Jueces 1
1
Judá y Simeón trïbu runakuna Adoni-bezecta prësu sariyashqan
1Josué wanuykuptinnami Israel runakuna Tayta Diosta tapukuyarqan: <<¿Mayqan trïbu runakunataq cananeo runakunawan pelyaq puntata aywayanqa, Taytay?>> nir.
2Saymi Tayta Dios nirqan: <<Judá trïbu runakunami puntata aywayanqa. Cananeo runakuna tashqan markakunata paykunatami qoykushaq>>.
3Saymi Judá trïbu runakuna Simeón trïbu runakunata niyarqan: <<Aypuyämashqan particho kaykaq cananeo runakunata qarquyänäpaq yanapaykayälämay. Saynölami noqakunapis yanapäyäshayki töcayäshushqayki particho kaykaq runakunata qarquyänaykipaq>>.
Sayno niyaptinmi paykunawan Simeón trïbu runakuna pelyäsiq aywayarqan.
4Bezecman yaykur cananeo y ferezeo runakunawan pelyayaptinmi Tayta Dios yanaparqan ushakäsiyänanpaq. Saymi chunka waranqa (10,000) runakunata wanusiyarqan. 5Saycho taq cananeo y ferezeo runakunapa mandaqnin reymi karqan Adoni-bezec. Payta y paywan kaykaq runakunatapis lapantami vinciyarqan. 6Qeshpiykaqta taripaykurmi Adoni-bezecta prësu sariykur makinpa y chakinpa mama dëdunkunata roquriyarqan. 7Saymi rey Adoni-bezec nirqan: <<Noqapis qanchis chunka (70) reykunapa chakinpa y makinpa mama dëdunkunatami roqurirqä. Paykunami mësapita shikwapakuyashqäta mikular kawayaq. Sayno rurashqäpitami noqatapis Tayta Dios kanan castigaykäman>>.
Saypitanami rey Adoni-bezecqa Jerusalénman apaykuptin saycho wanurqan.
Hebrónman y Jerusalénman Judá trïbu runakuna yaykuyashqan
8Jerusalénman pelyaq aywarnami saycho taq runakunata Judá trïbu runakuna lapanta espädawan wanusiyarqan. Nirkurmi markacho kaykaq wayikunatapis rupasir ushayarqan. 9Saypitanami Neguevcho, jalqakunacho y Sefelacho taq cananeo runakunawan pelyaq aywayarqan.#Jos. 10.40; 11.21. 10Nirkurnami Hebrón markacho taq cananeo runakunawan pelyaq aywayarqan.#Jos. 10.36-37. Say markapa unay jutinmi karqan Quiriat-arba. Saychömi wanusiyarqan Sesai runakunata, Ahimán runakunata y Talmai runakunata.
Debir markata Otoniel vincir qechushqan
Josué 15.15-19
11Saypitanami Debircho taq runakunata atacayänanpaqna yaykuyarqan. Say markapa unay jutinmi karqan Quiriat-sefer. 12Saymi Caleb nirqan: <<Pipis say markaman pelyaq yaykur vinciq kaqtami warmi surï Acsawan täsishaq>>.
13Sayno niptinmi Cenazpa surin Otoniel say markaman yaykur saycho taqkunata vincirqan. Sayno vinciykuptinnami Calebqa surin Acsawan täsirqan. Otonielqa karqan Calebpa shulka wawqinpa surinmi.
14Papäninpa wayinpita yarquykäyashqanchönami warmin Acsata Otoniel nirqan: <<Papänikita ruwakamuy chakrata rikasimänansipaq>>.
Saymi ashnunpita Acsa urarkuptin papänin Caleb tapur nirqan: <<¿Imatataq munaykanki, hïja?>>
15Tapuptinmi Acsa nirqan: <<Ruwakuläshayki, papä. Neguevcho chakrata rikasimashqaykinöla pukyuyuq chakrakunatapis qaraykalämay>>.
Sayno niptinmi papänin rikasirqan jana tuman pukyuyuq chakrata y ura tuman pukyuyuq chakratapis.
Judá y Benjamín trïbu runakuna cananeo runakunata vinciyashqan
16Ceneo runakunami Moiséspa suedrun Hobabpita miraqkuna kayarqan. Paykunami Judá trïbuman talukaykur Palmëra Markapita aywayarqan Judá trïbu runakuna chaskiyashqan sunyaq jirkaman. Sayqa Neguevcho kaykaq Arad cercanchömi karqan. Saychömi Judá runakunawan talukash täyarqan.
