Jueces 2

Tayta Diospa angilnin Boquim particho Israel runakunata yuripashqan

1 Tayta Diospa angilninmi Gilgalpita Boquimman aywaykur Israel runakunata nirqan: <<Egiptupita qamkunata jorqamur Abrahamta, Isaacta y Jacobta promitishqä nacionman chaykasimurmi nirqä: <Pactu rurashqansita manami imaypis qonqäshaqsu. 2Isanqa kay nacioncho taq runakunawan ama ima pactutapis rurayankisu. Saypa trukanqa altarninkunatapis chipyaq juchusiyanki>. Sayno nikaptïpis manami cäsukayämashkankisu. ¿Imanirtaq kullu rinri kayanki? 3Saymi kanan nï: Taykäyashqayki markakunacho kaykaq runakunata manami qarqushaqsu. Paykunami chakikicho kasha jatiraykaqno kayanqa. Adorayashqan diosninkunalapaqmi shonquykikunapis yarparanqa>>.

4 Tayta Diospa angilnin sayno parlayta ushaskiptinmi lapan Israel runakuna selläma waqayarqan. 5Saymi say partita jutisiyarqan Boquim#2.5 Boquim ninanqa waqaq ninanmi. jutin kananpaq. Saychömi Tayta Diospaq sacrificiukunata rupasiyarqan.

Josué wanukushqan

Josué 24.29-31

6Aywakuyänanpaq Josué niptinmi Israel runakuna posisionninkunata chaskiyashqanman kutikuyarqan. 7Israel runakunata yanapar milagrukunata Tayta Dios rurashqantami Josuépis y Egiptupita wakin yarqamuqkunapis rikayarqan. Saymi paykuna kawayashqanyaq Israel runakuna Tayta Dios munashqanno kawayarqan. 8Saypitanami Tayta Diospa sirviqnin Josué pachak chunka (110) watayuq kaykar wanukurqan. 9Wanuykuptinnami Timnat-seracho kikinpa chakranman pampayarqan. Say karqan Gaas jirka norti kaqläpa y Efraín jalqakunachömi. 10Josuépa winay mayinkunapis wanukuyaptinnami qepa yuriq runakuna musyayarqannasu Tayta Dios nishqankunata ni Israel runakunata imano yanapashqantapis.

Israel runakuna juk dioskunatana adorayashqan

11Saypitanami Tayta Diosta mana cäsukur Israel runakunaqa Baal dioskunata adorayarqan. 12Egiptupita jorqamush kaykaptinpis unay ayllunkuna yärakuyashqan Tayta Diosta mananami adorayarqannasu, sinöqa nawpan nacionkunacho taq runakuna adorayashqan dioskunatana adorarmi Tayta Diosta fiyupa rabyanäsiyarqan. 13Sayno rabyakurqan payta adorayänanpa trukan Baal diosta y Astarot diösata adorayaptinmi. 14Sayno kayashqanpitami Tayta Dios fiyupa rabyakushpan Israel runakunata yanaparqannasu. Saymi nawpan nacionkunacho taq contran runakuna yaykuykur imankunatapis apakuyaptin defiendikuyta kamäpakuyarqansu. 15Contran runakunawan pelyaq aywayaptinpis Tayta Dios albirtishqannölami Israel runakunapa contran rikakurqan. Saymi ima ruraytapis mana kamäpakuyashpan fiyupa lakikuyarqan.

16Saypitanami juezkunata Tayta Dios churarqan contran runakunata vinciyänanpaq. 17Sayno kaptinpis say juezkunata Israel runakuna mana cäsukuypami juk dioskunatana adorayarqan. Unay ayllunkuna Tayta Diospa mandamientunkunata cäsukush kayaptinpis paykunaqa manami cäsukuyarqansu.

18Sayno kaptinpis contrankuna nakasiyaptin fiyupa lakikuyashqanta rikarmi Tayta Dios kuyapar juk juezta churaparqan. Say juez kawashqanyaqqa Israel runakunata Tayta Dios yanapaqmi contrankunapa munayninpita yarquyänanpaq. 19Juez wanuykuptinnami awilunkunapitapis peorna jusalikuyman churakäyarqan. Saymi juk dioskunata adorar mana ali costumbrikunata kachariyta munayarqansu.

20Israel runakuna sayno kayaptinmi Tayta Dios fiyupa rabyakur nirqan: <<Unay ayllunkunawan pactu rurashqäta manakaqman churarmi kay runakunaqa ima nishqätapis wiyakuyansu. 21Saymi paykunata yanapäshaqnasu Josué mana ushakäsishqan contran runakunata ushakäsiyänanpaq. 22Say contran runakunami jusalikuyänanpaq Israel runakunata inkitayanqa. Saynöpami musyashaq Israel runakuna unay ayllunkunano cäsukayämashqanta o mana cäsukayämashqantapis>>.

23Sayno nirmi Josué mana ushakäsishqan markakunacho taq runakunata ushakäsiyänanpaq Israel runakunata Tayta Dios yanaparqannasu.

Currently Selected:

Jueces 2: qvhB

Highlight

Copy

Compare