Josué 18

Wakin trïbu runakunapis posisionninkunata chaskiyänanpaq Josué nishqan

1 Canaánta munayninman churarkurnami Tinkuna Tolduta ichisiyänanpaq lapan Israel runakuna Silucho shuntakäyarqan. 2Isanqa qanchis trïbukuna manaraqmi posisionninkunata chaskiyarqanraqsu.

3Saymi Israel runakunata Josué nirqan: <<Unay ayllunsikuna yärakuyashqan Tayta Dios maynami Canaánman chäsimashkansi. ¡Imayyaqraq shuyaräyanki posisionta chaskiyänaykipaq! 4Cada trïbupita kimsa runata akrayay. Paykunatami kachashaq chaskiyänaykipaq kaq partikunata rikapakayämunanpaq. Rikapakamurmi markakuna may maycho kashqantapis qelqayämunqa. Kutiykamurnami qelqayashqanta entregayämanqa lindërunkuna maypa maypa kashqantapis musyar cada trïbuta posisionkunata aypunäpaq.

5<<Say rikapakuq aywaq runakunami qanchis partiman nacionta rakiyanqa. Isanqa ama rakiyäsunsu sur kaqlächo Judá trïbu chaskishqan posisionta ni norti kaqlächo Josépita miraq trïbukuna chaskiyashqan posisionta. 6Qanchis partiman rakiykur markakuna may maycho kayashqantapis qelqayämusun kutiykamur entregayämänanpaq. Noqanami Tayta Diosninsipa nawpancho suertita jitashaq say partikunata aypunäpaq.

7<<Wakin trïbu runakuna posisionninta chaskiyaptinpis Leví trïbu runakunaqa manami chaskiyanqasu. Saypa trukanqa cüra kayaptin paykunapa herencian kanqa Tayta Diosta sirviyashqanmi. Saynöpis Gad, Rubén y pulan Manasés trïbu runakunaqa maynami posisionta chaskiyash. Say posisiontaqa Tayta Diospa sirviqnin Moisésmi Jordán mayu wak simpancho kaykashqansi wisan aypurqan>>.

8Nacionta rikapakuqkuna yarquyänanpaq kaykaptinmi Josué nirqan: <<Qamkuna manaraq aypush kaq partikunapa tumamur markakuna may maycho kayashqantapis qelqayämunki. Ushaskir kay Siluman kutiyämushpayki qelqayashqaykita entregayämanki. Noqanami Tayta Diospa nawpancho suertita jitashaq say partikunata aypunäpaq>>.

9Saymi say runakuna aywar manaraq aypush kaq partikunapa intëruta rikapakur tumayämurqan. Qanchis partiman rakiykurmi qelqayarqan markakuna may maycho kashqantapis. Nirkurmi kutiyarqan Josué taykashqan Siluman. 10Josuénami jinan Silulacho Tayta Diospa nawpancho suertita jitarqan cada partita mayqan trïbutapis aypunanpaq.

Benjamín trïbu runakunapa lindërunkuna mayninpa kashqanpis

11Posisionta aypunanpaq suertita jitaptinmi Benjamín trïbupa ayllunkunapaq yarqamurqan. Saymi Benjamín trïbu runakuna posisionta chaskiyarqan Judá trïbu runakunapa posisionnin kashqanpita hasta Josépita miraq trïbu runakunapa posisionnin kashqanyaq.

12Benjamín trïbu runakunapa posisionnin norti kaqläpa lindërunqa Jordán mayupitami qalaykurqan. Saypita Jericó norti kaqläpa päsarmi inti jeqanan kaqläpa wisararqan. Jalqakunapa päsarkurmi Bet-avén niyashqan sunyaq jirkapana päsararqan. 13Saypita sur kaqläpa tumashpan Luzpa päsarmi Atarot-adarpa urararqan. Luzpa jukaq jutinqa Bet-elmi kaykan. Atarot-adarqa juk lömachömi kaykan. Say lömaqa ura kaq Bet-horón sur kaq simpanchömi kaykan. 14Saypita say löma kinralanpami lindëru päsararqan hasta inti jeqanan kaqlä kuchunyaq. Saypitami sur kaqläpa yapay tumarashpan Quiriat-baalyaq chärarqan. Quiriat-baalqa Judá trïbu runakunapa markanmi karqan. Say markapa jukaq jutinmi kaykan Quiriat-jearim. Inti jeqanan kaqlä lindërunmi päsararqan say markakunapa, jalqakunapa y raqrakunapa.

15Sur kaqläpa aywaraq lindërunqa qalaykurqan Quiriat-jearimpa kuchunpitami. Saypitami inti jeqamunan kaqläpa päsar chärarqan Neftoa pukyuyaq. 16Saypitami urararqan Refaim pampa norti kaq kuchunyaq. Sayqa jirka chakinchömi kaykan. Saypitaqa Ben-hinom raqrami qalaykun. Say lindëru Ben-hinom pampalanpa päsashpan jebuseo runakuna täyashqan jirka sur kaqläpami aywararqan. Saypitami aywararqan En-rogel pukyuyaq. 17Saypitami norti kaqläpa tumashpan En-semespa päsar Gelilotyaq chärarqan. Gelilotqa Adumín löma simpanchömi kaykan. Saypitami urararqan Bohán Ben-Rubén qaqapa. 18Saypitami Arabá pampa kuchuncho kaykaq jirkakuna norti kaqläpa päsashpan Arabá pampapana urararqan. 19Bet-hogla norti kaqläpa päsarnami Kachi Lamar norti kaq kuchunpa chärarqan. Saychömi Jordán mayu ushaykan. Say markakunapa, jalqakunapa y raqrakunapami päsararqan surpa kaq lindërun.

20Inti jeqamunan kaqlä lindërunqa Jordán mayu kuchulanpami aywararqan. Say markakunapa, jalqakunapa y raqrakunapami Benjamín trïbu ayllukunapa lindërun päsararqan.

21Benjamín trïbu runakuna ayllunpa ayllunpa chaskiyashqan markakuna kayarqan Jericó, Bet-hogla, Emec-casis, 22Bet-arabá, Zemaraim, Bet-el, 23Avim, Pará, Ofra, 24Quefar-haamoni, Ofni y Geba. Say markakuna chunka ishkaymi kayarqan. Say markakunapa caseriunkunapis karqanmi. 25Wakin chaskiyashqan markakuna kayarqan Gabaón, Ramá, Beerot, 26Mizpa, Cafira, Mozah, 27Requem, Irpeel, Tarala, 28Zela, Elef, Jebús (Jebúspa jukaq jutin kaykan Jerusalén), Gabaa y Quiriat. Say markakuna chunka chuskumi caseriunkunawan kayarqan. Saynömi Benjamín trïbu runakuna ayllunpa ayllunpa chaskiyashqan posisionninpa lindërun karqan.

Currently Selected:

Josué 18: qvhB

Highlight

Copy

Compare