Josué 21

Leví trïbu runakuna chaskiyashqan markakuna maycho kayashqanpis

1 Crónicas 6.54-81

1Saypitanami Leví trïbupa mandaqninkuna Canaáncho kaykaq Silo markaman aywayarqan cüra Eleazarwan, Josuéwan y Israel runakunapa wakin autoridäninkunawan parlayänanpaq. 2Chaykurmi niyarqan: <<Tayta Diosmi Moisésta nirqan markakunata y jalqakunata rakipäyämänaykipaq. Saynöpami kanqa täyänäpaqpis y uywäkunata ashmakuyänäpaqpis>>.#Núm. 35.1-8.

3Sayno niyaptinmi Tayta Dios nishqannöla Israel runakuna rakipäyarqan markakunata y jalqakunatapis.

4Puntata suertita jitayarqan cüra Aarónpita miraqkuna markankunata chaskiyänanpaqmi. Aarónpita miraq Coat ayllu wakin runakunami chunka kimsa markakunata chaskiyarqan. Say markakunaqa kayarqan Judá trïbu, Simeón trïbu y Benjamín trïbu chaskiyashqan posisionkunachömi. 5Coat ayllu wakin kaq runakunanami chunka markakunata chaskiyarqan. Say markakunaqa kayarqan Efraín trïbu, Dan trïbu y pulan Manasés trïbu chaskiyashqan posisionkunachömi.

6Saypitanami suertita jitayarqan Gersón ayllu runakuna markankunata chaskiyänanpaq. Paykunami chunka kimsa markakunata chaskiyarqan. Say markakunaqa kayarqan Isacar trïbu, Aser trïbu, Neftalí trïbu y Basáncho kaq pulan Manasés trïbu chaskiyashqan posisionkunachömi.

7Merari ayllu runakunanami chunka ishkay markakunata chaskiyarqan. Say markakunaqa kayarqan Rubén trïbu, Gad trïbu y Zabulón trïbu chaskiyashqan posisionkunachömi. 8Saymi Moisésta Tayta Dios nishqannöla Israel runakunaqa suertita jitaypa Leví trïbu runakunata rakipäyarqan markakunata y cercancho kaykaq jalqakunata uywankunata misikuyänanpaq.

9-10Leví trïbu Coat ayllu runakunapaq puntata suerti yarqamuptinmi Judá trïbu runakunapa y Simeón trïbu runakunapa posisionninpita markakunata rakipäyarqan. 11Saymi paykunata rakipäyarqan Judá trïbu runakuna täyashqan jalqakunacho kaq Quiriat-arbata y nawpancho kaykaq jalqakunata uywankunata misikuyänanpaq. Quiriat-arbapa jukaq jutinqa Hebrónmi kaykan. Quiriat-arbachömi anaceo runakuna täyarqan. 12Quiriat-arbapita mas washalächo kaykaq jalqakunatawan caseriunkunatami isanqa Jefonipa surin Calebta posisionnin kananpaq Josué entregarqan.

13Cüra Aarónpita miraq runakuna chaskiyashqan Hebrón markaqa karqan runa mayinta mana yarpaypa wanusiq runakuna amparakuyänanpaqmi. Saynöpis chaskiyarqan Libnata, 14Jatirta, Estemoata, 15Holónta, Debirta, 16Aínta, Jutata y Bet-semesta. Saymi Judá trïbupita y Simeón trïbupita esqun markakunata chaskiyarqan. Cada markapami misikuyänanpaq jalqankuna karqan. 17Benjamín trïbupitami chaskiyarqan Gabaónta, Gebata, 18Anatotta y Almónta. Saymi Benjamín trïbupita chusku markakunata chaskiyarqan. Cada markapami misikuyänanpaq jalqankuna karqan. 19Saynöpami Aarónpita miraq cürakuna chunka kimsa markakunata jalqankunatawan chaskiyarqan.

