Joel 2
2
Tayta Dios juzganan junaq mansariypaq kashqan
1 Tayta Dios juzganan junaq chaykämunnami.
Judácho taqkuna, lapayki mansariyashpayki suksukyäyay.
Pïmaypis musyananpaq sagrädu Sión lömacho cornëtata tukayay.
2Say junaq pasapis sakakäkunqami.
Yanawyayparaqmi pukutaypis sapakurkunqa.
Pasa waraptin jirkakunapa inti mashtamushqannömi saysika soldädukuna shayämunqa.
Saynöqa manami imaypis kashsu ni imaypis kanqasu.
3Imatapis tarishqan kaqta nina ushaqnömi lapantapis ushayanqa.
Atacayänanpaq manaraq chämuptin Edén huertanömi lapanpis kuyaylapaq kanqa.
Päsaskiyaptinmi isanqa sunyaykar rikakunqa.
Manami imapis say soldädukunapita qeshpinqasu.
4Guërra cawallukunanömi mansariypaq kayanqa.
Cawalluta loqakurkur#2.4 Wakin runakunaqa muntakurkur niyan. cörriq soldädukunanömi cörriyanqa.
5Guërra carrëtakuna elaqpita puntapa tumamur taqrarayla aywashqannömi paykunapis patatayla aywapäkushqan mayakanqa.
Usya tiempucho muntita nina bunyaypa bunyar ushaqnömi qaparäyanqa.
Guërraman aywaq saysika soldädukuna kamarikushla aywayashqannömi aywayanqa.#Apoc. 9.7-9.
6Sayta rikaykurmi runakuna pasaypa mansakar cärankunapis almatakash rikakuyanqa.
7Atacaqkunaqa ali chölu kayashpanmi mana mansariypa cörriyashpan marka murälla jananman wisäyanqa.
Lapanmi mana yaqaykachaypa wachuchuyla aywayanqa.
8Mana tanqanakuypami lapanpis aywayashlanpa aywayanqa.
Paykunata flëchayaptinpis mana qeshpiypami yaykuyanqa.
9Markakunamanpis mana mansariypami yaykuyanqa.
Tapia jananpapis cörriyanqami.
Wayikunamanpis achpaypami wisäyanqa.
Ventänapapis suwanömi yaykuyanqa.
10Kay pasapis pasaypami mansakanqa.
Jana pasapis suksukyanqami.
Intipis y killapis sakakäkunqami.
Qoyllarkunapis manami asikyäyanqanasu.#Amós 8.9; Apoc. 8.12.
11Say atacaqkunapa puntantami Tayta Dios aywanqa.
Atacayänanpaq mandaptin maqakuynöraqmi wiyakanqa.
Nishqanta ruraqkunaqa yupaytapis mana atipaypaqmi kayanqa.
Paykunaqa tishyayparaqmi aywayanqa.
Tayta Dios juzganan junaq pasaypa mansariypaqmi kanqa.
Sayta manami pipis awantanqasu.#Apoc. 6.17.
Wanakuyänanpaq nishqan
12Saymi Tayta Dios nin:
<<Lapan shonquykikunawan perdonta manakayämashpayki makïman kutiyämuy.
Jusayuq kayashqaykipita lakikur ayunayashpayki waqayay>>.#Deut. 4.29; Jer. 29.13.
13Jusalikuyashqaykipita pësakur mödanaykikunata rachiyänaykipa trukanqa jusaykikunata kachariyay.
Lapan shonquykikunawan kuyashuqniki Tayta Diosninsi munashqanno kawayay.
Payqa kuyapäkuq y perdonakuqmi kaykan.
Imapitapis juklaqa manami rabyakunsu.#Éxo. 34.6; Neh. 9.17; Sal. 86.15.
Perdonayäshushpaykiqa manami castigayäshunkinasu.
14Capazchir castigayäshunaykipa trukan bendicionta qoyäshunkiman.
Saynöpami Tayta Diosninsita agradëcikur saki mikuy ofrendatapis vïnutapis apayanki.
15 Sión lömacho cornëtata tukayay.
Lapayki wilanakuyay shuntakaykur ayunayänaykipaq.
16Purificakuyänaykipaq lapayki shuntakäyay.
Awkinpis wamrapis lapayki aywayay.
Chuchuykaq wamrakunatapis apayay.
