Josué 23
23
Israel runakunata Josué yäsishqan
1 Tayta Dios yanapaptinmi contran runakunata ushakarkasir Israel runakuna aska watana jawkala kawayarqan. Josué awkinna kaykarmi 2Israel runakunata, mayor runakunata, mandaqkunata, juezkunata y soldädukunapa mandaqninkunata qayaykasir nirqan: <<Rikayämashqaykinöpis noqa awkinnami kaykä. 3Qamkuna rikayashkankimi kay nacioncho taq runakunata Tayta Diosninsi imano ushakäsishqantapis. Paymi noqansipa favorninsi pelyash. 4Trïbunpa trïbunpa chaskinansipaqmi say runakuna täyashqan partikunata suertita jitaypa aypushkä. Manami qechushqansi markakunalatasu aypushkä, sinöqa qechuypaq kaqkunatapis Jordán mayupita qalaykur hasta Mediterráneo Lamaryaqmi aypushkä. 5Say qechuypaq kaq markakunacho tänansipaqmi saycho taq runakunata Tayta Diosninsi qarqunqa. Saymi Tayta Diosninsi promitishqanno say markakunata chaskiyanki.
6<<Sayno kaykaptinqa Moisés qelqashqan librucho leykuna nishqantaqa juktapis mana qonqaypa lapanta cumpliyanki. 7Kay markakunacho taykaq jäpa runakunawanqa ama talukäyankisu. Saynöpis paykuna adorayashqan dioskunata ama adorayankisu ni sirviyankisu ni jutincho imatapis ama promitiyankisu ni jutinkunata imalapaqpis ama joqariyankisu. 8Tayta Diosninsita kanan wiyakuyashqaykinöla imaypis wiyakuyanki.
9<<Kaycho tänansipaqmi jatusaq markakunacho taq saysika runakunata Tayta Dios ushakäsish. Pay yanapämashqami kananyaq pipis ichipämashkansisu. 10Promitimashqansinöla favorninsi pelyaptinmi#Deut. 3.22. qamkunaqa juk runala karpis waranqa (1,000) runakunata qatikachar ushakäsiyankipaq.#Deut. 32.30. 11Sayno kaykaptinqa lapan shonquykikunawan Tayta Diosninsita kuyar pay munashqanno imaypis kawayay.
12<<Mana wanusiyashqayki runakunawan juntu täyashpayki surikikunata paykunapa surinkunawan täsiyaptikiqa 13Tayta Diosninsi say runakunata manami qarqunqasu. Saypa trukanqa say runakuna qamkunapaq kayanqa redno, trampano, lätiguno y nawikicho jatiraykaq kashanömi. Saynöpami maypis täkuypaq nacionninsiman churashushpaykipis Tayta Diosninsi lapaykikunata ushakäsiyäshunki.
14<<Noqaqa wanukunäpaqnami kaykä. Sayno kaptinpis musyayankimi lapan promitimashqansikunata Tayta Diosninsi cumplishqanta. Sayno cumplishqantaqa imaypis ama qonqäyaysu. 15Tayta Diosninsi yanapäyäshunaykipaq promitiyäshushqaykita cumplishqannölami payta mana wiyakuyaptikiqa ushakäsiyäshunaykipaq niyäshushqaykitapis cumplinqa. Saymi qoykuyäshushqayki ali nacioncho juklaylapis quëdayankisu. 16Noqansiwan Tayta Diosninsi pactu rurashqanta mana cumpliyashpayki juk dioskunata adorayaptikiqa Tayta Dios fiyupami rabyakunqa. Saymi manapis aykälata kay qoykuyäshushqayki ali nacioncho ushakäsiyäshunki>>.
Currently Selected:
Josué 23: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
