Génesis 44

Josépa väsunta Benjamínpa costalnincho tarishqan

1Nirkurnami mayor sirvientinta mandar José nirqan: <<Kay runakunapa costalninkunaman trïguta junta winaparkur pägayäshushqayki qellaynintapis costalninkunapa shiminman winapanki. 2Shulka kaqpa costalninman qellaypita rurash väsüta y trïgupita pägashqan qellayta winapanki>>.

José nishqannölami say sirvientin lapantapis rurarqan.

3Pasa wararkuptinnami wawqinkunata José despacharqan. Saymi ashnunkunaman chaqnakurkur#44.3 Wakin runakunaqa cargakurkur niyanmi. aywakuyarqan. 4Manaraq karupäyaptinmi mayor sirvientinta José kachar nirqan: <<Ayway say trïgu rantiq runakunapa qepanta. Taripaykur ninki: <Patronnï qamkunawan ali kaykaptin ¿imanirtaq qellaypita rurash väsunta suwakayämushkanki? 5Say väsu kaykan patronnï upunanpaq y imatapis adivinananpaqmi. Sayta suwakamur mana alitami rurayashkanki> >>.

6Sayno niptin aywar taripaykurmi patronnin nishqannöla runakunata nirqan. 7Niptinmi paykuna niyarqan: <<¿Imanirtaq noqakunata sayno tumpayämanki? Saytaqa manami ruraykuyämansu. 8Costalnïkunapa shimincho tariyashqä qellaytapis Canaánpita pasami kutisiyämushkä. Kanan ¿imanöpataq patronnikipa wayinpitaraq saypis qellayninta ni qorintapis suwakayämüman? 9Mayqäkunapa costalnïchöpis väsuta tariptikiqa wanusish kasun. Wakinnïpis patronnikipa ashmaynin kayäshaq>>.

10Saymi mayor sirvienti nirqan: <<Niyashqaykino kasun. Isanqa mayqaykipis väsuta sararaq kaqlami ashmaynï kananpaq quëdanqa. Wakinnikiqa markaykipami kutikuyanki>>.

11Sayno niptinmi jinan höra cargankunata paskapakur costalninkunapa shiminta kichapakuyarqan. 12Saymi ashipar qalaykurqan mayor kaqpa costalninpita shulka kaqpa costalninyaq. Sayno ashipaykashqanchömi Benjamínpa costalnincho väsuta tarirqan. 13Saymi fiyupa lakikuypita mödanankunatapis rachir ushayarqan. Nirkurmi saylapita jinan höra ashnunkunata chaqnakurkur José kaykashqan markaman kutiyarqan. 14Wawqinkunawan Judá kutirmi José wayilanchöraq kaykaqta tariyarqan. Saymi pasaypa lakikuyashpan nawpanman lätakuykuyarqan.

15Paykunatami José nirqan: <<¿Imanirtaq suwakuyashkanki? ¿Manaku musyayashkanki adivïnu kar imatapis musyashqäta?>>

16Saymi Judá nirqan: <<Taytay, manami ima niytapis kamäpakuyäsu. Jusalikuyashqätami#44.16 Josépa väsunta mana suwash karpis Judá reconöcirqan wawqinta unay rantikushqanpita jusayuq kashqantami. Saymi jusalikushqätami Tayta Dios rikayämash nirqan. Saypita masta musyanaykipaq liyinki Gén. 42.21-22. Tayta Dios rikayämash. Kananqa väsuykita sararaqnintin lapäkunachir qampa ashmayniki kayäshaq>>.

17Sayno niptinmi José nirqan: <<Lapayki manami ashmaynï kayankimansu. Väsüta suwaq kaqlami ashmaynï kanqa. Wakinnikiqa papäniki kaqpa kutikuyay>>.

Benjamínta mana quëdasinanpaq Judá ruwakushqan

18Sayno niptinmi Josépa nawpanman witiykur Judá nirqan: <<Taytay, qam kaycho kaykanki kikin Faraónnömi. Ruwakuptï mana rabyakuylapa wiyaykalämay, tayta. 19Nawpata shayämuptïmi tapuyämarqayki papänï kawashqanta y maspis wawqï kashqanta. 20Sayno tapuyämaptikimi wilayarqä papänï kawashqanta y awkinyayninchöraq yuriq surin maqtalaraq kaykashqantapis. Saynöpis wilayashkä say mamalapita kaq jukaq wawqï elaqashqanta y nunush kaq wawqilanna kawaptin papänï seqaypa kuyashqantami. 21Saymi niyämarqayki reqinaykipaq shulka wawqïta pushayämunäpaq. 22Saymi niyarqä say surinta apayämuptïqa papänï lakikuywan wanurpis wanuykunanpaq kashqanta. 23Sayno wilayaptïpis niyämarqayki payta mana pushayämuptïqa mana chaskiyämänaykipaq kashqantami.

24<<Saymi papänï kaqman kutiykur lapan niyämashqaykita wilayarqä. 25Saypitanami papänï yapay niyämarqan trïgu rantiq kutiyämunäpaq. 26Saymi niyarqä: <Manami kutiyämansu shulka wawqïta mana pusharqa. Say mandaq runa manami payniynaqtaqa chaskiyämanqasu>. 27Sayno niyaptïmi papänï niyämarqan: <Qamkuna musyayankimi say mamalapita ishkay surï kayashqanta. 28Jukaq surïtapis yarqushqanpita pasa manami rikänasu. Rasunpaypami ima fiyu uywakunapis mikush kanqa. 29Shulka surïta pushaptiki imapis päsaptin qamkunami jusayuq kayanki lakikuypita wanuptï> >>.

30Sayno nirkurmi Judá nirqan: <<Papänï kay surinta seqaypami kuyan. Payta mana kutisiyaptïqa 31lakikuylapitami wanunqa. Sayno wanunanpaq noqakunami jusayuq kayäshaq. 32Noqami papänïta promitishkä imaykanöpapis surinta kutisinäpaq. Saynöpis nirqä payta mana kutisirqa wanushqäyaqpis jusayuq kanäpaq kashqantami. 33Taytay, saymi ruwakü shulka wawqïpa trukan ashmayniki noqa quëdakushaq. Payqa wawqïkunawan papänï kaqman kutikusun. 34Shulka wawqï mana kutiptinqa ¿imanöparaqchi papänï kaqman kutïmanpis? Manami munäsu papänï kuyapaypaq waqananta>>.

Currently Selected:

Génesis 44: qvhB

Highlight

Copy

Compare