Josué 20

Amparakuyänanpaq markakunata akrayashqan

Números 35.6-34; Deuteronomio 4.41-43; 19.1-13

1Saypitanami Josuéta Tayta Dios nirqan: 2<<Israel runakunata ninki Moisésta nishqänöla amparakuyänan markakunata akrayänanpaq. 3Say markakunamanmi runa mayinta mana yarpaypa wanusiq runa qeshpir amparakunqa. Saymanmi qeshpinqa wanuq runapa ayllunkuna mana wanusiyänanpaq.

4<<Amparakuyta munaq kaqqa mayqan amparakuyänan markamanpis chaykur marka yaykuna punkucho shuntakaq mayor runakunawan parlanqa. Saychömi paykunata wilanqa imanöpa wanusishqantapis. Saymi mayor runakunaqa markaman yaykasir maynincho tänanpaqpis rikasiyanqa. 5Contran mana kaykar runa mayinta wanusiptinqa wanuqpa legïtimu ayllunkuna qepanta chaptin mayor runakuna manami kachapäyanqasu. 6Saypa trukanqa saycho taq runakunami juzgar niyanqa yarpaypa o mana yarpaypa wanusishqantapis. Mana yarpaypa wanusishqanta niyaptinqa say markalachömi täkunqa mandaq cüra wanushqanyaq. Saypitaraqmi wayinman kutikunqa>>.

7 Tayta Dios Sayno niptinmi amparakuyänanpaq kaq markakunata Israel runakuna akrayarqan Cedesta, Siquemta y Quiriat-arbata. Cedesqa Neftalí trïbu runakuna täyashqan jalqakunacho kaykaq Galileachömi kaykan. Siquemqa Efraín jalqakunachömi kaykan. Quiriat-arbaqa Judá trïbu runakuna täyashqan jalqakunachömi kaykan. Quiriat-arbapa jukaq jutinmi kaykan Hebrón. 8Jericóta päsar Jordán mayu wak simpachömi akrayarqan Beserta, Ramotta y Golánta. Beserqa Rubén trïbu runakuna täyashqan sunyaq pampachömi kaykan. Ramotqa Galaadchömi kaykan. Golánqa Basánchömi kaykan. Basánqa Manasés trïbu runakuna täyashqanchömi kaykan.

9Say markakuna kayarqan Israel runakuna y Israel runakunacho taq jäpa runakunapis mana yarpaypa runa mayinta wanusiyashqanpita amparakuyänanpaqmi. Sayman amparakuyaptinmi wanuqpa ayllunkuna wanusiyanqanasu. Saycho taq runakunanami shuntakaykur say runata juzgayanqa yarpaypa o mana yarpaypa wanusishqantapis musyayänanpaq.

Currently Selected:

Josué 20: qvhB

Highlight

Copy

Compare