Sayraq majasakashkunapis punukuyänaykipita yarqur ayunaq aywayay.
17 Tayta Diosta sirviq cürakuna, altar kaqcho waqayay.
Tayta Diosta manakur niyay:
<<Kuyashqayki runakunata perdonaykulay, Taytay.
Ama kachapaykulaysu jäpa nación runakuna munayninman churayämashpan alquysakayämänanta.
Ama kachapaykulaysu qamman mana yärakamuq runakuna asipäyämar <¿maychötaq Diosnin kaykan?> niyämänanta>>.#Sal. 79.10; Miq. 7.10.
18Sayno manakushqaqa kuyapäkuq kashpanmi Tayta Dios perdonamäshun.
19Saymi nimäshun:
<<Pacha junta kayänaykipaqmi trïgutapis, vïnutapis y aceititapis kamaripäyäshayki.
Mana yärakamaqkuna alquysakuyäshunaykita manami kachapäshaqnasu.
20Norti kaqläpita shamuqkunataqa sunyaq jirkamanmi qarqushaq.
Puntanta aywaqkunatami Kachi Lamarman qarpushaq.
Qepanta aywaqkunatanami Mediterráneo Lamarman qarpushaq.
Saychömi lapanpis ismuyashpan pasaypa asyäyanqa.
Sayno ruraptï espantaypaqmi kanqa.
21<<Israel runakuna, ama mansariyaysu.
Favorniki sharkunäpaq kaykaptinqa kushikuyay.
22Jirka uywakuna, ama mansariyaysu.
Qewapis loqluyparaqmi winamunqa.
Früta jachakunapis wayunqami.
Hïguspis üvapis tampiyparaqmi wayunqa.
23Sióncho taqkuna, noqaman yärakayämashpayki kushikuyay.
Unaynömi punta kaq tamyata y qepa kaq tamyatapis tiempulancho tamyasimushaq.
24Saymi trïgutapis askata shuntayanki.
Vïnupis aceitipis saysikami kanqa.
25<<Kachamushqä chukluskuna wata wata ushashqanpitawanmi aruyashqaykiman bendicionnïta churamushaq.
26Saymi mikuynikikunapis pusuy pusuy kanqa.
Qamkunata yanapashpämi kushikuypaq kaqkunata rurashaq.
Saymi lapan shonquykikunawan kushish alabayämanki.
Manami imaypis yapay penqayman churayäshaykinasu.
27Saychömi tantiyayanki qamkunawan kaykashqäta.
Saynöpis tantiyayanki Tayta Diosniki kashqätami.
Noqapita mas manami juk Dios kansu.
Kanan kaykäyashqaykinöqa manami penqaycho yapay kayankinasu>>.#Isa. 42.8; 45.5-6, 18; Eze. 36.11.
Espíritu Santuta Tayta Dios kachamunanpaq nishqan
28 28 (3.1) <<Saypitanami Espïritüta lapan runakunaman kachamushaq.#Hech. 2.17-21.
Saymi olqu surikikuna y warmi surikikunapis wilakuynïta wilakuyanqa.
Awkinkunatapis sueñuyninkunachömi musyasishaq.
Maqtakunapis revelaciontami rikayanqa.
29 29 (3.2) Say junaqkunami olqumanpis warmimanpis sirvimaqnïkunaman Espïritüta kachamushaq.
30 30 (3.3) Jana pasachöpis y kay pasachöpis rikakäsimushaq imaypis mana rikayashqaykikunatami.
Yawartapis, ninatapis y ichiraykaq qoshtaytapis rikayankimi.
31 31 (3.4) Intipis sakakäkunqami.
Killapis yawarmanmi tikranqa.#Mat. 24.29; Mar. 13.24-25; Luc. 21.25; Apoc. 6.12-13.
Saykuna kanqa juzganä junaq manaraq chämuptinmi.
Say junaqqa seqaypa mansariypaqmi kanqa.
32 32 (3.5) Sayno kaptinpis noqata manakamaq kaqtaqa pïmaytapis salvashaqmi.#Rom. 10.13.
Promitishqänölami Sión lömacho kaykaq Jerusaléncho runakunata salvashaq.
Qayashqä kaqkunataqa lapantami salvashaq>>.
Currently Selected:
Joel 2: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
