Josué 22
22
Rubén, Gad y pulan Manasés trïbu runakuna posisionninkunaman kutiyashqan
1Saypitanami Josuéqa Rubén trïbu, Gad trïbu y pulan Manasés trïbu runakunata qayaykur 2nirqan: <<Tayta Diospa sirviqnin Moisés niyäshushqaykita lapantanami cumpliyashkanki. Noqa nishqäkunatapis lapantami wiyakuyashkanki. 3Kananyaqmi Israel mayinsikunata mana kachaypa yanapäyashkanki. Tayta Diosninsipa mandamientunkunata lapantami cumpliyashkanki. 4Saymi kananqa Tayta Diosninsi promitimashqansinöla Israel mayinsikunata jamayman yaykasishna. Sayno kaykaptinqa Jordán mayuta simpar Tayta Diospa sirviqnin Moisés qoyäshushqayki posisionnikikunaman kutikuyay.#Núm. 32.20-32; Jos. 1.12-15. 5Isanqa yäsimashqansinöla lapan yachasimashqansi leykunata mana qonqaypa cumpliyanki. Tayta Diosninsita kuyayashpayki pay munashqannöla lapayki kawayanki. Saynöpis nishqankunata cumpliyashpayki lapan shonquykikunawan y lapan voluntänikikunawan payta sirviyanki>>.
6Sayno yäsirkurmi ali kawayänanpaq bendicionta Josué qorqan. Nirkurmi cada ünun wayinkunaman kutikuyänanpaq nirqan.
7Jordán mayuta Israel runakuna manaraq päsayashqan wisanmi Basán partita pulan Manasés trïbu runakunata Moisés aypurqan posisionninkuna kananpaq. Wakin kaq Manasés trïbu runakunatanami posisionninkunata Josué aypurqan Jordán mayuta simpaykur. Say simpachömi wakin Israel runakunapis posisionta chaskiyarqan. Basán partiman kutikuyänanpaq pulan Manasés trïbu runakunata bendisiskirmi Josué 8nirqan: <<Vinciyashqayki runakunapita imaykantapis qechuyashqaykiwan pasaypa rïcumi kutiykäyanki. Askatami uywatapis, qoritapis, qellaytapis, broncitapis, fiërrutapis y mödanakunatapis apaykäyanki. Sayno kaykaptinqa markaykikunaman chaykur marka mayikikunata rakipäyanki>>.
9Sayno niptinmi Rubén trïbu, Gad trïbu y pulan Manasés trïbu runakuna Israel mayinkunawan Silucho kaykäyashqanpita Galaadman kutikuyarqan. Moisésta Tayta Dios nishqannölami paykunapa posisionninkuna Galaadcho karqan.
Jordán mayu kuchuncho altarta rurayashqan
10Rubén trïbu, Gad trïbu y pulan Manasés trïbu runakuna kutiykäyashqanchömi Jordán mayu kuchunman chaykur Canaán partipita manaraq simpar jatunkaray altarta perqayarqan. 11Say altarta perqayashqanta wakin kaq Israel runakuna musyaykurmi 12yarpäyarqan Tayta Diospa contran sharkuyashqanta.#Lev. 17.8-9; Deut. 12.5-7. Saymi Siluman shuntakäyarqan altarta perqaq runakunawan pelyaq aywayänanpaq. 13Manaraq pelyaq aywarmi cüra Eleazarpa surin Fineesta Galaadman kachayarqan Rubén trïbu, Gad trïbu y pulan Manasés trïbu runakunawan parlayänanpaq. 14Fineeswanmi aywayarqan Israel runakunapa chunka mandaqninkunapis. Paykunaqa cada trïbupa mandaqninkunami kayarqan.
15Galaadman chaykurmi Rubén trïbu runakunata, Gad trïbu runakunata y pulan Manasés trïbu runakunata niyarqan: 16<<Israel mayinsikuna lapanpis musyayta munaykäyan imanir Tayta Diosta mana cäsukuyashqaykita y imanir paypa contran sharkur juk altarta rurayashqaykitami. 17¿Manaku yarpäyanki jusalikuqkunata Peorcho Tayta Dios ushakäsishqanta?#Núm. 25.1-9. Jusalikuyashqanpita manami kananyaqpis shumaqlaqa purificashqaraqsu kaykansi. 18¿Imanirtaq qamkunapis Tayta Diospa contran sharkur say altarta rurayashkanki? Sayno rurayashqaykipita Tayta Dios fiyupa rabyakur lapansitachir castigamäshun.
