Joel 1
1
Chakracho mikuykunata chukluskuna ushayashqan
1 Tayta Dios revelashqantami Petuelpa surin Joel wilakur nirqan:
2Mayor runakuna, kanan nishqäta shumaq wiyayämay.
Judá nacioncho taq runakunapis, kanan wilakushqäta wiyayämay.
Kay castïgutano ¿imaylapis rikayashkankiku?
Taytaykikuna kawayashqan wisan kayno mansariypaq castïgu ¿imaylaqa kashsuraq?
3Kay castïgu imano kashqantapis surikikunata wilapäyanki.
Surikikunapis surinkunata wilapäyanqa.
Saynöla wilkaykikunapis surinkunata wilapäyanqa.
4Jatusaq chukluskuna katuyashqantapis akapa chukluskunami ushakurkuyash.
Akapa chukluskunapita qeshpiqlantapis malumyakunami mikukurkuyash.
Saypita pusuqlantapis shiwrikunami ushakurkuyash.#Deut. 28.38; Joel 2.2-11; Amós 4.9; 7.1.
5Upyalaman churakash runakuna, tantiyakuyay.
Shinkashqaykipita kachakarkur waqayay.
Chukluskuna üvata ushaptin upyayänaykipaq vïnupis manami kannasu.
6Yupaytapis mana atipaypaq soldädukunanömi say chukluskuna markansiman juntaykayämush.
Kirunkunapis waqunkunapis leonpanöraqmi kaykan.#Apoc. 9.8.
7Lapan üvakunatapis chakranpami ushayash.
Hïgustapis pasaypami ushayash.
Yürantapis rämankunatapis tululantami kachaykuyash.
8Majasakänanpaq promitishqan maqta wanuykuptin doncëlla jipash lütu mödanata jatikurkur waqashqanno iksuypa iksur waqayay.
9Cürakunapis waqakuykäyan saki mikuy ofrendata ni vïnutapis Tayta Diospa templunman pipis manana apaptinmi.
10Trïgupis manami kannasu.
Üvakunapis sakishqami kaykäyan.
Olïvu jachakunapis ushakashqami kaykäyan.
Lapan chakrakunapis pasaypa qaralanami kaykäyan.
11Chakracho aruqkuna, üvata cosechaqkuna, makilaykikunata soqpakurkur waqayay.
Trïgutapis cebädatapis walälami muruyashkanki.
12Üvapa yürankunapis sakikäkuyashnami.
Hïguskunapis ushakäyashnami.
Granädakunapis, palmërakunapis, manzänapa yürankunapis y lapan plantakunapis sakishnami kaykäyan.
Saymi runakunapis pasaypa mansakash kaykäyan.#Ose. 4.3; Amós 4.6-9.
13Tayta Diosta altarcho sirviq cürakuna, qachqa mödanata jatikurkur waqayay.
Saki mikuypis ni vïnupis Tayta Diosninsipa wayinman apayämunanpaq mananami kannasu.
14Mayor runakunata y común runakunata Tayta Diosninsipa wayinman shuntakäyänanpaq qayasiyay.
Tayta Diosta manakur lapayki ayunayay.
15¡Tayta Dios juzganan junaq chaykämunnami!
Say junaq chämuptin ¡imanöraq runa nakaykuyälanqa!
Say junaqmi lapanpaq munayyuq Tayta Dios saysika runakunata ushakäsinqa.#Isa. 13.6; Eze. 30.2-3; Sof. 1.14-18.
16Mikuyninsi ushakaptin pasaypa muchuychönami kaykansi.
Saymi Tayta Diosninsipa templunman aywarpis kushikunsinasu.
17Murushqansi trïgupis manami winamushnasu.
Mikuy pirwakuna wayikunachöpis wayralami tumaykan.
18Qewata maychöpis mana tarirmi wäkakunapis pasaypa kuyapaypaq waqaykäyan.
Saynölami uyshakunapis cabrakunapis wanur ushakaykäyan.
19¡Tayta Dios, yanapaykayälämay!
Jirkacho qewatapis y munti jachakunatapis ninami rupar ushash.
20Raqrapa aywaq yakupis sakikäkushqami.
Sunyaq jirkacho qewakunatapis ninami ushash.
Saymi jirka uywakunapis waqapaykäyäshunki.#Amós 7.4-5.
Currently Selected:
Joel 1: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
