Génesis 45

Wawqin kashqanta José wilashqan

1Judá sayno wilaptinmi José awantakurqannasu wawqin kashqanta wilayta. Saymi ashmaynin runakunata nirqan: <<Lapayki kaypita yarquyay>>.

Ashmayninkuna yarquskiyaptinnami wawqinkunalawanna José quëdarqan.#Hech. 7.13. 2José qaparayparaq waqashqantami Egipto runakunapis wiyayarqan. Saynölami Faraónpa palaciunchöpis musyayarqan.

3Saypitanami José nirqan: <<Wawqiki Josémi kaykä. ¿Rasunpaku papänï kawaykanraq?>>

Josépa nawpancho kaykäyashqanta musyaykurmi wawqinkuna pasaypa mansakaylawan ima niytapis kamäpakuyarqansu. 4Saypitanami José nirqan: <<Mana mansariypa nawpäman witiyämuy>>.

Nawpanman witiykuyaptinnami nirqan: <<Egiptuman rantikayämashqayki wawqiki Josémi kaykä. 5Rantikayämashqaykipita amana lakikuyaysu. Saynöpis jitapänakur nanaq nawikikunapa ama rikapänakuyaysu. Tayta Diosmi puntata kayman kachamash runakuna muchuywan mana wanuyänanpaq. 6Ishkay watanami maysaychöpis fiyupa muchuy kaykan. Saynöpis pisqa wata masraqmi muchuy kanqa. Runakuna muruyaptinpis manami mikuy wayunqasu. 7Sayno kananpaq kaptinmi Tayta Dios puntata kachamash muchuywan mana ushakäyänaykipaq. Saynöpami qamkunapita miraqkunapis kayanqaraq. ¿Piraq ichiklatapis yarpanman karqan Tayta Dios sayno kamakaykäsishqanta? 8Tayta Dios munaptinmi qamkuna mana tantiyarpis rantikayämarqayki. Saymi kay nacioncho noqata churamash Faraónta mandäsinäpaq, wayinta rikanäpaq y lapan Egipto runakunapa gobernadornin kanäpaqpis.

9<<Kanan papäninsi kaqman jukla kutiykur wilayay: <Suriki Josétami Tayta Dios churash Egipto runakunapa taytanno kananpaq. Juklashi aywashun tinkunaykipaq. 10Wanushqaykiyaqpis José rikashunaykipaqshi imaykansitapis apakurkur lapan wilkaykikunawan y uywaykikunawan Gosén partiman aywakushun. 11Say nacionchöshi imapis mana pishïmänansipaq mikuyta kamaripämäshun. Pisqa wataraqshi muchuy saynöla kanqa>.

12<<Sayno nikashqäta wawqï Benjamínpis y lapaykipis wiyaykäyämankimi. 13Kay Egiptucho lapanpis respitayämashqanta papäninsita wilayanki. Saynöpis wilayanki kaycho lapan rikayashqaykikunata. Kanan jukla aywar papäninsita pushayämuy>>.

14Nirkurmi Joséwan Benjamín makalanakurkur waqayarqan. 15Saynölami wakin kaq wawqinkunatapis musashpan makalarkur José waqarqan. Saypitaqa mana mansapaypanami wawqinkuna Joséta parlapäyarqan.

Egiptucho tänanpaq Jacobta Faraón qayasishqan

16Josépa wawqinkuna chäyämushqanta musyaykurmi Faraónqa lapan mandäsiqninkunawan kushikuyarqan. 17Saymi Joséta Faraón nirqan: <<Wawqikikunata niy abyunkunaman chaqnakurkur#45.17 Wakin runakunaqa cargakurkur niyanmi. Canaánman kutiyänanpaq. 18Nirkur papänikita lapan castankunatawan kayman pushayämusun. Chäyämuptinnami alinnin partita rikasishaq saycho täyänanpaq. Saynöpis kay nacioncho wayuq alinnin mikuytami mikuyanqa. 19Saynöpis niy kaypita carrëtakunata apar warmikunata, wamrakunata y papänikitapis apayämunanpaq. 20Apamuyta mana kamäpakuyashqanpaqqa ama lakikuyäsunsu. Egiptucho mas ali kaqkunatami chaskiyanqa>>.

21Israelpa#45.21 Israelqa Jacobpa jukaq jutinmi kaykan. surinkuna José nishqannölami lapantapis rurayarqan. Josépis Faraón nishqannölami carrëtakunata apasirqan. Nänicho mikuyänanpaqpis mirkapatami rurasirqan. 22Saynöpis mushuq mödanakunatami trukakuyänanpaq aypurqan. Benjamíntami isanqa kimsa pachak (300) siclo qellayta y pisqa trukaq mödanata aptaparqan. 23Papäninpaqnami chunka orqu ashnukunaman chaqnarkur Egiptucho imaykapis mas alinnin kaqkunata apasirqan. Saynöpis chunka china ashnukunaman chaqnarkur trïguta, tantata y wakin mikuykunatapis apasirqan Egiptuman aywayashpan nänicho mikuyänanpaq. 24Wawqinkunata despacharmi José nirqan: <<Cuidätaq nänicho rimanakuykäyankiman>>.

Sayno yäsirkuptinmi aywakuyarqan.

25Egiptupita kutirnami papänin Jacob tashqan Canaánman chäyarqan. 26José kawaykashqanta y Egiptucho mandaq kaykashqanta wilayaptinmi Jacob ima niytapis kamäpakurqansu ni criyirqansu. 27José lapan nishqanta wilayaptin y payta apayänanpaq carrëtakunata apasishqanta rikaykurmi isanqa seqaypa kushikurqan. 28Saymi nirqan: <<¡Musyayküku manaku surï José kawaykashqanta! ¡Manaraq wanukur jukla aywaykushaq surïwan tinkuykunäpaq!>>

Currently Selected:

Génesis 45: qvhB

Highlight

Copy

Compare