Jueces 6
6
Gedeónta Tayta Dios qayashqan
1Israel runakuna yapaymi Tayta Diosta mana cäsukuyashpan juk dioskunata adorar qalaykuyarqan. Saymi paykunata madianita runakunapa munayninman Tayta Dios kachaykurqan qanchis wata nakasiyänanpaq. 2Madianita runakuna fiyupa nakasiyaptinmi Israel runakuna mansariyashpan pakakuyänankunata rurayarqan qaqakunacho, machaykunacho y pipis mana yaykunankunacho.
3Cada watami cosëcha wisan madianita runakuna, amalecita runakuna y inti jeqamunan kaqlächo taq wakin runakunapis Israel runakunata atacayaq. 4Saymi Israel runakunapa chakrankunacho campamentunkuna rurakuykur lapan mikuyninkunata Gaza partiyaq ushayaq. Israel runakuna mikuyänanpaq ima mikuytapis manami kachapäyarqansu. Saynölami uyshankunatapis cabrankunatapis wäkankunatapis ashnunkunatapis apakuyaq. 5Say runakunaqa toldunkunata apakurkurmi uywankunawan maypapis aywayaq. Yupaytapis mana atipaypaq camëllunkunawan aywarmi chakrakunacho lapan wayuq mikuykunata saysika chukluskunanöraq ushayaq. 6Madianita runakuna sayno rurayaptinmi Israel runakuna pasaypa muchuyman chäyarqan. Sayno nakarmi Tayta Diosta manakuyarqan yanapänanpaq.
7Madianita runakunapita salvananpaq manakuyaptinmi 8Tayta Dios kacharqan wilakuqnin profëtata. Say profëtami nirqan: <<Israel runakunata kuyaq Tayta Diosmi nin: <Egiptucho ashmay kar nakaykäyaptikimi noqa jorqamushkä. 9Wakin nación runakuna nakasiyäshuptikipis qamkunata salvashkämi. Saynölami contrayki runakunata ushakaskasir paykuna täyashqan partitapis qamkunatana qoykushkä. 10Qamkunatami nirqä: <<Noqa Tayta Diosnikimi kä. Amorreo runakunapa markankunacho täyashpayki paykuna adorayashqan dioskunata ama adorayankisu>>. Sayno nikaptïpis manami wiyakayämashkankisu> >>.
11Saypita juk kutimi Tayta Diospa angilnin Ofracho kaykaq encina jacha chakincho jamaskamurqan. Say jacha karqan Abiezer ayllupita miraq Joáspa chakranchömi. Saychömi madianita runakuna mana rikayänanpaq Joáspa surin Gedeónqa#Heb. 11.32. üvata jarukunan kaqcho trïguta pakaylapa püraykarqan#6.11 Wakin runakunaqa wayraykarqan niyanmi.. 12Saycho püraykaptinmi Tayta Diospa angilnin yuripaykur nirqan: <<Kalpayuq y geniu runa, Tayta Diosmi qamta yanapaykäshunki>>.
13Sayno niptinmi Gedeón nirqan: <<Ay, taytay. Tayta Dios yanapaykämaptinqa ¿imanirtaq kayno nakaykäyä? Unay ayllükuna niyarqan Egiptupita Israel runakunata jorqamushqantami. Kananqa ¿imanirtaq sayno yanapäyämansu? Yanapäyämänanpa trukanqa Tayta Dios qonqaykayämashpanmi madianita runakunapa munayninman kachaykayämash>>.
14Sayno niptinmi Gedeónta rikärir Tayta Dios nirqan: <<Qamqa madianita runakunata ichipankimi. Paykunapa makincho kayashqanpita Israel runakunata jorqunaykipaq kikïmi qamta kachaykä>>.
15Sayno niptinmi Gedeón nirqan: <<Ay, taytay. ¿Israel runakunata salvämansuraq? Manasés trïbu runakunacho noqapa ayllüqa muchuqmi kaykan. Saynöpis noqataqa alqu wiruqlapaqpis manami mentayämansu>>.
16Saymi Tayta Dios nirqan: <<Sayno kaptinpis madianita runakunata juk runatanöla lapanta ushakäsinaykipaq kikïmi yanapäshayki>>.
17 Tayta Dios sayno niptinmi Gedeón nirqan: <<Rasunpaypa yanapämänaykipaq kashqanta musyanäpaq ima milagrulatapis ruraykulay. 18Imano kaptinpis yanukamushqäyaq kaycho jamapaykay, taytay>>.
Saymi Tayta Dios nirqan: <<Sayno kaptinqa kaylacho shuyäshayki>>.
19Sayno niptinmi Gedeónqa malta cabrata pishtaskir yanukurqan. Saynöpis ishkay chunka (20) kïlu jarinapita levadüraynaq tantata masararqan. Nirkurmi aysata canastawan y calduntana mankawan encina jacha chakinman aparqan.
20Chäsiptinmi Tayta Diospa angilnin nirqan: <<Aysata y levadüraynaq tantata kay jatun rumi jananman churaykur caldutapis jananman winapay>>.
