Génesis 43

Egiptuman Benjamínta pushayashqan

1Intëru Canaáncho fiyupami muchuy karqan. 2Saymi Egiptupita apayämushqan trïgu ushakaptinna surinkunata Jacob nirqan: <<Walkalatapis trïgu rantiq yapay kutiyay>>.

3Saymi Judá nirqan: <<Egiptucho trïguta rantikuq runami niyämash: <Shulka wawqikita mana pushamurqa ni yuripäyämaypissu>. 4Wawqï Benjamín noqakunawan aywaptinqa trïgu rantiq aywayäshaqmi. 5Mana kachapäyämaptikiqa walälami aywayäshaq, papä. Näqa nishqänöpis say mandaq runa niyämash: <Shulka wawqikita mana pushamurqa nawpämanpis ama yuripäyämaysu> >>.

6Saymi Israel nirqan: <<Mas lakikuyman jitarpayämashpayki ¿imapaqtaq say runata wilapäyarqayki jukpis shulka wawqiki kashqanta?>>

7Niptinmi paykuna niyarqan: <<Say runa mayqan ayllu kashqansitapis musyayta munarmi tapuyämarqan: <¿Papäniki kawaykanraqku? ¿Maspis wawqiki kanraqku?> Sayno tapuyämaptinmi rasun kaqta wilayashkä. ¿Imanöpataq musyayäman karqan <wawqikita pushamuy> niyämänanpaq kashqanta?>>

8Saymi papäninta Judá nirqan: <<Papä, malaqaywan mana wanunansipaq Benjamín noqakunawan aywasun. Noqami payta imapitapis rikashaq. Aywananpaq awniptikiqa juklami aywayäshaq. Saynöpami noqansipis ni wamransikunapis mikanaypita wanushunsu. 9Wamraykita imapis päsaptinqa noqami cuentayuq kashaq. Payta mana kutisimuptïqa wanushqäyaqpis ama perdonamankisu. 10Egiptupita chaykamular wilayashläpita wamraykita pushayänäpaq awniptikiqa maynami ishkay kutipis kutiyämüman karqan>>.

11Sayno niptinmi papänin nirqan: <<Sayno kaptinqa ¿imatanataq rurashunpis, hïju? Egiptucho mandaqta qarayänaykipaq alinnin kaqkunata walka walkalatapis apayay: balsamuta, abëjapa mishkinta, perfümita, mïrrata, nueciskunata y almendraskunatapis. 12Qellaytapis puntata kutisiyämushushqaykitawan yapay apayay. Kutisimushqayki qellaytaqa chaykular kikinpa makinman entregayanki. Capazchir pantaypapis costalnikikunaman winarkayämurqan. 13Shulka wawqikita pushakurkur say mandaq runa kaqman jukla aywayay. 14Dios El-Shaddai#43.14 El-Shaddai ninanqa lapanpaq munayyuq Dios ninanmi. say mandaq runata tantiyaykasisun kuyapäyäshushpayki Simeóntawan Benjamínta kachapaykayämushunaykipaq. Lapan surïkunata oqranäpaq kaptinqa jina saynöchir kanqa>>.

15Jacob sayno yäsiptinmi mandaq runata qarayänanpaq kaqkunata kamarikuyarqan. Nirkurmi qellaytapis aparkur y wawqin Benjamíntapis pushakurkur Egiptuman aywayarqan. Chaykurnami Josépa despächunman yaykuyarqan. 16Benjamínta wawqinkunawan kaykaqta rikaykurmi wayincho mayor sirvientinta José nirqan: <<Kay runakunata wayïman pushay. Nirkur wäkata pishtarkur mikuyta yanukasimuy. Paykunawanmi kanan junaq mikushaq>>.

17Sayno niptinmi sirvientin Josépa wayinman pusharqan. 18Sayman pushaptinmi fiyupa mansakar kikinpura ninakuyarqan: <<Punta kaqcho qellayninsita kutisimashqansipitami niq tumpala pushaykämansi. Kananqa maqa maqarkurchir ashmaynin kanansipaq ashnuntinta#43.18 Wakin runakunaqa ashnunsinintinta niyan. sararämäshun>>.

