Jueces 7
7
Madianita runakunata Gedeón vincishqan
1Saypitanami Jerobaal niyashqan Gedeón y paywan kaykaq runakuna tutala yarqur Harod pukyukuna nawpancho campamentunkunata sharkasiyarqan. Madianita runakunapa campamentunnami Israel runakunapita norti kaqläpa kaykarqan. Sayqa More jirkapa chakin pampachömi kaykarqan.
2Saychömi Gedeónta Tayta Dios nirqan: <<Aläpa askami runakuna qamwan kaykäyan. Madianita runakunata vinciyänaykipaq yanapaptï yarpäyankiman askaq kar vinciyashqaykita. Sayno yarpar alabakuyashpayki rabyanäsiyämankimi. 3Sayno mana kananpaq kanan niy mansariq kaqkuna wayinkunaman kutikuyänanpaq>>.#Deut. 20.8.
Kutikuyänanpaq Gedeón niptinmi ishkay chunka ishkay waranqa (22,000) runakuna kutikuyaptin chunka waranqalana (10,000) Gedeónwan quëdayarqan.
4Saypita yapaymi Gedeónta Tayta Dios nirqan: <<Kananpis aläpa askaraqmi runakuna kaykäyan. Kananqa paykunapita akranaykipaq yaku upuq pushay. Saychömi musyasishayki mayqankuna guërraman aywayänanpaq kashqanta y mayqankuna kutikuyänanpaq kashqantapis>>.
5Saymi runakunata yakuman Gedeón pushaptin Tayta Dios nirqan: <<Makinkunawan chaqarkur alquno laqwaypa upuqkunata jukläman akranki. Saynöpis qonqurpaykur upuqkunata jukläman akranki>>.
6Yakuta makinkunawan chaqarkur laqwaypa upuqkuna kimsa pachakmi (300) kayarqan. Wakin kaqkunaqa qonqurpaykurmi upuyarqan.
7Saynami Gedeónta Tayta Dios nirqan: <<Say kimsa pachak (300) runakunalawan madianita runakunata vincinaykipaqmi yanapäshayki. Wakinkunaqa wayinkunapa kutikuyäsun>>.
8Saymi say runakunata Gedeón nirqan cornëtankunata y mirkapanta kachaykur wayinkunapa kutikuyänanpaq. Kutikuyaptinmi akrashqan kimsa pachak runakunalawanna quëdayarqan. Madianita runakunapa campamentunqa ura pampachömi kaykarqan.
9Say sakaymi Gedeónta Tayta Dios nirqan: <<Kanantaq aywar madianita runakunata atacayay. Makikimannami paykunata churamushkä. 10Atacayta mansarirqa ashmayniki Furalawan campamentunman rikapakuq aywar 11imata parlayashqantapis shumaq wiyayanki. Parlayashqanta wiyarmi valurayanki mana mansariypa paykunawan pelyayänaykipaq>>.
Tayta Dios sayno niptinmi contran runakunapa campamentun kuchunman ashmaynin Furawan Gedeón aywayarqan. 12Campamentunchömi madianita runakuna, amalecita runakuna y inti jeqamunan kaqläpita shamuq wakin runakunapis pitishnöraq saysika shuntaraykäyarqan. Saynölami camëllunkunapis yupayta mana atipaypaq kaykäyarqan. 13Sayman chaykur wiyaparaykashqanchömi Gedeón wiyarqan juk soldädu sueñuyninta wilapar nishqanta: <<Sueñuynïchömi rikashkä cebäda tanta janapita kuchpamur toldunsita juchusishqanta>>.
14Sayno wilapaptinmi walkiqnin nirqan: <<Sayqa kanqa Joáspa surin Gedeónpa espädanmi. Madianita runakunata lapan campamentuntintami Gedeónpa makinman Tayta Dios churanqa>>.
