashqaykita. Wakinnami niyan profëta Elías kashqaykita. Y wakinnami niyan mayqan profëtapis kashqaykita>>.#Mar. 6.14-15; Luc. 9.7-8.

29Sayno niyaptinmi Jesús yapay tapurqan: <<Qamkunaqa ¿pï kashqätataq yarpäyanki?>>

Saymi Pedro nirqan: <<Qamqa Tayta Dios kachamushqan Cristumi kanki>>.#Juan 6.68-69.

30Sayno niptinmi discïpulunkunata Jesús nirqan pitapis mana wilapäyänanpaq.#8.30 Say wisan Israel runakuna yarpäyarqan Cristuta Tayta Dios kachamuptin Roma runakunata guërracho vincinanpaq kashqantami. Sayno yarpäyaptinpis Jesucristo manami guërrata rurananpaqsu shamurqan, sinöqa noqansi rayku cruzcho wanunanpaqmi. Saymi discïpulunkunata Jesús nirqan pay Cristo kashqanta pitapis mana wilapäyänanpaq. Wanushqanpita kawarirkamurmi isanqa nirqan pïmaytapis wilapäyänanpaq (Mat. 17.9; 28.19).

Wanunanpaq kashqanta Jesús wilakushqan

Mateo 16.21-28; Lucas 9.22-27

31Saypitanami discïpulunkunata Jesús wilapar nirqan: <<Runapa Surintami seqaypa nakasiyanqa. Mayor runakuna, mandaq cürakuna y ley yachasiqkunami contran sharkur wanusiyanqa. Saypita kimsa junaqtaqa kawarimunqami>>.

32Saytaqa Jesús mana tumasipaylapami nirqan. Sayno niptinmi jukläman qayaykur Pedro olqutuparqan. 33Saymi discïpulunkunaman Jesús tikraykur Pedruta nirqan: <<¡Nawpäpita witikuy, Satanás! Qam manami munankisu Tayta Dios munashqanta ruranäta, saypa trukanqa runa munashqanta ruranätami munaykanki>>.

34Nirkurmi discïpulunkunatawan runakunata qayaykur Jesús nirqan: <<Pipis discïpulü kayta munarqa shonqun munashqanno ama kawasunsu, saypa trukanqa cruzninta apaqno noqata qatirämäsun.#8.34 Jesucristo kawashqan wisanqa pipis cruzninta aparqan wanusish kananpaqmi. Saymi cruzninta apaqno noqata qatirämäsun nirqa jusalikuypaq wanushno kar Jesucristuta qatiränanpaq kashqanta nikan.#Mat. 10.38; 16.24; Luc. 9.23; 14.27; Juan 12.25. 35Vïdanta salvayta munaqkunaqa vïdanta oqrayanqami. Vïdanta noqa rayku y ali wilakuynï rayku oqraqkunami isanqa vïdanta salvayanqa.#8.35 Sayno nirqa Jesucristo kaynömi nirqan: <<Kikin munashqanno luta kawakuqkunaqa manami salvakuyanqasu. Noqa munashqäno kawaqkunami isanqa salvakuyanqa>>.#Mat. 10.39; Luc. 17.33; Juan 12.25.

36<<Infiernuman qaykush kananpaq kaptinqa ¿imapaqtaq välin intëru munduta makincho sararashqanpis? 37Mayjina rïcu karpis manami rïcu kashqanwanqa salvacionta rantinqasu. 38Jusasapa runakunapa nawpancho pipis noqapita y wilakuynïpita penqakuptinqa Runapa Surinpis Tayta Diospa munayninwan y santu angilninkunawan shamurmi paypita penqakunqa>>.

Currently Selected:

Marcos 8: qvhB

Highlight

Copy

Compare