Josépa wayincho wawqinkuna mikuyashqan

19Sayno niyashpanmi Josépa wayinman chaykur sirvientita ruwakur niyarqan: 20<<Taytay, musyashqaykinöpis nawpatami trïgu rantiq shayämurqä. 21Kaypita kutir posädakuyashqächo cargäkunata paskapakurmi costalnïkunapa shimincho pägayashqä qellayta tariyashkä. Trïgupita pägayashqä qellay complëtumi kaykänaq. Say qellayta entregaykuyänäpaqmi kutisiyämushkä. 22Say jananmanmi qellayta apayämushkä trïguta yapay rantiyänäpaq. Isanqa manami musyayäsu punta kaq qellayta costalnïkunaman pï winapäyämashqantapis>>.

23Sayno niyaptinmi sirvienti nirqan: <<Saypita ama lakikuyaysu ni mansakäyaysu. Taytayki yärakushqan y qamkuna yärakuyashqayki Diosmi say qellayta costalnikiman churash kanqa. Qamkuna pägayashqaykita lapantami noqa chaskirqä>>.

Nirkurnami Simeóntapis carcilpita jorqarkamur wawqinkuna kaykäyashqan kaqman say sirvienti pusharqan. 24Josépa wayinman chaykasirnami chakinkunata maylakuyänanpaq yakuta apapämurqan. Nirkurnami ashnunkunatapis qewata qarapakurqan. 25Saypitami Josépa wawqinkuna musyayarqan paykunawan José almorzananpaq kashqanta. Saymi apayashqanta entregayänanpaq kamarikushla shuyaraykäyarqan.

26Wayinman José chaykuptinnami paypaq apayashqanta entregar nawpanman qonqurpakuyarqan urkunkunapis pasaman töpashqanyaq. 27Saymi imano kaykäyashqantapis tapushpan José nirqan: <<Nawpata shamur wilayämarqayki papäniki awkinna kashqantami. ¿Imanötaq pay kaykan? ¿Kawaykanraqku?>>

28Sayno tapuptinmi lapan qonqurpakuykur niyarqan: <<Awmi taytay, papänï alilami kawakuykan>>.

29Paykunata rikapaykashqanchömi José rikärirqan wawqin Benjamínta. Benjamínwan José kayarqan say mamalapita y say taytalapitami. Wawqinkunata tapurmi nirqan: <<¿Payku kaykan <shulka wawqï kanmi> niyämashqayki?>>

Sayno tapurkurmi Benjamínta José nirqan: <<¡Tayta Dios yanapaykuläshunki ari, hïju!>>

30Wawqinta rikaykuptinmi Josépa shonqun pasaypa ishkikäkurqan. Saymi cuartunman yaykuykur waqarqan. 31Waqarkurnami qaqlanta maylakurir yarqamurqan. Nirkurnami mikuyta qarakayämunanpaq ashmayninkunata nirqan.

32Saymi juk mësaman shuyni Joséta qarayarqan. Juk mësamannami wawqinkunata qarayarqan. Juk mësamannami saycho mikuq Egipto runakunata qarayarqan. Paykunata sayno shuyni qarayarqan Egipto runakuna hebreo runakunawan juntu mikur penqakuyaptinmi. 33Mikuyänanpaq wawqinkunata José jamasirqan mayorpita qalaykur shulkayaqmi. Sayno jamasiptinmi paykuna jukninpis jukninpis mansakash rikapänakur yarpachakuytapis atipäyarqansu. 34Kikinpaq qarayashqan mikuytapis wawqinkunatami José yapaparqan. Wakin kaq wawqinkunata qarashqanpita mastami Benjamínta qararqan. Say junaqqa kushishqami lapan wawqinkunawan José mikurqan y upurqan.

Currently Selected:

Génesis 43: qvhB

Highlight

Copy

Compare