20Coat ayllu wakin Leví trïbu runakunanami Efraín trïbu chaskishqan posisioncho markankunata chaskiyarqan. 21Paykunami chaskiyarqan Efraín jalqakunacho kaykaq Siquemta. Siquemqa runa mayinta mana yarpaypa wanusiq runakuna amparakuyänanpaq markami karqan. Saynöpis Gezerta, 22Kibsaimta y Bet-horóntami chaskiyarqan. Say chusku markakunapami misikuyänanpaq jalqankuna karqan. 23Dan trïbupitami chaskiyarqan Eltequita, Gibetónta, 24Ajalónta y Gat-rimónta. Say chusku markakunapami misikuyänanpaq jalqankuna karqan. 25Pulan Manasés trïbupitami Taanacta y Gat-rimónta chaskiyarqan. Say ishkay markakunapami misikuyänanpaq jalqankuna karqan. 26Saynöpami Coat ayllu wakin Leví trïbu runakuna chunka markakunata jalqankunatawan chaskiyarqan.

27Gersón ayllu Leví trïbu runakuna pulan Manasés trïbupitami Basáncho kaykaq Golánta y Beesterata chaskiyarqan. Golánqa runa mayinta mana yarpaypa wanusiq runakuna amparakuyänanpaq markami karqan. Say ishkay markakunapami misikuyänanpaq jalqankuna karqan. 28Isacar trïbupitami chaskiyarqan Cisónta, Daberatta, 29Jarmutta y En-ganimta. Say chusku markakunapami misikuyänanpaq jalqankuna karqan. 30Aser trïbupitami chaskiyarqan Misaelta, Abdónta, 31Helcatta y Rehobta. Say chusku markakunapami misikuyänanpaq jalqankuna karqan. 32Neftalí trïbupitami Galileacho kaykaq Cedesta, Hamot-dorta y Cartánta chaskiyarqan. Cedesqa runa mayinta mana yarpaypa wanusiq runakuna amparakuyänanpaq markami karqan. Say kimsa markakunapami misikuyänanpaq jalqankuna karqan. 33Saynöpami Gersón ayllu Leví trïbu runakuna chunka kimsa markakunata jalqankunatawan chaskiyarqan.

34Leví trïbu runakunapa ultimu ayllun Merari ayllumi karqan. Merari ayllu runakuna Zabulón trïbupitami markankunata chaskiyarqan Jocneamta, Cartata, 35Dimnata y Naalalta. Say chusku markakunapami misikuyänanpaq jalqankuna karqan. 36Rubén trïbupitami chaskiyarqan Beserta, Jahazata, 37Cademotta y Mefaatta. Say chusku markakunapami misikuyänanpaq jalqankuna karqan. 38Gad trïbupitami Galaadcho kaykaq Ramot markata chaskiyarqan. Ramotqa runa mayinta mana yarpaypa wanusiq runakuna amparakuyänanpaq markami karqan. Saynöpis chaskiyarqan Mahanaimta, 39Hesbónta y Jazerta. Say chusku markakunapami misikuyänanpaq jalqankuna karqan. 40Saynöpami Merari ayllu Leví trïbu runakuna chunka ishkay markakunata chaskiyarqan.

41Israel runakunapa posisionnincho Leví trïbu runakuna chaskiyashqan markakuna chusku chunka puwaqmi (48) kayarqan. 42Say markakunapa cercancho kaq jalqankunatapis chaskiyarqanmi.

Tayta Dios promitishqanta cumplishqan

43Saynömi Israel runakunata posisionninkunata Tayta Dios qoykurqan unay ayllunkunata promitishqannöla. Saymi Israel runakuna yaykur saychöna täyarqan. 44Tayta Dios yanapaptinmi contran runakuna imanöpapis ichipayta kamäpakuyarqansu. Saynöpami Abrahamta, Isaacta y Jacobta Tayta Dios unay promitishqanno Israel runakunaqa jawkalana täkuyarqan. 45Israel runakunata promitishqantaqa lapantami mana qonqaypa Tayta Dios cumplirqan.

Currently Selected:

Josué 21: qvhB

Highlight

Copy

Compare