Josué 19

Simeón trïbu runakunapa lindërunkuna mayninpa kashqanpis

1Posisionta aypunanpaq suertita yapay jitaptinmi Simeón trïbupa ayllunkunapaq yarqamurqan. Saymi Simeón trïbu runakuna posisionninta chaskiyarqan Judá trïbu runakunapa posisionninpa chawpincho. 2Saymi paykunapa markankuna karqan Beerseba, Seba, Molada, 3Hazar-sual, Bala, Ezem, 4Eltolad, Betul, Horma, 5Siclag, Bet-marcabot, Hazar-susa, 6Bet-lebaot y Saruhén. Say markakuna chunka kimsami caseriunkunawan karqan.

7Wakin chaskiyashqan markakunami karqan Aín, Rimón, Eter y Asán. Say markakuna chuskumi caseriunkunawan karqan. 8Sur kaqläpa wakin kaq markakunapis Simeón trïbu runakunapaqmi karqan hasta Baalat-beeryaq. Baalat-beerpa jukaq jutinqa Neguev Ramatmi kaykan.

Saynömi karqan Simeón trïbu runakuna ayllunpa ayllunpa posisionta chaskiyashqan markakunapis caseriunkunapis.#1Crón. 4.28-33. 9Simeón trïbu runakunapa posisionninqa Judá trïbu runakunapa posisionninpa chawpinchömi karqan. Sayno karqan Judá trïbu runakunapa posisionnin aläpa jatun kaptinmi.

Zabulón trïbu runakunapa lindërunkuna mayninpa kashqanpis

10Posisionta aypunanpaq suertita yapay jitaptinmi Zabulón trïbupa ayllunkunapaq yarqamurqan. Paykunapa posisionninqa chärarqan Saridyaqmi. 11Saridpita inti jeqanan kaqläpa aywarmi lindërunqa Maralapa päsararqan hasta Dabesetyaq. Saypitami Jocneam simpancho kaykaq raqraman chärarqan. 12Saridpita inti jeqamunan kaqläpanami lindërunqa Quislot-taborpa päsar Daberatyaq chärarqan. Saypitanami wisararqan Jafíaman. 13Saypitami päsararqan Gat-heferpa, Ita-cazínpa y Rimónpa. Rimónpitanami tumararqan Neapa. 14Norti kaqläpanami lindërun tumar Hanatónpa päsararqan. Saypitami chärarqan Jefte-el pampaman. 15Say posisioncho kaq markakuna karqan Catat, Naalal, Simrón, Idala, Belén y wakin markakunapis. Paykunapa markankuna chunka ishkaymi karqan. Say markakunapa caseriunkunapis karqanmi. 16Saynömi karqan Zabulón trïbu runakuna ayllunpa ayllunpa posisionninta chaskiyashqan markakuna caseriuntin.

Isacar trïbu runakunapa lindërunkuna mayninpa kashqanpis

17Posisionta aypunanpaq suertita yapay jitaptinmi Isacar trïbupa ayllunkunapaq yarqamurqan. 18Paykunapa markankuna karqan Jezreel, Quesulot, Sunem, 19Hafaraim, Sihón, Anaharat, 20Rabit, Quisión, Abez, 21Remet, En-ganim, En-hada y Bet-pases. 22Lindërun päsaraykarqan Taborpa, Sahazimapa y Bet-semespa hasta Jordán mayuman chashqanyaq. Paykunapa markankuna chunka soqtami karqan. Say markakunapa caseriunkunapis karqanmi. 23Saynömi karqan Isacar trïbu runakuna ayllunpa ayllunpa posisionta chaskiyashqan markakunapis caseriunkunapis.