Ángel nishqannölami lapanta Gedeón rurarqan. 21Saymi Tayta Diospa angilnin aysatawan tantata tukrunwan toqiykurqan. Saymi rumipita nina ratar aysata y levadüraynaq tantata rupar usharqan. Saypitanami Tayta Diospa angilnin elaqaskirqan.
22Sayno elaqaskiptinmi Gedeón tantiyarqan Tayta Diospa angilnin kashqanta. Saymi nirqan: <<¡Kaychi kaylaqa, Taytay! ¡Tayta Diospa angilninta rikaykarqa wanurpis wanuykushaqchi!>>
23Niptinmi Tayta Dios nirqan: <<Ama lakikuysu ni mansakaysu. Manami wanunkisu>>.
24Saymi Gedeónqa Tayta Diospaq altarta ruraskir jutisirqan Yahweh-shalom#6.24 Yahweh-shalom ninanqa Tayta Diosmi ali kawayta qon ninanmi. jutin kananpaq. Say altar kananyaqmi Abiezer ayllu runakuna täyashqan Ofracho kaykan.
25Say sakaymi Gedeónta Tayta Dios nirqan: <<Papänikipa wäkanpita qanchis watayuq alinnin töruta apaykamur Baalpaq papäniki rurashqan altarta shalushpayki nawpancho kaykaq Asera diösapaq jawiyashqan qerutapis seqtariy. 26Nirkur qaqa janancho noqapaq juk altarta ruraskir apamushqayki töruta pishtay. Nirkur Asera diösapaq jawisiyashqan qeruta seqtashqaykiwan altar janancho say töruta rupasina sacrificiupaq rupasiy>>.
27Niptinmi Gedeónqa chunka ashmayninkunawan Tayta Dios nishqannöla lapanta rurarqan. Isanqa papäninpa ayllunkunata y marka mayinkunata masakurmi sakaylapa lapanta rurarqan. 28Waraynin tutanami markacho taq runakuna tariyarqan Baalpa altarnin juchush kaykaqta y altarpa nawpancho kaykaq Asera diösapaq jawisiyashqan raku qerupis manana kashqanta. Saynöpis tariyarqan mushuq altarcho alinnin kaq töruta rupasishqanta. 29Saymi runakuna jukninpis jukninpis niyarqan: <<¿Piraq kayta ruraykush?>>
Sayno tapukuyaptinmi wilayarqan Joáspa surin Gedeón rurashqanta.
Saymi Joásman aywar niyarqan: 30<<¡Suriki Gedeónta jukla jorqamuy wanusiyänäpaq! ¡Paymi Baalpa altarninta juchusish y nawpancho Aserapaq jawishqansi qerutapis seqtash!>>
31Sayno niyaptinmi saycho juntaraykaq runakunata Joás nirqan: <<Qamkuna ¿imanirtaq Baalpa favornin sharkuyanki? ¡Pipis Baalpa favornin kaqqa manaraqpis pasa waraptin wanusish kasun! Rasunpaypa dios karqa altarnin juchusiqta kikin Baal castigasun>>.
32Baalpa altarninta juchusishqan junaqpita pasami Gedeónta Jerobaal jutiwan reqiyarqan. Jerobaal ninanqa <<kikin Baal castigasun>> ninanmi.
33Say wisanmi madianita runakuna, amalecita runakuna y inti jeqamunan kaqlächo taq wakin runakunapis shuntakäyashpan Jordán mayuta simparir Jezreel pampacho campamentunkunata sharkasiyarqan. 34Saymi Tayta Diospa Espïritun Gedeónta valurasiptin runakuna shuntakäyänanpaq cornëtata tukarqan. Tukaptinmi Abiezer ayllu mayinkuna Gedeónwan shuntakäyarqan. 35Mas runakuna shuntakäyänanpaqmi intëru Manasés trïbu runakuna täyashqankunaman qayasiq kachayarqan. Saynölami wilakasirqan Aser trïbu runakunaman, Zabulón trïbu runakunaman y Neftalí trïbu runakunamanpis. Saymi Gedeón kaqman lapan shuntakäyarqan.
36Lapan shuntakaskiyaptinmi Tayta Diosta manakur Gedeón nirqan: <<Nimashqaykino Israel runakunata salvanäpaq yanapämänayki kaptinqa 37kanan sakay milwa qarasata ëraman churashaq. Waraynin tutapaq milwa qarasa ushmash kaptinpis pampa sakila kaptinqa rasunpaypami musyashaq nimashqaykino Israel runakunata salvanaykipaq kashqanta>>.
38Saymi waraynin tuta Gedeón sharkuskir milwa qarasata qapir juk tazón junta shulya yakuta jorqurqan. 39Sayno kaptinpis yapaymi Tayta Diosta Gedeón manakur nirqan: <<Yapay manakuptï ama rabyakuykulaysu, Taytay. Yapaymi uysha qarasata pasaman churashaq. Pasa ushmash kaptinpis milwa sakila warämuptinqa yanapämänaykipaq kashqantami musyashaq>>.
40Saymi Gedeón manakushqannöla Tayta Dios waräsimurqan pasa ushmashta y milwa qarasataqa sakilata.
Currently Selected:
Jueces 6: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
