Oseas 4
4
Israel runakuna jusalikuyaptin Tayta Dios rabyakushqan
1Israel runakuna, Tayta Dios niyäshushqaykita tantiyakuyay.
Paymi jusalikuyashqaykipita acusaykäyäshunki.
Saymi niyäshunki: <<Qamkunaqa manami promitiyämashqaykita cumpliykäyankisu, kuyanakuyankisu ni reqiyämankisu.
2Jutïcho promitirkurpis manami cumpliykäyankisu.
Saynöpis lulakuykäyanki, runa mayikita wanuykäsiyanki, suwakuykäyanki y jukpa warminwanpis punuykäyanki.
Pïmayta wanusirpis manami ajayäyankisu.
3Sayno kayaptikimi Israelcho taqkuna fiyupa lakikuywan ima ruraytapis kamäpakuyansu.
Jirka uywakunapis, pishqukunapis y pescädukunapis wanurmi ushakaykäyan>>.
Cürakuna jusalikuyashqan
4 Tayta Diosmi cürakunata nin:
<<Israel runakuna lutan rurayman uman churakash kayänanpaq qamkunami jusayuq kaykäyanki.
Sayno kaykarqa pitapis ama jitapäyaysu.
5Jusayuq kayashqaykipitaqa imay karpis elaqpitami castigayäshayki.
Qamkunatapis y lula profëtaykikunatapis castigarmi nacionnikita ushakäsishaq.
6Yachasikuq kaykar mandamientükunata mana yachasiyaptikimi#Lev. 10.11; Mal. 2.7. kuyashqä runakuna ushakäyanqa.
Kikikikunapis manami yachasikuynïkunata chaskikuyankisu.
Mana chaskikuyashqaykipitami cüra kaykäyashqaykipita qarquyäshayki.
Leynïkunata mana cumpliyashqaykipitami qamkunapita miraqkunatapis yanapäshaqnasu.
7<<Qamkuna askaqman mirayaptikipis masmi runakuna jusalikuykäyan.
Saymi respitash kayänaykipaq churash kaykarpis pasaypa penqayman churayäshayki.
8Jusalikuyashqanpita uywata sacrificiupaq apayämuptinmi kushikuyanki.
Sacrificiu aysata chaskiyänayki kashqami runakuna mas jusalikuyänanta munaykäyanki.#Lev. 6.26.
9Wakin runakuna jusalikuyashqannölami qamkunapis jusalikuykäyanki.
Saymi qamkunatapis wakin runakunatanöla castigayäshayki.
10Mana cäsukayämashqaykipitami mikuyänaykipaq tariyaptikipis ukushnikikunata watarkuyänalaykipaq kanqa.
Juk dioskunaman yärakurpis manami ima bendiciontapis chaskiyankisu>>.
Israel runakuna ïdulukunata adorayashqan
11<<Prostitüta warmiwan kakur y upyaman churakarmi runakuna juiciuntapis oqrayan.
12¡Saymi qerupita rurash ïdulukunata tapukuykäyan!
¡Qeruwanmi suertita rikaykäyan!
Ïdulukunaman uman churakash karmi lutanta rurar kawaykäyan.
Warminta runa kacharir juk warmiwan tashqannömi noqatapis mana cäsumar juk diosman yärakuykäyan.
13Lömacho kaykaq altarkunacho sacrificiutapis rupasirmi juk dioskunata inciensuwan qoshniykäsiyan.
Roble, álamo y encina jachakuna chakincho lantuy ali kaptinmi say jachakuna kaqcho sayno ruraykäyan.
<<Israel runakuna, qamkunapitami warmi surikikuna y lumsuynikikuna ïdulukuna adorayta yachakuykäyan.
Ïdulukunata adorarmi altarkuna kashqancho runanta qanratar jusalikuykäyan.#4.13 Say wisanmi Baal diosta adorar payta adorayänan altarkunacho warmikunawan runakuna kakuyarqan.
14Qamkunapis saynölami juk dioskunapaq sacrificiuta rupasir altarkunacho jukwan jukwan kakuq warmikunawan kakuykäyanki.
Warmi surikikunata y lumsuynikikunata sayno kayänanpaq churayashqaykipita paykunata castiganäpa trukanqa kikikikunatami castigayäshayki.
Mana tantiyakuq kayaynikipami lapayki ushakäyanki.#Jer. 2.23-27; 3.1-2; Ose. 2.5.
15<<Judá runakuna, cuidä qamkunapis Israel runakunanötaq ïdulukunata adorayankiman.
Sayno nikaptïqa Gilgalmanpis ni Bet-avénmanpis#4.15 Bet-avén ninanqa jusa wayi ninanmi. Bet-avénpaq parlarqa tumasipaylapa Bet-el markapaqmi parlarqan. Bet-elpaq sayno parlarqan Tayta Diosta saycho adorayänanpa trukan Baal diostapis saycho adorayaptinmi. adoraq ama aywayaysu.
Ïdulukunaman yärakurqa jutïtapis ama joqariyaysu.#Amós 4.4; 5.5.
16<<Israel runakunaqa chucaru wäkano mana cäsukuqmi kaykäyan.
Sayno kaykäyaptinqa ¿imanöraq washki uyshata ali qewacho misiqno paykunata shumaq rikäman?
17Efraín runakunaqa#4.17 Efraín runakunapaq parlarqa Israel nación runakunapaqmi parlan. ïdulukunatami adoraykäyan.
Saynöla karqa ¡ima supaynöpis kakuyäsun!
18Paykunaqa upyalaman churakashqami kaykäyan.
Altarkunacho kaykaq prostitüta warmikunamanmi imaypis aywaykäyan.
Autoridäninkunapis jusalikur penqakuypaqmi kaykäyan.
19Sayno kayashqanpitami punshata shukukuy apaqno castigar maysaymanpis qarqushaq.
Juk dioskunaman yärakuyashqanpis manakaqlapaqmi kanqa>>.
Currently Selected:
Oseas 4: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