19<< <Posisionniki impüru kashqanta yarparqa noqakuna täyashqä kaqman shakayämuy täyänaykipaq. Saychömi Tayta Diospa Sagrädu Toldunpis kaykan. Shakamurqa noqakuna kaqchömi qamkunapis posisionnikikunata chaskiyanki. Imano karpis juk altarta ama rurayankimansu karqan. Juk altarta sharkasirqa Tayta Diosninsipa contran y noqakunapa conträkunami sharkuykäyanki. 20Yarpäyay Zerapa surin Acán rupasinanpaq kaqkunata pakar jusalikushqanta. Sayno rurashqanpitami Tayta Diosqa lapansiwan fiyupa rabyakurqan.#Jos. 7.1-26. Manami Acán japalansu jusalikushqanpita wanurqan, sinöqa wakin Israel mayinsikunapis wanuyarqanmi> >>.
21Sayno niyaptinmi Rubén trïbu, Gad trïbu y pulan Manasés trïbu runakunaqa Israel mayinkuna kachayashqan mandaqkunata niyarqan: 22<<¡Tayta Dioslami Dios kaykan! ¡Paypita masqa manami Dios kansu! Paypa contran mana sharkuyashqäta Tayta Dios musyanmi. Juk diosta adorayta yarpar say altarta rurash kayaptïqa mana kuyapaypa wanusiyämay. 23Tayta Diospa contran sharkur rupasina sacrificiuta, saki mikuy ofrendakunata o jawka kawakuy sacrificiuta rupasiyänäpaq say altarta rurash kayaptïqa kikin Tayta Dios juzgayämäsun.
24<<Waray warantin noqakunapita miraqkunata qamkunapita miraqkuna capazchir michar niyanman: <Qamkunaqa ¿imanirtaq yarpäyanki noqakuna adorayashqä Tayta Dios qamkunapapis Diosniki kashqanta? 25Noqakuna adorayashqä Tayta Diosmi Jordán mayuta churash rakirämänansipaq. Saymi qamkunaqa, Rubén trïbu y Gad trïbu runakuna kar, noqakuna adorayashqä Tayta Diosta adorayankimansu>. Sayno nir michäyaptinqa Tayta Diosta manami surïkuna adorayanqanasu.
26<<Sayno mana kananpaqmi say altartaqa rurayashkä. Manami rupasina sacrificiuta ni jawka kawakuy sacrificiuta saycho rupasiyänäpaqsu rurayashkä, 27sinöqa noqakunapita miraqkuna Tayta Diosta imaypis mana qonqaypa adorayänanpaqmi. Saynöpami noqakunapita miraqkuna rupasina sacrificiuta, jawka kawakuy sacrificiuta y wakin sacrificiukunatapis Sagrädu Tolduman Tayta Diospaq rupasiq aywayaptin qamkunapita miraqkuna michäyanqasu. 28Pipis sayno michaptinqa kaynömi niyanqa: <Rikayay unay ayllükuna Tayta Diospa altarnin niraqta rurayashqanta. Say altarta rurarpis manami rupasina sacrificiuta ni wakin sacrificiuta rupasiyänäpaqsu rurayarqan, sinöqa noqakunapis qamkunano Tayta Diosta sirviyashqäta musyayänaykipaqmi>. Pipis michaptin saynömi niyanqa. 29Noqakuna manami yarpäyäsu juk altarta rurarpis Tayta Diospa contran sharkuyta. Tayta Diosninsipa altarnin Sagrädu Toldun nawpancho kaykaptinqa ¿imapaqnataq rupasina sacrificiuta, saki mikuy ofrendata y wakin sacrificiuta rupasiyänäpaq juklächo altarta rurayäman?>>
30Sayno niyaptinmi cüra Finees y Israel runakunapa mandaqninkunapis tantiyakuyarqan paykuna alita rurayashqanta. 31Saymi cüra Eleazarpa surin Finees nirqan: <<Alita yarpar say altarta rurayashqaykita tantiyarmi kanan musyayä Tayta Dios noqansiwan kaykashqanta. Sayno kaptinqa Tayta Dios manami castigamäshunsu>>.
32Saypitanami Finees y paywan aywaq runakuna Galaadpita Canaánman kutikuyarqan. Wakin Israel runakuna kaykäyashqanman chaykurmi wilayarqan Rubén trïbu runakuna y Gad trïbu runakuna imata niyashqantapis. 33Sayno wilayaptinmi kushikuyashpan Tayta Diosta alabayarqan. Say junaqpita pasa mananami wilanakuyarqannasu Rubén trïbu runakunata y Gad trïbu runakunata ushakäsiq aywayänanpaq.
34Rubén trïbu y Gad trïbu runakunaqa say altarta jutisiyarqan Yarpäsikuq jutin kananpaqmi. Sayno jutisirmi niyarqan: <<Kay altarmi runakunata yarpäsinqa noqansipis Tayta Diosta adoraykashqansita>>.
Currently Selected:
Josué 22: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