Aser trïbu runakunapa lindërunkuna mayninpa kashqanpis

24Posisionta aypunanpaq suertita yapay jitaptinmi Aser trïbupa ayllunkunapaq yarqamurqan. 25Paykunapa markankunaqa karqan Helcat, Halí, Betén, Acsaf, 26Alamelec, Amad y Misealmi. Inti jeqanan kaqläpami lindërun päsararqan Carmelo jirkapa y Sihor-libnatpa. 27Saypita inti jeqamunan kaqläpa tumararmi Bet-dagónpa päsar Jefte-el pampayaq chärarqan. Jefte-el pampachöqa Zabulón trïbu runakunapa lindërunwanmi tinkurarqan. Saypita norti kaqläpa tumararmi päsararqan Bet-emecpa y Neielpa hasta Cabulman chashqanyaq. 28Saypita päsararqan Abdónpa, Rehobpa, Hamónpa y Canápa hasta jatunkaray Sidón markaman chashqanyaq. 29Saypita tumararmi lindërun Ramápa päsararqan hasta corralash Tiro markayaq. Saypitaqa Hosapa päsar Mediterráneo Lamarmanmi chärarqan. Aser trïbu runakunapa markankuna karqan Mahaleb, Aczib, 30Uma, Afec Rehob. Paykunapa markankunaqa ishkay chunka ishkaymi (22) karqan. Say markakunapa caseriunkunapis karqanmi. 31Saynömi karqan Aser trïbu runakuna ayllunpa ayllunpa posisionninta chaskiyashqan markakunapis caseriunkunapis.

Neftalí trïbu runakunapa lindërunkuna mayninpa kashqanpis

32Posisionta aypunanpaq suertita yapay jitaptinmi Neftalí trïbupa ayllunkunapaq yarqamurqan. 33Paykuna chaskiyashqan posisionpa lindërunmi qalaykurqan Helefpita. Saypita päsararqan Alón-saananimpa, Adami-necebpa, Jabneelpa y Lacumpa hasta Jordán mayuyaq. 34Inti jeqanan kaqläpami lindërun Aznot-taborpa päsar chärarqan Hucocyaq. Sur kaqlächömi tinkurarqan Zabulón trïbu runakunapa lindërunwan. Inti jeqananläpanami lindërun tinkurarqan Aser trïbu runakunapa lindërunwan. Inti jeqamunan kaqläpanami lindërun chärarqan Jordán mayuyaq. 35Paykunapa corralash markankuna karqan Sidim, Zer, Hamat, Racat, Cineret, 36Adama, Ramá, Hazor, 37Cedes, Edrei, En-hazor, 38Irón, Migdal-el, Horem, Bet-anat y Bet-semes. Paykunapa markankunaqa chunka esqunmi karqan. Say markakunapa caseriunkunapis karqanmi. 39Saynömi karqan Neftalí trïbu runakuna ayllunpa ayllunpa posisionninta chaskiyashqan markakuna caseriuntin.

Dan trïbu runakunapa lindërunkuna mayninpa kashqanpis

40Posisionta aypunanpaq suertita yapay jitaptinmi Dan trïbupa ayllunkunapaq yarqamurqan. 41Paykunapa markankuna karqan Zora, Estaol, Ir-semes, 42Saalabín, Ajalón, Jetla, 43Elón, Timnat, Ecrón, 44Elteque, Gibetón, Baalat, 45Jehúd, Bene-berac, Gat-rimón, 46Mejarcón y Racón. Saynöpis paykunapaqmi karqan Jope marka cercancho kaykaq partikuna. 47Sayno kaptinpis posisionninta Dan trïbu runakuna manami qechuyta kamäpakuyarqansu. Saymi Lesemman wisäyarqan saychöna täyänanpaq. Lesem runakunawan pelyar wanusirmi saychöna täkuyarqan.#Jue. 18.1-29. Say markapa jutintami trukasiyarqan Dan jutin kananpaq. Saymi unay ayllunpa Dan jutilan markapa jutinpis karqan. 48Saynömi karqan Dan trïbu runakuna ayllunpa ayllunpa posisionninta chaskiyashqan markakunapis caseriunkunapis.

Josuépis posisionninta chaskishqan

49Posisionninkuna aypuyta ushaskiptinmi Nunpa surin Josuétapis posisionninta Israel runakuna rikasiyarqan wakin kaq trïbukuna chaskiyashqan posision chawpincho. 50Tayta Dios nishqannömi Josué manakuptin markata aypuyarqan. Saymi chaskirqan Efraín jalqakunacho kaq Timnat-sera markata. Josuéqa say markata alsar wayikunatapis yapay sharkaykasirmi saycho tarqan.

51Israel runakunata posisionta aypuyänanpaqmi suertita jitayarqan cüra Eleazar, Josué y Israel runakunapa mandaqninkuna. Tinkuna Toldu punkuchömi Tayta Diospa nawpancho sayno suertita jitayarqan. Tinkuna Tolduqa Siluchömi karqan. Saynöpami posisionninkunata lapan trïbukunata aypuyta ushayarqan.

Currently Selected:

Josué 19: qvhB

Highlight

Copy

Compare