17Saypitanami Judá trïbu runakuna Simeón trïbu runakunawan Sefatcho taykaq cananeo runakunata atacashpan chipyaq asulayarqan. Saymi say markata jutisiyarqan Horma#1.17 Horma ninanqa ushakash ninanmi. jutin kananpaq. 18Saynölami Gazacho, Ascalóncho y Ecróncho taq runakunata vinciykur chakrankunatapis qechuyarqan.
19 Tayta Dios yanapaptinmi Judá trïbu runakunaqa jalqakunacho taq runakunata wanusir ushayarqan. Costacho taq runakunatami isanqa ushakäsiyta kamäpakuyarqansu, fiërrupita rurash guërra carrëtankuna kaptin. 20Moisés nishqannölami Hebrón partita Calebta qoykuyarqan. Sayman chaykurmi Anacpa kimsan surinkunapita miraqkunata qarqurqan.
21Benjamín trïbu runakunaqa Jerusaléncho taq jebuseo runakunata manami qarquyta kamäpakuyarqansu. Saymi jebuseo runakunaqa kananyaqpis Benjamín trïbu runakunawan Jerusaléncho taykäyan.
Manasés y Efraín trïbu runakuna Bet-el markaman yaykuyashqan
22 Tayta Dios yanapaptinmi Josépita miraq runakuna#1.22 Josépita miraq runakunaqa Manasés trïbu y Efraín trïbu runakunami kayarqan. Bet-el markacho taq runakunata atacar vinciyarqan. 23Manaraq atacarmi say markaman runakunata kachayarqan imano kashqantapis rikapakayämunanpaq. Nawpataqa say markapa jutin karqan Luzmi. 24Rikapakuqkuna chaykurmi say markapita yarqaykämuq juk runawan tinkuskir niyarqan: <<Markaman maypa yaykuyänäpaqpis rikasiyämaptikiqa manami wanusiyäshaykisu>>.
25Sayno niyaptinmi mayninpa yaykuyänanpaqpis rikasirqan. Saymi rikapakuqkuna kutiykur wilayaptin Israel runakuna yaykuykur saycho taqkunata espädankunawan lapanta wanusiyarqan. Markaman imano yaykuyänanpaqpis rikasiq runata y ayllunkunatami isanqa promitiyashqannöla wanusiyarqansu. 26Say runa heteo runakuna täyashqan kaqman aywakurmi markata sharkarkasir jutisirqan Luz jutin kananpaq. Kananyaqpis say markapa jutin saylami kaykan.
Mana qechuyashqan kaq markakuna mayqan mayqan kashqanpis
27Manasés trïbu runakuna manami qarquyta kamäpakuyarqansu Bet-seán, Taanac, Dor, Ibleam y Meguido markakunacho taq runakunata y say markakunapa nawpankunacho taq runakunatapis. Saymi cananeo runakunaqa jinala say markakunacho taykäyan. 28Saypita Israel runakuna askaman mirarmi cananeo runakunata ashmaytano arusir munaynincho sararäyarqan. Paykunata qarquytami isanqa kamäpakuyarqansu.
29Efraín trïbu runakunapis manami qarquyta kamäpakuyarqansu Gezercho taq cananeo runakunata. Saymi say cananeo runakuna Efraín trïbu runakunawan talukash taykäyan.
30Zabulón trïbu runakunapis Quitrón y Naalal markakunacho taq cananeo runakunata manami qarquyta kamäpakurmi ashmaytano arusir munaynincho sararäyarqan. Saymi cananeo runakuna Zabulón trïbu runakunawan talukash taykäyan.
31Aser trïbu runakunapis Aco, Sidón, Ahlab, Aczib, Helba, Afec y Rehob markakunacho taq runakunata manami qarquyta kamäpakuyarqansu. 32Saymi cananeo runakunawan talukash täyarqan.
33Neftalí trïbu runakunapis Bet-semes y Bet-anat markakunacho taq cananeo runakunata qarquyta mana kamäpakurmi munaynincho sararar arusiyarqan. Saymi cananeo runakuna Neftalí trïbu runakunawan talukash taykäyan.
34Dan trïbu runakunataqa amorreo runakuna manami kachapäyarqansu costacho kaykaq posisionninkunaman yaykuyänanta. Saymi jalqaman kutisiyarqan saycho täkuyänanpaq. 35Saynöpami amorreo runakunaqa täyarqan Heres, Ajalón y Saalbim markakunacho. Qepataraqmi Josépita miraq Efraín y Manasés trïbu runakuna munayyuq rikakur saycho taykaq amorreo runakunata munaynincho sararar arusiyarqan. 36Amorreo runakunapa lindërunqa wisararqan Acrabimpita qalaykur hasta Selapita mas janaqanyaqmi.
Currently Selected:
Jueces 1: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