15Sueñushqanta wilapaykaqta Gedeón wiyarmi Tayta Diosta agradëcikurqan. Nirkurmi Israel runakuna kaykäyashqan campamentuman kutiykur nirqan: <<¡Sharkuyay! ¡Tayta Diosmi madianita runakunata makinsiman churamush!>>
16Saymi kimsa pachak (300) soldädunkunata kimsa puntaman rakiykur cornëtakunata y uyllukunata aypurqan. Uyllukuna rurinman aceitiwan ushmash rupaykaq träpukunata winarmi 17soldädunkunata nirqan: <<Madianita runakunapa campamentun kuchunman jiruruypa churakäyanki. Campamentupa jukaq kuchunman noqa chaykur rurashqäno qamkunapis rurayanki. 18Saycho cornëtata tukar qalaykuyaptï qamkunapis madianita runakunapa campamentun intërupa jirurupaykur tukayämunki. Saynöpis lapan kalpaykikunawan qayarar niyämunki: <¡Tayta Diospa espädanwan y Gedeónpa espädanwan contransikunata atacashun!> >>
19Sayno yäsirkurmi ishkay punta runakunata Gedeón puntasirqan. Paykunapa qepantanami pachak (100) runakunawan Gedeón aywar pulan paqas chäyarqan madianita soldädukunapa campamentun kuchunman. Say hörami täpaq soldädukuna trukanakuykäyarqan. Campamentuman chaykurmi cornëtata tukayarqan y apayashqan uyllukunatapis pakiyarqan. 20Saymi wakin kaq runakunapis cornëtata tukayashpan uyllunkunata pakiyarqan. Isuq kaq makinwanmi aksita aptaräyarqan y aluq kaq makinwannami cornëtata tukaykäyarqan. Say hörami sinchipa qayarar niyarqan: <<¡Tayta Diospa espädanwan y Gedeónpa espädanwanmi contransikunata atacashun!>>
21Sayno nirmi Israel runakunaqa maypapis mana kuyukuypa madianita runakunapa campamentun kuchunman jiruruypa churakäyashlancho ichiräyarqan. Saynami madianita runakunaqa qaparäyashpan qeshpiyta munar wakpa kaypa cörrikachäyarqan. 22Cornëtakunata kimsa pachak (300) Israel runakuna tukaykäyaptinmi madianita runakunata Tayta Dios pantakäsirqan kikinpura espädawan wanusinakuyänanpaq. Wakin kaq madianita soldädukunanami Zereraman aywaq nänipa qeshpir Bet-sitaläpa aywakuyarqan. Wakinnami chäyarqan Tabatpa nawpan Abel-meholapa lindërunyaq.
23Madianita soldädukuna qeshpir aywakuyaptinmi Neftalí trïbu runakuna, Aser trïbu runakuna y Manasés trïbu runakuna shuntakaykur qatipäyarqan. 24Saynöpis Efraín jalqakunaman Gedeón wilakasirmi nirqan: <<Qamkunapis shayämuy madianita runakunata atacayänaykipaq. Bet-bara väduta y Jordán mayu väduta manaraq päsayaptin yalipaykur atacayay>>.
Sayno niptinmi Efraín trïbu runakuna lapan shuntakaykur Bet-bara väduman y Jordán mayu väduman atacayänanpaq aywayarqan.
25Sayman chaykurmi madianita runakunapa mandaqninkuna Orebta y Zeebta prësu sariykur Orebta juk qaqacho wanusiyarqan y Zeebtana üva jarukuyänan pözu kaqcho wanusiyarqan. Saypita pasami Orebta wanusiyashqan qaqapa jutin kaykan Oreb Qaqa y Zeebta wanusiyashqan pözupa jutinmi kaykan Zeeb Pözu. Madianita runakunata karuyaq qatipaykurmi Efraín trïbu runakuna Jordán simpanman kutiykur Orebpa y Zeebpa umanta Gedeónman apayarqan.
Currently Selected:
Jueces 7: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
