Jueces 3
3
Canaánpita mana qarquyashqan runakuna
1Kaychömi qelqaraykan mayqan mayqan marka runakunata Canaáncho Tayta Dios mana ushakäsishqan. Say runakunata ushakäsirqansu qepa yuriq Israel runakunata jusalikuyman inkitayaptin probananpaqmi. 2Saynöpis say runakunata Tayta Dios ushakäsirqansu qepa yuriq Israel runakuna pelyayta yachakuyänanta munarmi. 3Say runakunami kayarqan filisteo runakunapa pisqa mandaqninkuna, cananeo runakuna, sidonio runakuna y Líbano jalqakunacho taq heveo runakunapis. Say heveo runakunaqa täyarqan Baal-hermón jalqapita hasta Hamatyaqmi.#Jos. 13.2-6.
4Say runakunata Tayta Dios ushakäsirqansu Israel runakunata jusalikuyman inkitayänanpaqmi. Saynöpami musyayta munarqan unay ayllunkunata Moisés yachasishqan leykunata cäsukuyänanpaq o mana cäsukuyänanpaq kayashqantapis. 5Saynöpami Israel runakuna talukash täyarqan cananeo, heteo, amorreo, ferezeo, heveo y jebuseo runakunawan. 6Say runakunapa surinkunawanmi warmi surinkunata y olqu surinkunata täsiyarqan. Paykunawan sayno tarmi diosninkunata adorayarqan.
Israel runakunata Otoniel salvashqan
7 Tayta Diosta mana cäsukur Baal dioskunata y Asera diösapaq jawiyashqan raku qerukunata adorayashpanmi Israel runakuna Tayta Diosta fiyupa rabyanäsiyarqan. 8Saymi Mesopotamia nacionpa mandaqnin rey Cusan-risataimpa munaynincho kayänanpaq Israel runakunata Tayta Dios kachapaykurqan. Saynöpami Israel runakunaqa puwaq wata payta sirviyarqan. 9Saymi Tayta Diosta manakuyaptin paykunata salvananpaq Calebpa sobrinun Otonielta Tayta Dios ali yanaparqan. Otonielpa papänin Cenazqa Calebpa shulka wawqinmi karqan.#Jue. 1.12-13. 10Tayta Diospa Espïritun Otonielta yanapaptinmi Israel runakuna churayarqan jueznin kananpaq. Saymi runakunata pushakurkur pelyaq aywaptin Tayta Dios yanaparqan Cusan-risataimta vinciyänanpaq. 11Saypitaqa Otoniel wanushqanyaqmi chusku chunka (40) wata Israel runakuna jawkala kawayarqan.
Israel runakunata Aod salvashqan
12Israel runakuna Tayta Diosta mana cäsukur yapay rabyanäsiyaptinmi Moab nacionpa mandaqnin rey Eglónta Tayta Dios yanaparqan munayyuq kananpaq. 13Saymi amonita y amalecita runakunawan Israel runakunata vinciykur Palmëra Markata#3.13 Palmëra Markaqa Jericó markami karqan (Deut. 34.3). qechuyarqan. 14Say junaqpitami rey Eglónpa munaynincho Israel runakuna chunka puwaq wata kayarqan.
15Saymi Tayta Diosta manakuyaptin Gerapa surin Aodta#3.15 Wakin traduccionkunachöqa Ehud niyanmi. Tayta Dios yanaparqan Israel runakunata salvananpaq. Aodqa isuq makinwan imatapis ruraqmi karqan. Saynöpis Benjamín trïbu runami karqan. Paywanmi Israel runakunaqa impuestu shuntayashqanta rey Eglónman apasiyarqan.
16Impuestuta manaraq aparmi Aodqa pulan metru largutano ishkan lädunpa afilash espädata rurarqan. Nirkurmi mödanan rurinpa aluq kaq seqlanman jatirkurqan. 17Saypitanami impuestu shuntayashqanta apar rey Eglónman chäsirqan. Eglónqa fiyupa wera runami karqan. 18Apashqanta qoykurmi Aodqa walkiqninkunawan kutikuyarqan. 19Kutikuykashqanchömi Gilgalcho kaykaq rumipita rurash ïdulukunaman chaykur rey Eglónman Aod kutirqan. Chaykurmi nirqan: <<Pakaylapa wilaykushayki, taytay>>.
Nishqanta wiyananpaqmi rey Eglónqa mandäsiqninkunata nirqan waqtaman upälala yarquyänanpaq. 20Yarquriyaptinmi jamaräkunan cuartuncho Aodwan rey Eglón ishkalanna quëdaskiyarqan. Saymi rey Eglónpa nawpanman witiykur Aod nirqan: <<Tayta Dios nimashqanta wilashayki, taytay>>.
Niptinmi jamarashqan trönunpita Eglón sharkurkurqan. 21Saynami aluq kaq seqlanpita isuq kaq makinwan espädanta jorqurir Aodqa Eglónta pachanpa elaqpita tuksiriykurqan. 22Eglón pasaypa wera kaptinmi espädaqa makin sarikunantin yaykukuykurqan. Saymi jipiyta mana kamäpakur kachaskiptin ashashninpis wisikaskamurqan. 23Saynöta kachaskirmi Aodqa punkuta ruripita llävirkur ventänapa yarquskir aywakurqan.
24Aod aywaskiptinnami rey Eglónpa mandäsiqninkuna kutir punku wichqaraykaqta tariyarqan. Sayta rikarmi yarpäyarqan ruricho ishpakuykashqanta. 25Qoyati shuyaräyaptinpis rey Eglón mana yarqamuptinmi lläviwan kicharir yaykuyashpan tariyarqan pampacho wanush jitaraykaqta.
26Rey Eglónpa mandäsiqninkuna shuyaräyashqanyaqmi Aodqa Gilgalcho kaykaq ïdulukuna nawpanpa päsarir Seiratläman qeshpir pakakurqan. 27Saypita aywar Efraín jalqakunaman chaykurmi cornëtata tukarqan Israel runakuna sayman shuntakäyänanpaq. Shuntakaskiyaptinnami lapanpa puntanta Jordán mayuman Aod urarqan.
28Manaraq urarmi nirqan: <<Kananmi contransi moabita runakunata vincinansipaq Tayta Dios yanapämäshun>>.
Saymi Jordán mayu väduman aywaykur pitapis päsananta kachapäyarqansu. 29Moabita runakuna pelyayänanpaq shayämuptinmi wanusiyarqan chunka waranqano (10,000) ali pelyaq soldädukunata. Saycho manami juklaylapis kawaykar quëdarqansu. 30Saynömi Israel runakuna moabita runakunata vinciyarqan. Saypita pasami puwaq chunka (80) wata Israel runakuna jawkalana kawakuyarqan.
Israel runakunata Samgar salvashqan
31Aod wanuskiptinnami Anatpa surin Samgarna Israel runakunata contrankunapita salvarqan. Paymi yuntata qatikuna picalawan soqta pachak (600) filisteo runakunata wanusirqan.
Currently Selected:
Jueces 3: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
