Oseas 12
12
1 1 (2) Efraín runakunaqa pasaypa lulakuylaman y wanusinakuylaman umankuna churakash karmi Asiria runakunawan pactuta ruraykäyan.
Egipto nacionwanpis pactuta rurayashpanmi aceitita apaykäsiyan.
Say nacionkunawan pactuta rurarqa wayralawan pachan juntänanpaq kashqanta yarpaqnömi manakaqlapaq ruraykäyan.
Inti jeqamunan kaqläpita shamuq akaq wayrata qoyayninpa qatikachaq japuymi manakaqkunata ruraykäyan>>.
2 2 (3) Judá runakunawanpis Tayta Dios rabyashqami kaykan.
Saymi jusalikuyashqanman tupu castiganqa.
3 3 (4) Unay ayllunsi Jacobpis wawqinpa ankunta aptakushqami yurirqan.#Gén. 25.26.
Poqukarkurnami Tayta Dioswan pelyarqan.
4 4 (5) Angilwan pelyar#12.4 Say angilqa Tayta Diosmi karqan (Gén. 32.30). vinciykurmi bendicionninta qonanpaq waqapashpan ruwakurqan.#Gén. 32.24-28.
Saypitanami Bet-elcho Tayta Dios yuriparkur parlaparqan.#Gén. 28.10-22.
5 5 (6) Paymi lapanta mandaq Tayta Dios kaykan.
¡Paypa jutinpis Yahwehmi kaykan!
6 6 (7) Sayno kaykaptinqa jusalikuykunata wanakur Tayta Diosta perdonta manakuyay.
Tayta Diosta promitiyashqaykinöla leyninkunata cäsukur kawayay.
Kuyayäshuqniki Tayta Diosman imaypis yärakuyay.
7 7 (8) Tayta Diosmi nin:
<<Qamkunaqa cananeo runakunanömi runa mayikita pësuwan engañaykäyanki.
Runa mayikita engañaymi gustayäshunki.
8 8 (9) Sayno engañarmi kushish nikäyanki:
<Seqaypami rïcuyashkä.
Negociupaqpis suertï kanmi.
Runakunata engañashqäta manami pipis cuentata qokunsu>.
9 9 (10) Sayno nirpis tantiyakuyay unay aylluykikuna Egiptucho kayashqanpita pasa Tayta Diosniki kashqäta.
Saymi castigaptï toldukunalacho täyanki Ramäda fiestata rurar täyashqaykino.#Lev. 23.42.
10 10 (11) <<Jusaykikunata wanakuyänaykipaqmi profëtakunawan wilakasimurqä.
Wilapäyäshunaykipaqmi sueñuyninchöpis yaparir yaparir revelarqä.
Imamanpis tinkusiypa tantiyasiyäshunaykipaqmi kachamurqä.
11 11 (12) <<Galaad particho taq runakunaqa ïdulukunata manakaqlapaqmi sirviykäyan.
Gilgalcho taq runakunapis törukunata pishtar juk dioskunapaqmi sacrificiukunata altarkunacho rupaykäsiyan.
Saymi altarninkunatapis lapanta shalur ushashaq.
Perqayashqan rumikunapis chakrakunachömi mashtaräyanqa>>.
12 12 (13) Unay ayllunsi Jacobmi Aram partiman qeshpir aywakurqan.
Saychömi uyshata misipakuypa warmita tarirqan.
13 13 (14) Saypita unaylatanami Israel runakunata Egiptupita juk profëtawan Tayta Dios jorqamurqan.#Éxo. 12.50-51.
Say profëtawanmi paykunata cuidasirqan.
14 14 (15) Sayno kaykaptinpis qamkunaqa Tayta Diosta fiyupami rabyanaykäsiyanki.
Pasaypa jusayuq kayashqaykipitami Tayta Dios castigayäshunki.
Castigash kayänaykipaq kikikikunami jusayuq kaykäyanki.
Currently Selected:
Oseas 12: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
